ភ្នំពេញ៖ ក្រសួងកិច្ចការនារី បានរៀបចំនូវផែនការយុទ្ធសាស្ត្រនារីរតនៈទី៤ លើការបង្ហាញពីចក្ខុវិស័យរបស់ខ្លួន រយៈពេល៥ឆ្នាំខាងមុខ ដើម្បីឈានទៅពង្រីកតួនាទីរបស់ក្រសួងការងារ ក្នុងអនវត្តន៍ការងារអភិក្រមដោយផ្អែកលើទូទាំងកម្មវិធី និងដើរតួនាទីជាអ្នកលើកកម្ពស់គនេយ្យភាពសង្គមសម្រាប់ស្ត្រី និងផ្តោត លើការផ្តល់សេវាប្រឹក្សាផ្នែកគោលនយោបាយកម្រិតខ្ពស់។
លោកស្រី ឃឹម ចំរើន បានមានប្រសាសន៍ក្នុងសិក្ខាសាលាពិគ្រោះយោបល់មួយលើសេចក្តីព្រាងផែនការយុទ្ធសាស្ត្រនារីរតនៈទី៤ កាលពីព្រឹកថ្ងៃទី ២៥ ធ្នូ នេះ នៅសណ្ឋាគារសាន់វេ។ថា តួនាទីរបស់ក្រសួងពាក់ព័ន្ធក្រៅពីក្រុមការងារយេនឌ័រ គឺពិភាក្សានិងអនុម័តអនុសាសន៍យេនឌ័រទៅតាម វិស័យដែលផ្តល់ក្រុមការងារយេនឌ័ន និងក្រសួងកិច្ចការនារី និងធានាថាទស្សនទានយេនឌ័រត្រូវបានបញ្ចូលយ៉ាងពេញលេញទៅក្នុងដំណើរការរៀបចំផែនការទាំងមូល។
លោកស្រីរដ្ឋលេខាធិការក្រសួងកិច្ចការនារីរូបនេះ បានបន្ថែមទៀតថា យន្តការនិងការរៀបចំស្ថាប័នធានាថា គោលនយោបាយយេនឌ័រត្រូវបានអនុវត្តតាមរយៈផែនការយុទ្ធសាស្ត្រ អភិវឌ្ឍន៍ជាតិ និងការត្រួតពិនិត្យលើសូចនាករយេនឌ័រ។ ជំរុញពិនិត្យនិងដាក់បញ្ចូលធាតុចូលរបស់ទីភ្នាក់ងារទាំងអស់ទៅក្នុងផែនការយុទ្ធសាស្ត្រអភិវឌ្ឍន៍ជាតិ និងត្រួតពិនិត្យរបាយការណ៍ដើម្បីបញ្ចូលបញ្ហាយេនឌ័រ។
ផែនការនារីរតនៈទី៤ ក៏នឹងបញ្ចូលទស្សនវិស័យថ្នាក់អនុតំបន់ ដោយផ្អែកលើការវិភាគយេនឌ័រតាមវិស័យដែលបែងចែកតាមអនុតំបន់ ដើម្បីស្វែងយល់កាន់តែល្អប្រសើរពីតំបន់ដែលមានការខ្វះខាតច្រើនជាងគេ ក្នុងប្រទេស និងដោះស្រាយបញ្ហាដល់ក្រុមទាំងនោះដោយប្រើប្រាស់វិធីសាស្ត្រសមស្រប។ លើសពីនេះ ផែនការយុទ្ធសាស្ត្រនឹងយកចិត្តទុកដាក់ជាពិសេសដល់ក្រុមងាយរងគ្រោះដូចជា៖ គ្រួសារដែលមានស្ត្រីជាមេគ្រួសារ ជនពិការ ចាស់ជរា ជាដើម។
សូមបញ្ជាក់ថា កិច្ចការផែនការរយៈពេល៥ឆ្នាំនេះ តម្រូវឲ្យក្រសួងកិច្ចការនារីសម្របសម្រួលរួមមានកសាងសមត្ថភាព និងពិគ្រោះយោបល់ជាមួយក្រសួងពាក់ព័ន្ធតាមវិស័យដើម្បីបញ្ជ្រាបយេនឌ័រក្នុងគោលនយោបាយ និងកម្មវិធីរបស់រាជរដ្ឋាភិបាល តាមរយៈភាពជាដៃគូនិងកិច្ចសន្ទនាជាមួយដៃគូជាច្រើន ការបង្កើនយន្តការជាក្រុមការងារបច្ចេកទេសទូទាំងរដ្ឋាភិបាលជាបន្តបន្ទាប់៕ ដោយ ៖ ភីនរ៉ា