កំពង់ឆ្នាំង៖ ផ្ទះប្រជាពលរដ្ឋចំនួនជាង២០ខ្នង ត្រូវបានព្រះអគ្គីលេបត្របាក់តែក្នុងរយះ១ម៉ោង ដោយសារតែការទុសេខ្សែភ្លើង គ្រោះអគ្គិភ័យនេះ បានកើតឡើងវេលាម៉ោង៦ និង៥០នាទីយប់ ថ្ងៃទី១៨ មីនា នៅខាងលិចផ្សាររមាស តាមបណ្តោយផ្លូវជាតិលេខ៥៣ ផ្លូវរថភ្លើង ស្ថិតក្នុងភូមិស្រែតាជៃ ឃុំអភិវឌ្ឍន៍ ស្រុកទឹកផុស ។ អធិការនគរបាលស្រុកទឹកផុសលោកខែម វិបុល បានឲ្យដឹងថា ដើមហេតុនៃគ្រោះអគ្គិភ័យខាងលើនេះនេះ បង្កឲ្យមានការឆាបឆេះឡើងគឺ បណ្តាលមកពីការទុសេខ្សែភ្លើងចេញពីផ្ទះស្រ្តីមេម៉ាយម្នាក់ ឈ្មោះថា ម៉ែ អាងន ៗ (ឈ្មោះពិតមិនទាន់ដឹង) ។ ក្នុងពេលអគ្គិភ័យកំពុងឆាបឆេះ ដោយសារមានខ្យល់បក់ខ្លាំង និងតាមផ្ទះមួយចំនួនមានលក់សាំង និងហ្គាសផងនោះ ក៏បង្កឲ្យឆេះរាលដាលដល់ផ្ទះអាជីវករលក់ដូរ ដែលមានជញ្ជាំងជាប់ៗគ្នា ពីផ្ទះមួយទៅផ្ទះមួយ អស់ជាង២០ខ្នង ប៉ុន្តែមិនបង្កឲ្យមានមនុស្សរបួស ឬស្លាប់ឡើយ ។
លោកអធិការបានបន្ដឲ្យដឹងទៀតថា ទំហំនៃការខូចខាតដោយគ្រោះអគ្គិភ័យនេះ សមត្ថកិច្ចមិនទាន់ស្រង់ស្ថិតិបានច្បាស់លាស់ពីជនរងគ្រោះទាំងអស់នោះនៅឡើយទេ ព្រោះតែម្ចាស់ផ្ទះខ្លះ មិននៅផ្ទះ ទៅការបងប្អូននៅឆ្ងាយ តែតាមការប៉ាន់ស្មាន ទំហំនៃការខូចខាត គឺមានជាច្រើនម៉ឺនដុល្លា ដោយសារជនរងគ្រោះជាអាជីវករលក់ដូរឥវ៉ាន់ច្រើននាក់ ។ នៅក្នុងគ្រោះអគ្គិភ័យខាងលើនេះ ប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត ចំនួន២គ្រឿង បានប្រើប្រាស់ទឹកអស់១៧ ជើង ជួយបាញ់ពន្លត់ ទើបអាចទប់ស្កាត់ការឆាបឆេះរាលដាលទៅផ្ទះដ៏ទៃជាបន្តទៀតបាន ៕ដោយ៖ ភីនរ៉ា