ភ្នំពេញ៖ រាជរដ្ឋាភិបាលកម្ពុជា បានរៀបចំនូវគម្រោងស្ថាបនាផ្លូវល្បឿនលឿន ដើម្បីសម្រួលដល់ការធ្វើការចរាចរណ៍ពាណិជ្ជកម្ម និងទេសចរណ៍ផងដែរ ព្រោះថា ការតភ្ជាប់បណ្តាញផ្លូវដឹកជញ្ជូនផ្ទៃក្នុងទូទាំងប្រទេសនេះ គឺជាកត្តាសំខាន់មួយលើការកាត់បន្ថយភាពស្ថិតនៅដាច់ស្រយាលរបស់សហគមន៍ និងចូលរួមក្នុងការអភិវឌ្ឍន៍សេដ្ឋកិច្ច និងសង្គមកិច្ច។
នេះជាការលើកឡើងរបស់លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឱ្យដឹងនៅថ្ងៃទី៨ ខែមករា ឆ្នាំ២០១៤ នេះ នៅសណ្ឋាគារ សាន់វេ ក្នុងសិក្ខាសាលាមួយ«ស្តីពីផែនការមេសាងសង់ផ្លូវល្បឿងលឿន នៅព្រះរាជាណាចក្រកម្ពុជា» ដោយមានការសហការជាមួយវិទ្យាស្ថានផែនការសិក្សាគម្រោងប្លង់គមនាគមន៍ ខេត្តហឺណាន ប្រទេសចិន។
លោករដ្ឋមន្ត្រីក្រសួងសាធារណការ និងដឹកជញ្ជូនរូបនេះ បានបន្តថា ការសាងសង់ និងអភិវឌ្ឍន៍ផ្លូវល្បឿនលឿននេះ អាចត្រូវចាប់ផ្តើមនៅឆ្នាំ២០២០ ខាងមុខ ដោយសាងសង់ដំបូងលើចម្ងាយផ្លូវ ៣០០គីឡូម៉ែត្រ ក្នុងនោះផ្លូវពីភ្នំពេញទៅខេត្តព្រះសីហនុ ដែលមានចម្ងាយ២០០គីឡូម៉ែត្រ នឹងត្រូវចាប់ផ្តើមមុខគេ ហើយផ្លូវដែលសាងសង់នោះគឺជាផ្លូវថ្មី មិនមែនផ្លូវជាតិលេខ៤នោះទេ។ លើសពីនេះនៅសល់ ១០០គីឡូម៉ែត្រទៀត រាជរដ្ឋាភិបាលនឹងពិចារណាផ្លូវអាទិភាពផ្សេងទៀត។
លោកត្រាំ អ៊ីវតឹក បន្ថែមថា «ផ្លូវល្បឿនលឿនវាមានសារៈសំខាន់ណាស់ គឺផ្លូវដែលយើងគ្រោងធ្វើ២គន្លងទៅ ២គន្លងមក និងមានសួនច្បារកណ្តាល។ ផលប្រយោជន៍នៃផ្លូវនេះ គឺអាចដឹកជញ្ជូនបានច្រើនលឿនមានសុវត្ថិភាពរួមទាំងជួយដល់បរិស្ថានទៀតផង និងម្យ៉ាងទៀតវាជួយក្នុងការអភិវឌ្ឍន៍សេដ្ឋកិច្ច ពិសេសខាងវិស័យឧស្សាហកម្ម។ ឥឡូវនេះ វិទ្យាស្ថានផែនការ សិក្សាគម្រោងប្លង់គមនាគមន៍ ខេត្តហឺណាន គេជួយដល់យើងពីផែនការមេក្នុងការសាងសង់ផ្លូវល្បឿនលឿននេះ ដែលជាត្រីវិស័យរបស់យើង»។
លោកបញ្ជាក់ទៀតថា «រាជរដ្ឋាភិបាលរបស់យើង អត់មានជាថវិកាដើម្បីធ្វើវានោះទេ ប៉ុន្តែយើងទាក់ទាញអ្នកវិនិយោគ ឲ្យគេមកវិនិយោគ អីចឹងគេអាចថាយកទុនគេមកវិនិយោគទៅហើយបន្ទាប់មកគេយកលុយថ្លៃឆ្លងកាត។ យើងចង់ឲ្យក្រុមហ៊ុនចិន មកវិនិយោគលើការសាងសង់ផ្លូវល្បឿនលឿននៅកម្ពុជានេះ»។
នាយករងវិទ្យាស្ថានផែនការសិក្សាគម្រោងប្លង់ លោក ទូ ថានជីង ផ្លូវល្បឿនលឿនបានមានប្រាប់ឱ្យដឹងដែរថា រយៈពេល១០ឆ្នាំចុងក្រោយនេះ សេដ្ឋកិច្ចប្រទេសកម្ពុជាមានសន្ទុះអភិវឌ្ឍន៍យ៉ាងលឿន ទាំងវិស័យពាណិជ្ជកម្ម ឧស្សាហកម្មមានការរីកចម្រើនជាលំដាប់ ជាពិសេសចំនួនយានយន្តក៏កើនឡើងយ៉ាងខ្លាំង តម្រូវការផ្លូវគមនាគមន៍កាន់តែធំទូលាយ និងជាពេលដលត្រូវគិតពីបញ្ហាដឹកជញ្ជូន។
លោក ទូ ថានជីង បន្តថា រាជរដ្ឋាភិបាលកម្ពុជាមានចក្ខុវិស័យវែងឆ្ងាយ និងចាប់យកឱកាសដើម្បីធ្វើការសិក្សាផែនការមេ លើការអភិវឌ្ឍន៍ផ្លូវល្បឿនលឿនដោយចាំបាច់ និងទាន់ពេលវេលា។ ការងារសាងសងផ្លូវល្បឿនលឿននៅកម្ពុជា គឺកាតព្វកិច្ចសំខាន់មួយក្នុងអំឡុងពេល១០ឆ្នាំខាងមុខ មួយវិញទៀត ការកសាងសង់ផ្លូវនេះជាកត្តាជំរុញដល់សេដ្ឋកិច្ច ក៏ដូចជាសង្គមឲ្យកាន់តែអភិវឌ្ឍន៍ឈានឡើង ហើយធានាបាននូវសន្តិសុខជាតិ និងបង្កើនការទំនាក់ទំនងល្អជាមួយប្រទេសជិតខាង។
សូមបញ្ជាក់ដែរថា មកដលពេលនេះមានក្រុមហ៊ុនចិនចំនួន៣ រួចមកហើយ ដែលស្នើសុំការសាងសង់ផ្លូវល្បឿនលឿននៅប្រទេសកម្ពុជា រីឯក្រសួងសាធារណការ និងនិងដឹកជញ្ជូន កំពុងតែពិភាក្សាការងារឲ្យបានច្បាស់លាស់ជាមួយក្រុមហ៊ុនទាំងនោះជាមុនសិន។ គម្រោងសិក្សាផែនការមេផ្លូវដែកល្បឿនលឿនដែរនេះ គឺបានចាប់ផ្តើមពីខែមីនា ឆ្នាំ២០១៣ បញ្ចប់នៅខែ មេសា ឆ្នាំ២០១៤។ ចំពោះកិច្ចដំណើរការនៃការសាងសង់ផ្លូវដែកនេះអាស្រ័យលើស្ថានភាពជាក់ស្តែងរបស់កម្ពុជា។ ការសាងសង់ផ្លូវដែកល្បឿន១២០គីឡូម៉ែត្រក្នុងមួយម៉ោងនៅកម្ពុជា នឹងធ្វើឡើងនៅពេលដ៏ខ្លីខាងមុខ៕ ភីនរ៉ា