ភ្នំពេញ៖ ឯកអគ្គរដ្ឋទូតគុយវ៉ែត ប្រចាំព្រះរាជាណាចក្រកម្ពុជា បានសម្តែងនូវការអបអរសាទរចំពោះលទ្ធផលបោះឆ្នោត ដែលគណបក្សប្រជាជនកម្ពុជាទទួលបានជ័យជំនៈលើការបោះឆ្នោតជ្រើសតាំងតំណាងរាស្រ្តនិតិការទី៥នេះ និងគាំទ្រចំពោះការប្រកាន់ខ្ជាប់នូវលិទ្ធិប្រជាធិបតេយ្យក្នុងការអនុវត្តច្បាប់នានា។
នៅក្នុងជំនួបពិភាក្សាមួយរវាងលោក ប៉ា សុជាតិវង្ស អភិបាលរាជធានីភ្នំពេញ និងលោក DHERAR NASER AL . TUWAIRI ឯកអគ្គរដ្ឋទូតគុយវ៉ែត ប្រចាំកម្ពុជា នាព្រឹកថ្ងៃទី០៤ ខែ កញ្ញា ម្សិលមិញនេះនៅសាលារាជធានីភ្នំពេញ លោកឯកអគ្គរដ្ឋទូតគុតវ៉ែត បានមានប្រសាសន៍ថា ជាការពិតប្រទេសណាក៏ដូចជាប្រទេសណាដែរ ឲ្យតែជាប្រទេសកាន់លិទ្ធិប្រជាធិបតេយ្យ ជៀសមិនផុតពីការជួបប្រទះនូវបញ្ហាវិវាទផ្នែកនយោបាយខ្លះនៅក្រោយការបោះឆ្នោតនោះទេ។ ប៉ុន្តែការខ្វែងគំនិតគ្នាយ៉ាងណានោះ វានឹងឈានទៅស្រុះស្រួលគ្នានៅពេលដែលមានការដោះស្រាយដោយសន្តិវិធី។
ប៉ុន្តែកម្ពុជាគណបក្សប្រឆាំងនៅតែប្រកាន់ជំហរធ្វើមហាបាតុកម្មដ៏ធំមួយ នៅថ្ងៃទៅ៧ កញ្ញាខាងមុខនេះ លោក DHERAR NASER AL . TUWAIRIបានសម្តែងនូវការព្រួយបារម្មណ៍ចំពោះមហាបាតុកម្មនេះ ថាតើអាជ្ញាធរមានវិធីអីសម្រាប់ទប់ទល់ជាមួយមហាបាតុកម្មនោះ ព្រោះថាមិនមែនតែរូបលោកទេ មានស្ថានទូតដទៃទៀតក៏មានការព្រួយបារម្មខ្លាំងណាស់ដែរចំពោះបញ្ហាសន្តិសុខ សុវត្ថិភាព ជាមួយគ្នានេះប្រជាពលរដ្ឋម្ចាស់ឆ្នោត ក៏មានការព្រួយបារម្មណ៍ដូចគ្នានេះដែរ។
ជាការឆ្លើយតបលោក ប៉ា សុជាតិវង្ស បានជម្រាបជូនថា រាល់សកម្មភាពរបស់ស្ថាប័នជាតិ ( គ ជ ប ) ត្រូវរងការដៀលត្មិះពីក្រុមបក្សប្រឆាំង ក្នុងនោះក៏មានការជំរុញឲ្យមានការរើសអើងពូជសាសន៍ពីក្រុមជនមួយចំនួនដែលគាំទ្របក្សប្រឆាំង។ បើទោះជាស្ថាប័នមួយនេះបានខិតខំដោះស្រាយបញ្ហាទាំងឡាយរបស់បក្សប្រឆាំង តាមនិតិវិធីច្បាប់ក៏ដោយក៏ស្ថាប័ន ( គ ជ ប )នៅតែមិនទទួលបានការពេញចិត្តពីបក្សប្រឆាំងនោះដែរ។
លោក អភិបាលបានជម្រាបជូនទៀតថា ការស្នើសុំបង្កើតគណៈកម្មការឯករាជ្យរបស់គណបក្សប្រឆាំងនោះ បានក្លាយទៅជាកូនជញ្ជីងនៃការតថ្លៃអំណាចរបស់បក្សប្រឆាំង។ បើមិនបានតាមការទាមទារទេនោះ គឺពួកគាត់ប្រកាសធ្វើមហាបាតុកម្ម។
ជាមួយគ្នានេះ លោក ប៉ា សុជាតិវង្ស បានសុំឲ្យ អង្គទូត ស្ថានទូត ប្រចាំព្រះរាជាណាចក្រកម្ពុជា កុំឲ្យមានការព្រួយបារម្មខ្លាំងពេកអំពីបញ្ហានេះ ពីព្រោះកម្ពុជាជាប្រទេសមួយ ដែលមានច្បាប់ទម្លាប់ត្រឹមត្រូវ គ្រាន់តែថាអ្នកបង្ករបញ្ហាគេមិនបានគោរពច្បាប់តែប៉ុណ្ណោះ តែទោះជាយ៉ាងណាក៏ដោយ អាជ្ញាធរនឹងខិតខំបញ្ជៀសឲ្យបាននូវអំពើហិង្សាក្នុងកំរិតខ្ពស់បំផុតតាមតែអាចធ្វើទៅបាន ៕
ដោយ៖ សស្អាត