ភ្នំពេញៈ ក្រុមពាណិជ្ជករលើវិស័យស្រូវអង្ករបានបង្ហាញថា ផែនការនាំអង្ករចេញឲ្យបាន១លានតោននៅឆ្នាំ២០១៥ អាចសម្រេចបានតាមផែនការដែលបានគ្រោងទុក ប៉ុន្តែស្ថិតក្នុងស្ថានភាពលំបាកច្រើន ដែលទាមទាឲ្យមានការដោះស្រាយជាបន្ទាន់ចាប់ពីពេលនេះតទៅ។
សម្ពន្ធ័អ្នកនាំអង្ករចេញកម្ពុជាកាលពីថ្ងៃទី២២ ខែមករា ២០១៤ នៅសណ្ឋាគារសាន់វេ បានរួមគ្នារៀបចំផែនការយុទ្ធសាស្រ្តថ្មី ក្នុងកិច្ចប្រឹងប្រែងនាំអង្ករចេញឲ្យបាន1លានតោននៅឆ្នាំ២០១៥ស្របតាមគោលនយោបាយរបស់រាជរដ្ឋាភិ បាល។ការរៀបចំផែនការយុទ្ធសាស្រ្តថ្មីរបស់ខ្លួននេះ បន្ទាប់ពីពួកគេសង្កេតឃើញមានបញ្ហាប្រឈមជាច្រើនដែលនឹងជៈឥទ្ធិពលអាក្រក់ដល់វិស័យនាំអង្ករចេញនាពេលខាងមុខ។
ថ្លែងក្នុងសិក្ខាសាលា លោកឧកញ៉ាគឹម សាវុធ ប្រធានសម្ពន្ធ័អ្នក នាំអង្ករចេញកម្ពុជានៅតែផ្តោតក្តីសង្ឃឹមចំពោះភាពជោគជ័យលើការនាំចេញអង្ករឲ្យបាន១លានតោននៅក្រោយ ប៉ុន្តែការនាំចេញនេះអាចនឹងជួបការលំបាកច្រើន។ លោកបានពន្យល់ថា កាលពី ឆ្នាំ២០១១ផែនការនាំអង្ករចេញ១លានតោនអាចសម្រេចបានយ៉ាងធូរ ប៉ុន្តែមកដល់ពេលនេះផែនការនេះក៏នៅតែសម្រចបានដ៏ដែរ គ្រាន់តែតឹងបន្តិចហើយប្រសិនបើពុំមានយន្តការដោះស្រាយចាប់ពីពេលនេះទៅទេនោះបញ្ហាអាចរំាងស្ទះអាចនឹងកើតឡើង។
លោកឧកញ៉ាបានអះអាងថា បញ្ហាប្រឈមដែលកំពុងជួបប្រទៈជារឿយនាពេលបច្ចុប្បន្ននេះមាន៣សំខាន់ គឺទី១សេវាកម្មដឹកជញ្ជូន ,ទី២ ការចែកចាយស្រូវពូជដែលមានទីផ្សារពីស្ថាបន័ជំនាញទៅប្រជាកសិករដោយផលិតទទួលបានបរិមាណខ្ពស់ និងមានគុណភាព និងទី3 ការសម្រួបសម្រួលឯកសារដើម្បីខ្ចីទុនពីធានាគារនៅមានភាពស្មុគស្មាញ។
.jpg)
លោកទេសរដ្ឋមន្រ្តី កឹម ស៊ីថន រដ្ឋលេខាធិការក្រសួងពាណិជ្ជកម្មបានសម្តែងសុទិដ្ឋិនិយមខ្ពស់ក្នុងការសម្រេចបានលើផែនការនេះព្រោះក្រសួងបានធ្វើការកែទម្រង់លើបែបបទនាំចេញឲ្យមានលក្ខណៈប្រសើរហើយ ពិសេសបានខិតខំចរចាភាពអនុគ្រោះពន្ធ និងចរចារបើកទីផ្សារអង្ករជាលក្ខណៈទ្វេភាគីនិងពហុភាគី ដើម្បីធានាផែនការនាំអង្ករចេញនៅឆ្នាំក្រោយនេះសម្រេចបានជោគជ័យ។
លើសពីនេះទៀត លោកក៏បានបញ្ជាក់ថា ក្រសួងក៏បានពង្រឹងលើការត្រួតពិនិត្យគុណភាពអង្ករដែលបាននាំចេញធានាថាគ្មានការក្លែងបន្លំ ដើម្បីឲ្យអង្ករកម្ពុជាមានទីផ្សារស្ថិតស្ថេរ ហើយកាន់តែល្បីល្បាញនៅលើពិភពលោក។
សូមបញ្ជាក់ថា យោងតាមរបាយការណ៍ពីប្រពន្ធ័អនុគ្រោះរបស់ក្រសួងពាណិជ្ជកម្ម នៅឆ្នាំ២០១៣ កម្ពុជានាំអង្ករចេញបានចំនួន៣៨៥.២៩៦តោន គឺមានការកើនឡើង៥១ភាគរយ បើធៀបទៅនឹងឆ្នាំ២០១២ ហើយក្នុងចំណោមប្រទេសទាំង៥២ដែលបានទិញអង្ករពីកម្ពុជា ប្រទេសបារំាងស្ថិតក្នុងចំណាត់ថ្នាក់ទី១ ដែលបានទិញអង្ករពីព្រះរាជាណាចក្រកម្ពុជាច្រើនជាងគេ៕
ដោយៈ ភីនរ៉ា