ភ្នំពេញ៖ រដ្ឋាភិបាលកម្ពុជាបានសម្រេចឲ្យក្រសួងសុខាភិបាល ត្រូវយកសេចក្តីព្រាងអនុក្រឹត្យស្តីពីវិធានការហាមការជក់បារី និងការបង្ហុយផ្សែងផលិតផលថ្នាំជក់ នៅកន្លែងធ្វើការ និងកន្លែងសាធារណៈ ដើម្បីធ្វើការត្រួតពិនិត្យ និងកែសម្រួលឡើងវិញនូវមាត្រាមួយចំនួនដែលនិយាយផ្តោតទៅលើការដាក់ទណ្ឌកម្ម និងការផាកពិន័យច្រើនជាងការអប់រំ។
.jpg)
ស្រ្តីនិងកុមារត្រូវបានចាត់ទុកថា គឺជាក្រុមមនុស្សដែលងាយទទួលរងគ្រោះ នៅក្នុងការស្រូបផ្សែងបារីពីគេ ទាំងនៅក្នុងផ្ទះ នៅតាមទីសាធារណៈ និងកន្លែងធ្វើការរឺភោជនីដ្ឋានជាដើម ដូច្នេះដើម្បីរួមចំណែកនៅក្នុងការជួយការពារសុខុមាលភាពរបស់ប្រជាពលរដ្ឋ និងក្រុមមនុស្សដែលងាយរងគ្រោះខាងលើនេះ រាជរដ្ឋាភិបាលកម្ពុជាបានសម្រេចអនុម័តច្បាប់ស្តីពីការត្រួតពិនិត្យថ្នាំជក់ និងសម្រេចអនុម័តទៅលើអនុក្រឹត្យមួយចំនួនទៀតរួមមាន៖ ទី១.អនុក្រឹត្យស្តីពីសារព្រមាននៅលើកញ្ចប់បារី ទី២. អនុក្រឹត្យស្តីពីការហាមឃាត់ការផ្សាយពាណិជ្ជកម្មថ្នាំជក់ ដោយលើកចុងក្រោយនេះ រដ្ឋាភិបាលកំពុងតែជម្រុញឲ្យក្រសួងសុខាភិបាលធ្វើការកែប្រែឡើងវិញ នូវសេចក្តីព្រាងអនុក្រឹត្យមួយដែលស្តីអំពីវិធានការហាមការ ជក់បារី និងការបង្ហុយផ្សែងផលិតផលថ្នាំជក់ នៅកន្លែងធ្វើការ និងកន្លែងសាធារណៈ ដើម្បីឲ្យអនុក្រឹត្យនេះមានចរិកជាការអប់រំច្រើនជាងគិតតែពីការដាក់ទណ្ឌកម្មរឺផាកពិន័យ។
.jpg)
លោកម៉ាក វីសូរ ប្រធានអង្គការអាដ្រាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ដើម្បីការពារសុខុមាលភាពប្រជាពលរដ្ឋ ក្រសួងសុខាភិបាលបានបង្កើតច្បាប់និងអនុក្រឹត្យជាបន្តបន្ទាប់ ដែលបច្ចុប្បន្ននេះ មានអនុក្រឹត្យមួយ ត្រូវបានរដ្ឋាភិបាលស្នើឲ្យមានការកែប្រែ និងធ្វើការពិនិត្យឡើងវិញផងដែរ។ លោកបន្តថា ប្រមាណពីរទៅបីឆ្នាំមុននេះ លោកបានទទួលសេចក្តីព្រាងអនុក្រឹត្យនេះ ដើម្បីធ្វើការពិនិត្យផងដែរ ប៉ុន្តែលោកមានចំណាប់អារម្មណ៍នៅក្នុងការដាក់បញ្ចូលទៅលើមាត្រាមួយចំនួន ដែលជាប់ពាក់ពន្ធ័ទៅនិងទណ្ឌកម្ម ការផាកពិន័យ និងការអប់រំនៅក្នុងនោះផងដែរ។ លោកបញ្ជាក់ថា៖«ខ្ញុំគិតថា អនុក្រឹត្យដែលនិយាយអំពីការហាមឃាត់គួរតែមានទោសពៃនៅក្នុងច្បាប់នេះ ប៉ុន្តែយើងក៏ត្រូវធ្វើការបែងចែកអង្គភាពគ្រប់គ្រងច្បាប់នេះឲ្យបានច្បាស់លាស់ផងដែរ ដើម្បីឲ្យការអនុម័តទាំងទោសទណ្ឌ និងការអប់រំបានប្រកបទៅដោយប្រសិទ្ធភាព»។ លោកបន្ថែមថា លោកកំពុងរង់ចាំរួមចំណែកនៅក្នុងកិច្ចសហការជួយកែប្រែនូវអនុក្រឹត្យនេះ។
.jpg)
បើតាមការប៉ាន់ស្មានបានឲ្យដឹងថា ក្នុង១ឆ្នាំមានប្រជាពលរដ្ឋកម្ពុជាប្រហែល១ម៉ឺននាក់ត្រូវបានស្លាប់ដោយសារជំងឺដែលបង្កឡើងដោយការជក់បារី ដែលនេះសបញ្ជាក់ឲ្យឃើញថា ក្នុង១ថ្ងៃយ៉ាងហោចណាស់មានមនុស្សចំនួន៣០នាក់ត្រូវបានស្លាប់ជារៀងរាល់ថ្ងៃផងដែរ ដែលនេះគឺជាចំនួនដ៏ច្រើនសម្រាប់កម្ពុជា ដូច្នេះការហាមឃាត់ការជក់បារីវាអាស្រ័យទៅលើឆន្ទៈរបស់រដ្ឋាភិបាល ប្រសិនបើរដ្ឋាភិបាលឆាប់អនុម័តអនុក្រឹត្យស្តីពីវិធានការហាម ការជក់បារី និងការបង្ហុយផ្សែងផលិតផលថ្នាំជក់នៅកន្លែងធ្វើការ និងនៅកន្លែងសាធារណៈ នោះនិងអាចកាត់បន្ថយពីអត្រាចំនួនមនុស្សស្លាប់បានផងដែរ។
ដោយ៖ អភិរក្ស