ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា គ្រោងនឹងបំពេញទស្សនកិច្ច នៅប្រទេសសាធារណរដ្ឋបេឡារូស នាពេលឆាប់ៗនេះ ក្នុងគោលបំណងពង្រឹងពង្រីកកិច្ចសហប្រតិបត្តិការ លើគ្រប់វិស័យ ជាពិសេសផ្នែកកសិកម្ម និងសេដ្ឋកិច្ច ព្រមទាំងទេសចរណ៍។អ្នកនាំពាក្យរបស់ក្រសួងការបរទេសខ្មែរ លោក កុយ គួង បានមានប្រសាសន៍ប្រាប់ អ្នកសារព័ត៌មាន នាព្រឹកថ្ងៃទី១៦ ខែមករា ឆ្នាំ២០១៤ បន្ទាប់ពីកិច្ចជំនួបដោយ បិទទ្វារ រវាងលោក ហោ ណាំហុង ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសខ្មែរ ជាមួយនឹងឯកអគ្គរដ្ឋទូត សាធារណរដ្ឋបេឡារូស លោក វ៉ាឡារី សាដូខូ (Valary Sadokho) នាទីស្តីការក្រសួង។លោក កុយ គួង បានមានប្រសាសន៍ថា ដំណើរទស្សនកិច្ចថ្នាក់ដឹកនាំយើងនាពេលខាងមុខនេះ គឺធ្វើយ៉ាងណាឲ្យទំនាក់ទំនងហ្នឹងទាំងសេដ្ឋកិច្ចពាណិជ្ជកម្ម ក៏ដូចជាវិស័យទេសចរណ៍ឲ្យមានភាពរឹងមាំ ដំណាលគ្នាទៅនឹង ទំនាក់ទំនងផ្នែកនយោបាយ និងការទូតរវាងប្រទេសទាំងពីរ។
ក្រៅតែពីការពង្រឹងកិច្ចសហប្រតិបត្តិការលើគ្រប់វិស័យនេះ ប្រទេសទាំងពីរ គ្រោងនឹងចុះហត្ថលេខា ការលើកលែង ទិដ្ឋាការផ្នែកការទូតផងដែរ ដើម្បីបង្កលក្ខណៈងាយស្រួលដល់ការធ្វើដំណើរ ហើយការចុះហត្ថលេខានេះ នឹងត្រូវធ្វើឡើងក្នុងកំឡុងពេលទស្សនកិច្ចរបស់រដ្ឋមន្រ្តីក្រសួងការបរទេសបេឡារូស មកកម្ពុជា នាខែមីនា ឆ្នាំ២០១៤ខាងមុខនេះ។លោក កុយ គួង បានបន្តថា ក្នុងដំណើរទស្សនកិច្ចរបស់សម្តេចតេជោ ហ៊ុន សែន ក៏នឹងមានគម្រោងចុះហត្ថលេខាមួយចំនួនផងដែរ ក្នុងការពង្រឹងវិស័យសេដ្ឋកិច្ច និងការធ្វើវិនិយោគចំពោះប្រទេសទាំងពីរ ហើយមិនតែប៉ុណ្ណោះ ប្រទេសកម្ពុជាក៏នឹងបង្កើតឯកអគ្គរាជទូតកម្ពុជាប្រចាំប្រទេសនេះផងដែរ តែមាននិវេសនដ្ឋាននៅប្រទេសរុស្ស៊ី។គួរលំលឹកផងដែរថា កម្ពុជា និង បេឡារូស បានចាប់ផ្តើមពង្រឹងការទូតនឹងគ្នា តាំងពីកំឡុងឆ្នាំ១៩៩៥មក ប៉ុន្តែទំនាក់ទំនងនេះ មិនបានធំដុំឡើយ ពោលសូម្បីតែទំហំពាណិជ្ជកម្មក៏មានបន្តិចបន្ទួចតែប៉ុណ្ណោះ ជាក់ស្តែងកាលពី ឆ្នាំ២០១២កន្លងទៅ ទំហំពាណិជ្ជកម្មរវាងប្រទេសទាំងពីរគឺមានមិនដល់១០លានដុល្លារផង។ សម្រាប់ទំនិញដែលកម្ពុជាយកមកពីបេឡារូស មានដូចជាត្រាក់ទ័រនិងគ្រឿងចក្រផ្សេងៗ ហើយកម្ពុជានាំទៅប្រទេសនេះវិញមានដូចជាសំលៀកបំពាក់ និងស្បែកជើងជាដើម៕
ដោយ៖ ស.ស្អាត