ភ្នំពេញ៖ បណ្តាញសារពត៌មានមានតួនាទីសំខាន់ណាស់ចំពោះបញ្ហាចរាចរនៅកម្ពុជា ក្នុងការផ្តល់ដំណឹងទាន់
ហេតុការណ៍ ដែលអាចឲ្យស្ថាប័នពាក់ព័ន្ធធ្វើអន្តរាគមន៍ និងជូនដំណឹងដល់គ្រួសាររងគ្រោះបានដឹង។
នេះបើតាមប្រសាសន៍ផ្តាំផ្ញើរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅក្នុងឱកាសបើកសិក្ខាសាលា
ស្តីពីការនិពន្ធអត្ថបទសាព័ត៌មានទាក់ទងនឹងសុវត្ថភាពចរាចរណ៍ផ្លូវគោក ព្រឹកថ្ងៃទី២៧ ខែមិនា ឆ្នាំ២០១៣
នៅសណ្ឋាគារសាន់វ៉េ។
ក្នុងសិក្ខានោះលោករដ្ឋមន្ត្រីបានបញ្ជាក់ថា ដូចអ្វីដែលលោក ស្ទីអ៊ីឌីង តំណាងអង្គការសុខភាពពិភពលោក
បានលើកឡើង គឺថាគ្រោះថ្នាក់ចរាចរណ៍ បានក្លាយជាបញ្ហាដ៏គួរឲ្យព្រួយបារម្មណ៍ណាស់ នៅពេលដែលធ្វើ
ដំណើរនៅលើផ្លូវជារៀងរាល់ថ្ងៃ។ សោកនាដកម្ម នៃគ្រោះថ្នាក់ចរាចរណ៍ ដែលបានកើតឡើងប៉ុនា្មនសប្តាហ៍
កន្លងទៅនេះ បានធ្វើឲ្យកក្រើកអស់បណ្តាញសារព័ត៌មានជាតិ និងអន្តរជាតិ ដូចជានៅក្នុងបណ្តាញសង្គម
ហ្វេសប៊ុកជាដើម។ទាំងអស់នេះឆ្លុះបញ្ចាំងយ៉ាងច្បាស់ពីតួនាទីដ៏មានសារៈសំខាន់របស់អ្នកសារព័ត៌មាន
ដែលបានផ្តល់ដំណឹង ទាន់ហេតុការដើម្បីអាចឲ្យស្ថាប័នពាក់ព័ន្ធ ធ្វើអន្តរគមន៍ និងជូនដំណឹងដល់ក្រុម
គ្រួសារជនរងគ្រោះឲ្យបានដឹង។
បន្ថែមពីនេះទៀត បណ្តាញសារព័ត៌មាន មានតួនាទីផ្សព្វផ្សាយអប់រំ ប្រជាជនអំពីការគោរពច្បាប់ចរាចរណ៍
ដើម្បីឲ្យពួកគាត់បានដឹងថាអ្វីដែលត្រូវធ្វើ និងអ្វីមិនត្រូវធ្វើ ដើម្បីឲ្យការធ្វើដំណើររបស់គាត់ ក៏ដូចជាអ្នកប្រើ
ប្រាស់ផ្លូវ គ្រប់រូបធ្វើដំណើរប្រកបដោយសុវត្ថភាពចៀសវាងបាននូវគ្រោះថ្នាក់ និងផាកពិន័យ។
ទន្ទឹមនឹងនេះការសរសេរអត្ថបទ និងការផ្សាយព័ត៌មានត្រូវមានគុណភាព ដើម្បីទទួលបាននូវចំណាប់អារម្មណ៍
របស់អ្នកអាន អ្នកទស្សនា មានន័យថាព័ត៌មានដែលបានរាយការណ៍ត្រូវមានប្រភពច្បាស់លាស់អាចយកជា
ការបាន ហើយត្រូវមានការវិភាគស៊ីជំរៅ ជាពិសេសទាក់ទងទៅនឹងក្របខ័ណ្ខច្បាប់ចរាចរណ៍ ផល់ប៉ះពាល
ដល់សេដ្ឋកិច្ចសង្គមជាតិ ក៏ដូចជាសហគមន៍ និងបុគ្គលផ្ទាល់។
ចំណុចសំខាន់មួយទៀតដែលត្រូវលើកឡើងសិទ្ធិសេរីភាពសារព័ត៌មាននៅក្នុងប្រទេសយើង គឺមានភាពទូលំ
ទូលាយ ល្អប្រសើរណាស់ ក្នុងការបញ្ចេញមតិយោបល់ ប៉ុន្តែទោះជាយ៉ាងណាដ៏ដោយ បណ្តាសារព័ត៌មាន
ទាំងអស់ក៍ត្រូវគោរពច្បាប់សារព័ត៌មានដែរ ក្នុងគោលបំណងលើកកំពស់វិជ្ជាជីវរបស់ខ្លួន។
លោក ត្រាំ អ៊ីវទឹក រដ្ឋមន្ត្រីក្រសួងសាធារណការ និងដឹកជញ្ជូនមានប្រសាសន៍ថា គ្រោះថ្នាក់ចរាចរណ៍បាន
ក្លាយជាបញ្ហាក្តៅគគុក ចំពោះប្រទេសកម្ពុជានាពេលបច្ចុប្បន្ន ដែលត្រូវបណ្តាញសារព័ត៌មានផ្សព្វផ្សាយ
នៅលើទំព័រមុខជារៀងរាល់ថ្ងៃ។ ជាក់ស្តែងយោងតាមបណ្តាសារព័ត៌មានប្រចាំឆ្នាំ២០១១ របស់ប្រព័ន្ធព័ត៌
មាន ជនរងគ្រោះ និងគ្រោះថ្នាក់ចរាចរណ៍ផ្លូវគោកនៅកម្ពុជាបានឲ្យដឹងថា មានជនរងគ្រោះសរុប ដល់ទៅ
ចំនួន១៦.៦៥៤នាក់ ដែលក្នុងនោះបាត់បង់ជីវិតដល់ទៅ ១.៩០៥នាក់ និងរងរបួសធ្ងន់៥.៨០៧នាក់ គិតជា
មធ្យមចំនួនអ្នកស្លាប់ជាង ៥នាក់ និងរបួសធ្ងន់១៦នាក់ ក្នុងមួយថ្ងៃ។
លោករដ្ឋមន្ត្រីបានបង្ហាញថា គ្រោះថ្នាក់ចរាចរណ៍ បានធ្វើឲ្យកម្ពុជាខាតបង់សេដ្ឋកិច្ចជាតិរហូតដល់ទៅ
៣១០លានដុល្លារអាមេរិក ក្នុងឆ្នាំ២០១១។ ការខាត់បង់នេះ វាជាចំនួនដ៏ធំធេងហួសពីការស្មាន ដែលយើង
បានខាតបង់ ក្នុងពេលដែលរដ្ឋាភិបាល និងប្រជាជនកំពុងតែតស៊ូរើបម្រះ ដើម្បីកាត់បន្ថយភាពក្រីក្រ។
ប៉ុន្តែជាការគួរឲ្យសោកស្តាយដោយសារទឹកប្រាក់ជាង ៣០០លានដុល្លារ បានត្រូវខាតបង់ទៅក្នុងអ្វីដែល
យើងទាំងអស់គ្នាអាចចូលរួមកាត់បន្ថយបាន។
បន្ថែមពីលើនេះ យោងតាមរបាយការណ៍ គ្រោះថ្នាក់ចរាចរណ៍ប្រចាំឆ្នាំ២០១១ ដដែលឃើញថា ៩៥ភាគ
រយ នៃគ្រោះថ្នាក់ចរាចរណ៍ដែលបានកើតឡើង គឺបង្កដោយកត្តាមនុស្ស ហើយការបើកបរក្រោមឥទ្ធពល
គ្រឿងស្រវឹង គឺជាកត្តាគ្រោះថ្នាក់ចំបងទីពីរបន្ទាប់ពីការបើកបរហួសល្បឿនកំណត់ ដែលបានបង្ករឲ្យមាន
ការស្លាប់១៤ភាគរយ។ ប្រមាណ៦៦ភាគរយនៃអ្នកស្លាប់ដោយសារការបើកបរក្រោមឥទ្ធពលក្រោមគ្រឿង
ស្រវឹង មានអាយុពី១៥ទៅ៣៤ឆ្នាំ។គ្រោះថ្នាក់ចរាចរណ៍បណ្តាលមកពីការបើកបរក្រោមឥទ្ធិពលគ្រឿង
ស្រវឹងបណ្តាលអោយខាតបង់សេដ្ឋកិច្ចជាតិ ប្រមាណ៤៤លានដុល្លារអាមេរិក៕
ដោយ៖ ស.ស្អាត