ភ្នំពេញ៖ តារាចម្រៀងស្រីល្បីឈ្មោះមានភាពលេចធ្លោ កញ្ញា ឱក សុគន្ធកញ្ញា កន្លងមកធ្លាប់តែបដិសេធ មិនចង់គិតពីរឿងស្នេហាទាល់តែសោះ ស្រាប់តែពេលនេះ នាងបានសម្រេចទម្លាយអាថ៌កំបាំងក្នុងបេះដូង ដោយបង្ហើបឲ្យដឹងជាសាធារណៈ នៅក្នុងរដូវរងាឆ្នាំនេះថា នាងមានអារម្មណ៍រងា និងចង់បានគូគ្រងឆាប់ៗនឹងគេដែរ ។
កាលពីថ្ងៃ២៥ ខែធ្នូ កន្លងទៅថ្មីៗនេះ នៅក្នុងឱកាសបុណ្យណូអែល កន្លងទៅនេះ តារាចម្រៀងរបស់ផលិតកម្មហង្សមាស កញ្ញា ឱក សុគន្ធកញ្ញា បានព្រលយមាត់និយាយ ដោយបើកចំហនៅលើឆាក ខនសឺត ក្នុងកម្មវិធី “Christmas Party” ដែលឧបត្ថម្ភដោយស្រាបៀរ កម្ពុជា នៅមជ្ឈមណ្ឌល កោះពេជ្រ ខណៈដែលទស្សនិកជនសំណូមពរឲ្យនាង បកស្រាយបទចម្រៀងមួយឃ្លាបន្ថែមទៀតនោះ នាងបានទទួលតាមសំណូមពរ ហើយក៏បានលើកយកបទចម្រៀងមួយដែលមានចំណងជើងថា “ឆ្នាំអូន ៣១ហើយ” មកបកស្រាយតម្រូវចិត្តទស្សនិកជន និងអ្នកគាំទ្រ។ស្ថិតនៅក្នុងបរិយាសកាសសប្បាយរីករាយ និងសម្លេងហ៊ោកញ្ជ្រៀវខ្លាំងៗ ធ្វើឲ្យអារម្មណ៍ និងទឹកមុខរបស់នាង ញញឹមបិទមាត់មិនជិត។ នាងបាននិយាយពាក្យមួយឃ្លាធ្វើឲ្យគេមានការចាប់អារម្មណ៍ និងធ្វើឲ្យបុរសៗ ដែលលង់ស្រឡាញ់នាងជាច្រើន ហាក់មានក្ដីសង្ឃឹម “ ថ្ងៃនេះរៀងរងា មិនសូវរមាស់ខ្នងទេ តែចង់បានប្តីវិញ ខ្ញុំចង់បានប្តី ធ្វើម៉េចទៅ..? ” ។
នេះជាលើកទី១ហើយដែល កញ្ញា ឱក សុគន្ធកញ្ញា ប្រកាសជាសាធារណៈថា នាងចង់បានគូគ្រងបេះដូងបែបនេះ ហើយក៏ជាសញ្ញាវិជ្ជមានមួយសម្រាប់បុរសៗដែលស្រឡាញ់ប្រាថ្នាចង់ក្លាយជាម្ចាស់បេះដូង។យើងនៅមិនទាន់ដឹងនៅឡើយទេថា តើបុរសម្នាក់ណា ដែលមានសំណាងអាចគ្រងបេះដូង និងដឹកដៃតារាចម្រៀងរូបនេះចូលរោងការតាមប្រពៃណី បានសម្រេចនោះទេ ខណៈដែលកន្លងមក ឱក សុគន្ធកញ្ញា ធ្លាប់ត្រូវបានបណ្ដាញសារព័ត៌មានក្នុងស្រុកចុះផ្សាយជាហូរហែថា នាងមានទំនាក់ទំនងស្នេហាជាមួយតន្រ្តីករ រ៉េតធី ដូណា ជាច្រើនឆ្នាំមកហើយប៉ុន្តែនាងមិនដែលទទួលស្គាល់ការពិតពីចំណងស្នេហ៍ក្នុងស្ថានភាពជាអ្នកសិល្បៈដូចគ្នានេះឡើយ៕ ដោយ៖ ភីនរ៉ា