ភ្នំពេញៈ សម្រាប់ ឆ្នាំ២០១៣-២០១៤តុល្យភាពស្បៀងនៅក្នុងប្រទេសកម្ពុជា នៅសល់ស្រូវជាង៤,៧លានតោនឬគិតជាអង្ករប្រមាណជាជាង៣លានតោនលើការនាំចេញទៅក្រៅប្រទេស។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ុក រ៉ាប៊ុន ថ្លែងបែបនេះ ខណៈពេលជួបជាមួយលោក Jean-François Cautainឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា កាលពីពេលកន្លងទៅនេះ បានលើកឡើងថា ពិតមែនតែប្រទេសកម្ពុជាបានជួបប្រទះគ្រោះធម្មជាតិទឹកជំនន់តែតាមលទ្ធផលនៃការវាយតម្លៃតុល្យភាពស្បៀង សម្រាប់ឆ្នាំ២០១៣-២០១៤នាពេលថ្មីៗនេះ គឺយើងមានអតិរេកស្រូវជាង៤,៧៨៥លានតោនគិតជាអង្ករប្រមាណជាជាង៣លានតោនដែលរំពឹងថា នឹងអាចនាំចេញអង្ករបានយ៉ាងតិច១លានតោននៅឆ្នាំ២០១៥តាមការរំពឹងទុក។
លោក អ៊ុក រ៉ាប៊ុន បានចាត់ទុកវិស័យកសិកម្មថា ជាវិស័យគន្លឹះនិងមានសារៈសំខាន់សម្រាប់កំណើនសេដ្ឋកិច្ចជាតិ។ លោកបានជម្រាបជូនផងដែរ អំពីកិច្ចព្រមព្រៀងផ្តល់ជំនួយហិរញ្ញប្បទានរបស់ សហភាពអឺរ៉ុបលើគម្រោងកម្មវិធីលើកកម្ពស់កំណើនវិស័យកសិកម្ម ដោយនិរន្តរភាពសម្រាប់គាំទ្រដល់គោលនយោបាយវិស័យកសិកម្ម វិស័យជលផល និងផលិតកម្មសត្វ។
ទន្ទឹមនឹងនោះ លោកក៏បានជំរុញអង្គភាពពាក់ព័ន្ធក្រោមឱវាទដើម្បីអនុវត្តគម្រោងថ្មីនេះឱ្យទទួលបានជោគជ័យ និងចូលរួមដោះស្រាយជាជំហ៊ានៗជាមួយក្រសួង-ស្ថាប័ន ក៏ដូចជាអាជ្ញាធរមូលដ្ឋានពាក់ព័ន្ធតាមជាក់ស្តែង។
យោងតាមរបាយការណ៍របស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្ករនៃក្រុមការងារផ្នែកស្រូវ-អង្ករនៃ វេទិការាជរដ្ឋាភិបាល-ផ្នែកឯកជនឆ្នាំ២០១៣ ប្រទេសកម្ពុជានាំចេញអង្ករបានចំនួន៣៧៨,៨៥៦ តោន ដែលបរិមាណនេះគឺមានការកើនឡើង ១៨៤.១៦ភាគរយបើធៀបទៅនឹងការនាំចេញនៅក្នុងឆ្នាំ២០១២ ដែលមានចំនួនតែ ២០៥,៧១៧តោននោះ។
គួរបញ្ជាក់ថា កាលពីឆ្នាំ២០១០កន្លងទៅនេះ រាជរដ្ឋាភិបាលកម្ពុជា បានដាក់ចេញនូវគោលនយោបាយស្ដីពីការជំរុញផលិតកម្មស្រូវ និងការនាំចេញអង្ករដែលក្នុងនោះចក្ខុវិស័យជាចំបងរបស់រដ្ឋាភិបាលគឺ ធ្វើយ៉ាងណាឲ្យកម្ពុជាអាចនាំចេញអង្ករបានយ៉ាងតិច១លានតោននៅត្រឹមឆ្នាំ២០១៥៕
ដោយ៖ ភីនរ៉ា