ភ្នំពេញ៖ ក្រសួងយុត្តិ ធម៌យុត្តិធម៌បាន បើកកិច្ចប្រជុំ មួយក្រោមវត្តមាន តំណាងរបស់អន្តរក្រសួងដើម្បីត្រួត ពិនិត្យសេចក្តីព្រាង ច្បាប់ស្តីពីការ រៀបចំអង្គការ តុលាការ ឱ្យឆ្លើយតបទៅនឹងស្មារតី នៃរដ្ឋធម្មនុញ្ញ និងគោលនយោបាយ របស់រាជរដ្ឋាភិបាល ក្នុងការធ្វើកំណែទម្រង់ច្បាប់ និងតុលាការ ដើម្បីបង្កើនជំនទុកចិត្តពីប្រជាពលរដ្ឋ និងសុវត្ថិភាពសង្គម។
កិច្ចប្រជុំ សេចក្តីព្រាងច្បាប់ ដែលដឹកនាំផ្ទាល់ដោយ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ នៅព្រឹកថ្ងៃទី២០ ខែមករានេះ បានលើក យកមាត្រា១២៨ថ្មី នៃរដ្ឋធម្មនុញ្ញ នៃព្រះរាជាណាចក្រ កម្ពុជា ដែលបានបញ្ញត្តិថា អំណាចតុលាការ ជាអំណាចឯករាជ្យ។
អំណាច តុលាការធានា រក្សាអនាគតិ និងការពារសិទ្ធិ សេរីភាពរបស់ ប្រជាពលរដ្ឋ។អំណាចតុលាការ គ្របដណ្តប់ទៅ លើរឿងក្តីទាំងអស់ រួមទាំងរឿងក្តី រដ្ឋបាលផង។អំណាចនេះត្រូវប្រគល់ ឱ្យតុលាការ និងសាលាជម្រះ ក្តីគ្រប់ផ្នែក និងគ្រប់ជាន់ថ្នាក់។ការជម្រះក្តីផ្តល់ យុត្តិធម៌ ត្រូវធ្វើក្នុងនាម ប្រជារាស្ត្រ ខ្មែរ តាមនីតិវិធី និងច្បាប់ យ៉ាងម៉ឺងម៉ាត់ និងឱ្យអស់ ពីដូងចិត្ត និងសម្បជញ្ញៈ របស់ខ្លួន។
លោក អង្គ វង្សវឌ្ឍានា បានថ្លែងថា លោកបានដឹកនាំ ក្រុមការងារ ក្រសួងយុត្តិធម៌ ពិនិត្យសេចក្តី ព្រាងច្បាប់ ស្តីពីការរៀបចំ អង្គការតុលាការ ចប់សព្វគ្រប់ នៅថ្ងៃទី០៨ខែ វិច្ឆិកាឆ្នាំ២០១៣ ហើយ បានបញ្ជូន សេចក្តីព្រាងច្បាប់នេះ ទៅឧត្តម ក្រុមប្រឹក្សា នៃអង្គចៅ ក្រមពិនិត្យ និងផ្តល់ យោបល់ចប់ សព្វគ្រប់តាម លិខិតចុះថ្ងៃទី១៣ខែធ្នូ ឆ្នាំ២០១៣។
ជាលទ្ធផល ឧត្តមក្រុម ប្រឹក្សានៃអង្គចៅក្រម បានឯកភាព លើគោលការណ៏ និងខ្លឹមសារនៃសេចក្តីព្រាង ច្បាប់ដែលស្នើឡើងដោយក្រសួង យុត្តិធម៌ និងបានស្នើសុំ កែសម្រួលលើចំណុច មួយចំនួន តិចតួចប៉ុណ្ណោះ ដែលក្រសួងយុត្តិធម៌យល់ថា សំណើទាំងនេះ អាចទទួលយកមកកែសម្រួលបាន ដោយមិនប៉ះពាល់ ដល់គោលការនៃការរៀបចំ អង្គការ តុលាការ និងអង្គការ អយ្យការ ក៏ដូចជា ខ្លឹមសារសំខាន់ៗនៃសេចក្តី ព្រាងច្បាប់ ឡើយ។
គួរបញ្ជាក់ថា សេចក្តីព្រាង ច្បាប់នេះ មាន៩ជំពូក មានដូចជា ជំពូកទី១ ស្តីពីបញ្ញតិ្តទូទៅ ជំពូកទី២ ស្តីពីសាលាដំបូង និងអយ្យការ អមសាលាដំបូង ជំពូកទី៣ស្តីពី តុលាការ យោធា និងអយ្យការ អមតុលាការ យោធា ជំពូកទី៤ស្តីពី សាលាឧទ្ធរណ៍ និងមហាអយ្យ ការអមសាលាឧទ្ធរណ៍ ជំពូកទី៥ ស្តីពី តុលាការកំពូល និងមហាអយ្យការ អមតុលការកំពូល ជំពូកទី៦ស្តីពី វិសមិតភាព ជំពូកទី៧ស្តីពី ថវិកាសាលាជម្រះក្តី និងអយ្យការ អមសាលាជម្រះក្តី ជំពូកទី៨ស្តីពី អន្តរប្បញ្ញត្តិ និងជំពូកទី៩ស្តីពី អវសាន្តបញ្ញត្តិ៕ ដោយ៖ រតនា