ភ្នំពេញ៖ ប្រទេសកម្ពុជាគឺជាប្រទេសគំរូមួយ ដែលត្រូវបានជ្រើសរើសដោយអង្គការសហប្រជាជាតិក្នុងការរៀបចំរបាយការណ៍វឌ្ឍនភាពនៃការសម្រេចគោលដៅអភិវឌ្ឍន៍សហស្សវត្សរ៍កម្ពុជា។ការទទួលស្គាល់នេះ ត្រូវបាន លោក គាត ឈន់ ឧបនាយករដ្ឋមន្ត្រីប្រចាំការ បានលើកឡើងថា ដោយសារ ប្រទសកម្ពុជា ជាប្រទេសមួយក្នុងចំណោមបណ្តាប្រទេសអភិវឌ្ឍន៍តិចតួចទាំងឡាយដែលមានភាពលេចធ្លោខ្លាំងនិងសម្រេចបាននូវសមិទ្ធផលគួរឱ្យស្ងើចសរសើរ ចំពោះការសម្រេចបាននូវគោលដៅអភិវឌ្ឍន៍សហស្សវត្សរ៍តាមទិសដៅដែលបានកំណត់។លោក បន្ថែមថា ការដឹកនាំកិច្ចប្រជុំពិគ្រោះយោបល់ស្តីពី សេចក្តីព្រាងរបាយការណ៍វឌ្ឍនភាពនៃការសម្រេចបានគោលដៅអភិវឌ្ឍន៍សហស្សវត្សរ៍កម្ពុជាឆ្នាំ២០១៣នៅពេលនេះ គឺដើម្បីពិនិត្យមើល សេចក្តីព្រាងរបាយការណ៍វឌ្ឍនភាពនៃការសម្រេចបានគោលដៅអភិវឌ្ឍន៍សហស្សវត្សរ៍កម្ពុជា ដើម្បីទទួលបាននូវមតិយោបល់ដែលប្រើប្រាស់ជាធាតុចូលក្នុងបញ្ចប់របាយការណ៍នេះ ហើយដែលនឹងត្រូវផ្ញើជូនអង្គការសហប្រជាជាតិប្រទេសកម្ពុជាអាចសម្រេចបានទាំងស្រុងនូវគោលដៅទី១- ការលុបបំបាត់ភាពក្រីក្រនិងភាពអត់ឃ្លានធ្ងន់ធ្ងរ ទី២- ការសម្រេចឱ្យ បានជាសកលនៃការអប់រំបឋមសិក្សា ទី៤- ការកាត់បន្ថយមរភាពកុមារ និងទី៨- ការបង្កើនភាពជាដៃគូជាសកលសម្រាប់ ការអភិវឌ្ឍន៍ត្រូវបានសម្រេចទាំងស្រុង។ទន្ទឹមនឹងនោះ គោលដៅទី៥- ការលើកកម្ពស់សុខភាពមាតា ទី៦-ការប្រយុទ្ធនឹងមេរោគអេសដ៍ គ្រុនចាញ់ និងជម្ងឺផ្សេងៗទៀត នឹងអាចសម្រេចបានមុននិងត្រឹមឆ្នាំ២០១៥។ដោយឡែកគោលដៅទី៣-ការលើកកម្ពស់សមភាពយេនឌ័រ និងការផ្តល់សិទ្ធិ អំណាចដល់ស្ត្រី ទី៧- ការធានាចិរភាព បរិស្ថាន និងទី៩- ការបោសសម្អាតមីន សំណល់ជាតិផ្ទុះពីសង្រ្គាម និងការសង្គ្រោះជនរងគ្រោះ និងត្រូវបន្តអនុវត្ត ដើម្បីឈានទៅសម្រេចបានតាមគោលដៅកំណត់ តាមរយៈការប្តេជ្ញាចិត្តខ្ពស់របស់រាជរដ្ឋាភិបាល និងការខិតខំប្រឹងប្រែងបន្តរបស់ស្ថាប័នអនុវត្ត។លទ្ធផលនៃអង្គប្រជុំ បញ្ជាក់ទៀតថា កម្ពុជាមានសុទិដ្ឋិនិយមខ្ពស់ក្នុងការសម្រេចបានទាំងស្រុងនូវគោលដៅដែលបានកំណត់ត្រឹមឆ្នាំ២០១៥ បើទោះបីជាកម្ពុជានៅជួបប្រទះបញ្ហាប្រឈមមួយចំនួន និងទាមទារឱ្យមានកិច្ចខិតខំប្រឹងប្រែងបន្ថែមខ្លះទៀតក៏ដោយ៕
ដោយ៖ រតនា