ភ្នំពេញ៖សហព័ន្ធសហជីពកម្មករកម្ពុជា(CLUF)បានជួបប្រជុំជាមួយមេសហជីពមូលដ្ឋានតាមបណ្តារោងចក្រកាត់ ដេរនិងស្បែកជើង ចំនួន១២៥នាក់ កាលពីថ្ងៃព្រហស្បត្តិ ធ្នូ នេះដើម្បីផ្សព្វផ្សាយសេចក្តីជូនដំណឹងរបស់ក្រសួងការ ងារស្តីពីការដំឡើងប្រាក់ឈ្នួលអប្បបរមាដល់កម្មករពី៩៥ដុល្លារដល់១៦០ដុល្លារក្នុងរយៈពេល៥ឆ្នាំគិតចាប់ពីឆ្នាំ២០១៤ដល់ឆ្នាំ២០១៨ ក្នុងគោលបំណងទប់ទល់នឹងការញុះញង់ពីសហជីពមួយចំនួនតូចដែលនាំគ្នារុញទ្វាររោង
ចក្រឲ្យរលំហើយបង្ខំកម្មករធ្វើបាតុកម្ម។
.jpg)
ប្រធានសហព័ន្ធសហជីពកម្មករកម្ពុជាលោក សោម អូន បាននិយាយថា គោលបំណងនៃការប្រជុំបន្ទាន់ជាមួយមេ ដឹកនាំសហជីពមូលដ្ឋាននៅថ្ងៃនេះ មាន៥ចំណុច ទី១-ផ្សព្វផ្សាយសេចក្តីជូនដំណឹងរបស់ក្រសួងការងារស្តីពីលទ្ធ ផលប្រជុំដំឡើងប្រាក់ឈ្មួលអប្បបរមាដល់កម្មការិនីរោងចក្រកាត់ដេរ និង ស្បែកជើងពី៩៥ដុល្លារដល់១៦០ដុល្លារ ក្នុងរយៈពេល៥ឆ្នាំ គិតពីឆ្នាំ២០១៤ដល់ឆ្នាំ២០១៨ ។ ទី២-យោងតាមសេចក្តីរាយការណ៍របស់សហជីពមូលដ្ឋានបានឲ្យដឹងថា មានសហជីពខិលខូចមួយចំនួនបានអុកឡុកតាមរោងចក្រ ដោយមានសកម្មជនគណបក្សចូលរួមរុញទ្វាររោងចក្រឲ្យរលំ ហើយបង្ខំកម្មករឲ្យចេញធ្វើបាតុកម្មទាមទារដំឡើងប្រាក់ខែ១៦០ដុល្លារ ដោយរំខានដល់កម្មករភាគច្រើនកំពុងធ្វើការ ក្នុងនោះមានរោងចក្រមួយចំនួនបានអនុញ្ញាតឲ្យកម្មករឈប់សម្រាកដោយរក្សា ប្រាក់ឈ្មួល។ទី៣-សូមអំពាវនាវដល់សហជីពមួយចំនួនតូចត្រូវបញ្ឈប់ការចាប់បង្ខំកម្មករឲ្យធ្វើបាតុកម្មខុសច្បាប់និងបញ្ឈប់ជា បន្ទាន់ការវាយរំលំទ្វាររោងចក្រ។ទី៤- សូមអំពាវនាវដល់កម្មករកម្មការិនីទាំងអស់រក្សាភាពស្ងប់ស្ងាត់ហើយធ្វើការទាមទារលក្ខខណ្ឌការងារដោយសន្តិវិធី កុំប្រើអំពើហិង្សា ដែលធ្វើឲ្យប៉ះពាល់ធ្ងន់ធ្ងរដល់បរិយាកាសវិនិយោគឈានទៅដល់បាត់បង់ការងារធ្វើ។ទី៥- សូមអំពាវនាវដល់អ្នកនយោបាយខ្មែរត្រូវគិតគូរផលប្រយោជន៍ជាតិជាធំជាងផលប្រយោជន៍បុគ្គលហើយត្រូវបម្រើឆន្ទៈរាស្ត្រ។ ត្រូវរួបរួមគ្នារក្សាសុខសន្តិភាព ស្ថេរភាពសង្គម ការអភិវឌ្ឍន៍និងការរស់នៅដោយសុខក្សេមក្សាន្ត។
ប្រធាន CLUF រូបនេះបន្តថា មេដឹកនាំសហជីពមូលដ្ឋានទាំងអស់បន្ទាប់ពីទទួលបានឯកសារនេះ ត្រូវយកទៅផ្សព្វ ផ្សាយដល់កម្មករដែលជាសមាជិកបានយល់ជ្រួតជ្រាប ក្នុងគោលបំណងកាត់បន្ថយការចូលរួមធ្វើបាតុកម្មខុសច្បាប់ ។បើតាមរបាយការណ៍របស់សមត្ថកិច្ច មានរោងចក្រប្រមាណជាង១០០ នៅរាជធានីភ្នំពេញ និងខេត្តកណ្តាលបានត្រូវផ្អាកការងារបណ្តោះអាសន្ន នៅថ្ងៃទី២៦ធ្នូនេះ ដោយសារតែមានការញុះញង់ពីមេដឹកនាំគណបក្សប្រឆាំងនិង សហជីពរបស់លោករ៉ុង ឈុន (ដែលក្រសួងការងារបដិសេធថា ពុំមានបញ្ជីការតាមច្បាប់) ទាមទារដំឡើងប្រាក់ខែ១៦០ដុល្លារ។ ក្នុងនោះកម្មករមួយចំនួនបានដង្ហែក្បួនទៅមុខក្រសួងការងារ និង ទីលានប្រជាធិបតេយ្យហើយភាគ ច្រើនកម្មករសម្រាកនៅតាមផ្ទះជាមួយគ្នានេះ ក៏មានកម្មករនៅតាមបណ្តាខេត្តមួយចំនួននាំគ្នាសម្រាកមិនទៅធ្វើការដែរ ព្រោះជាបញ្ជារបស់មេសហជីពមួយចំនួននៅតាម រោងចក្រ៕ ដោយ៖ សស្អាត