ភ្នំពេញ៖ រដ្ឋាភិបាលជប៉ុនជួយពង្រឹងការគ្រប់គ្រងច្បាប់កម្មសិទ្ធិដីធ្លី ដល់ក្រសួងរៀបចំដែនដី នគររូបនីយកម្ម និងសំណង់ ដើម្បីធានាឲ្យពលរដ្ឋកាន់តែមានសិទ្ធិពេញលេញក្នុងការកាន់កាប់ដីធ្លីរបស់ខ្លួនដោយស្របច្បាប់និងគ្មានផលទំនាស់កើតឡើង។កាលពីព្រឹកថ្ងៃទី ៩ មករា ២០១៤ នៅសណ្ឋាគារ សាន់វ៉េ មន្ត្រីជំនាញជប៉ុន បានមកជួយផ្សព្វផ្សាយអំពីបែបបទថ្មី នៅក្នុងការការពារ ទ្រព្យកម្មសិទ្ធិដីធ្លី ដល់មន្រ្តីក្រសួងរៀបចំដែនដី នគរូបណីយកម្មនិងសំណង់ និងក្រសួងយុត្តិធម៌ ដើម្បីកាត់បន្ថយវិវាទដណ្តើមការគ្រប់គ្រងកម្មសិទ្ធិដីធ្លីទៅវិញទៅមក។
លោក លឹម វន្ត័ រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់បានផ្តោតក្តីសង្ឃឹមថា នៅពេលខាងមុខវិវាទដណ្តើមកម្មសិទ្ធិដីធ្លីនិងត្រូវបានកាត់បន្ថយ បន្ទាប់ពីរាជរដ្ឋាភិបាលកម្ពុជាបានបង្កើតឲ្យមានបែបបទថ្មីក្នុងការចុះបញ្ជីដីធ្លីដោយយោងតាមច្បាប់រដ្ឋប្បវេណី។
លោករដ្ឋលេខាធិការ បានបញ្ជាក់ថា អ្វីដែលសំខាន់បំផុតគឺបានធានាការពារសិទ្ធិជាម្ចាស់ស្របតាមច្បាប់ ប៉ុន្តែប្រសិនបើ ការទិញដូរអចលទ្រព្យនិងការរស់នៅលើដីរបស់ខ្លួនពុំមានការចុះបញ្ជីឲ្យបានត្រឹមត្រូវនោះជួបបញ្ហាប្រឈមច្រើន ហើយឈានទៅដល់មានវិវាទធ្ងន់ធ្ងរទៀតផងនៅពេលខាងមុខ។
លោកបន្ថែមទៀតថា ការចុះបញ្ជីកម្មសិទ្ធិដីធ្លីនេះ បានធ្វើឡើងយោងតាមការកំណត់ទ្រព្យសម្បតិ្តបុគ្គលក្នុងការជួលការផ្ទេរសិទ្ធិ ការបន្តមរតក ដែលជៀសវាងមិនឲ្យមានវិវាទណាមួយកើតឡើង ហើយ បែបបទថ្មីនេះទាមទាធ្វើការស្វែងយល់ឲ្យបានស៊ីជម្រៅព្រោះមានច្រើនមាត្រាហើយជារឿងថ្មី សម្រាប់មន្រ្តីសុរិយោដី និងប្រពន្ធ័តុលាការ។ លោកក៏បានបញ្ជាក់ទៀតថា តាមរយៈនេះក្រសួងនឹងមានផែន ការចុះបញ្ជីដីធ្លីជូនប្រជាពលរដ្ឋឲ្យបានកាន់តែច្រើន តាមលក្ខណៈការចុះបញ្ជីជាប្រពន្ធ័ ព្រោះវាបាន ផ្តល់អត្ថប្រយោជន៍ច្រើន និងចំណាយតិចសម្រាប់ម្ចាស់កម្មសិទ្ធិ។
លោកប៉ែន សុមុន្នី ប្រធានអង្គការស្មគ្រ័ចិត្តដើម្បីសង្គមបានគាំទ្រលើនិតិវិធីថ្មីនេះ ព្រោះវាជាដំណើរការដ៏ល្អឆ្ពោះទៅមុខដែលមានអ្នកពាក់ពន្ធ័ចូលរួមច្រើនទាំងក្រសួងរៀបចំដែនដី និងក្រសួងយុត្តិធម៌ ក្នុងការកំណត់និតិវិធីច្បាស់លាស់នៃម្ចាស់កម្មសិទ្ធិ និងការវាស់វែងដីធ្លី។
សូមបញ្ជាក់ថា តាមផែនការរបស់ក្រសួងរៀបចំដែនដីនគរូបនីយកម្ម និងសំណង់នៅឆ្នាំ២០១៥នឹងធ្វើការចុះបញ្ជីដីធ្លីជូនប្រជាពលរដ្ឋឲ្យបានយ៉ាងតិច៥៨ភាគរយ ហើយនៅឆ្នាំ២០១៨សម្រេចឲ្យបាន៧០%ផ្ទៃដីសរុប។ តែទោះជាយ៉ាងនេះក្តី ជាលទ្ធផលការចុះបញ្ជីដីធ្លីបច្ចុប្បន្នបានចំនួនជាង៣លានក្បាលដី ហើយតាមការប៉ាន់ស្មាននៅសល់ក្បាលជាច្រើនទៀតរហូតដល់ជាង៧ទៅ៨លាន ក្បាលដីទៅតាមការវិវិវត្តន៍នៃសង្គម និងមនុស្ស៕ ដោយ៖ ភីនរ៉ា