ភ្នំពេញ៖ តំណាងអង្គទូតជប៉ុន ប្រចាំកម្ពុជា បានបញ្ជាក់ថា ប្រទេសជប៉ុន នឹងបញ្ជូនអ្នកជំនា​ញការ បច្ចេកទេស​មក ធ្វើការសិក្សាស្រាវជ្រាវ ដើម្បីធ្វើកំណែទម្រង់ ការរៀបចំការបោះឆ្នោ​តនៅកម្ពុជា ស្របតាមការអំពាវនាវ របស់ប្រមុខ​រដ្ឋាភិបាល។លោក គូម៉ាម៉ារូ យូជិ ឯកអគ្គរាជទូតជប៉ុន ប្រចាំកម្ពុជា ក្នុងជំនួបពិភាក្សាជាមួយ លោកឧបនាយក​រដ្ឋ​មន្ត្រី ស ខេង រដ្ឋមន្ត្រីក្រសួងមហាផ្ទៃ នៅព្រឹកថ្ងៃចន្ទនេះ បានមានប្រសា​សន៍ថា ជប៉ុនមិនមែន ជួយកម្ពុជាតែ ផ្នែក​នយោបាយ សេដ្ឋកិ​ច្ច​​ និងសង្គម ប៉ុ​ណ្ណោះ​ទេ  ប៉ុន្តែ ជប៉ុននឹងជួយ កម្ពុជាក្នុងការធ្វើ កំណែទម្រង់ រដ្ឋផងដែរ។

ឯកអគ្គរាជទូតជប៉ុន បានបញ្ជាក់ថា លោកនឹងសិក្សា ពីពេលវេលាបញ្ជូន អ្នកជំនាញកា​រ​ជប៉ុន មកកម្ពុជាដោយ​ផ្ទាល់ ដើម្បីសិក្សាស្រា​​​​វជ្រាវ ធ្វើកំណែទម្រង់ការបោះឆ្នោតនៅកម្ពុជា ខណៈគណបក្ស ជា​ប់ឆ្នោតពីរ ក្នុងអាណ​ត្តិ
​ទី​៥នេះ កំពុងចម្រូងចម្រាសគ្នា លើលទ្ធផល នៃការបោះឆ្នោត។យ៉ាងណាក៏ដោយ គ្មានការកំណត់ ពេលវេលាជាក់​លាក់ ពីអង្គទូតជប៉ុនរូបនេះឡើយ។ក្នុងដំណើរទស្សនៈកិច្ច របស់ នាយករដ្ឋមន្ត្រីជប៉ុន ស្ស៊ិនស្សូ អាបេ មកកាន់​កម្ពុជា នៅពាក់កណ្តាល ខែវិច្ឆិកានេះ សម្តេចអគ្គមហាសេនាបតីតេជោ ហ៊ុន សែន បានស្នើអោយ​ ជប៉ុន ជួយធ្វើ​កំណែ​​ទម្រង់ ការបោះឆ្នោត ដើម្បីពង្រឹងការជឿ ទុកចិត្តពីប្រជាពលរដ្ឋ។

ក្នុងខែម​ករាដើមឆ្នាំ២០១៤ ខាងមុខ រដ្ឋាភិបាលកម្ពុជា គ្រោងនឹង ធ្វើសិក្ខាសាលាមួយ ដើម្បីអោយ គ្រប់និន្នា​ការ​​​ទាំង​អស់ ​ចូលរួមផ្តល់យោបល់ ក្នុងសិក្ខាសាលានោះ។ លោក ស ខេង បានស្នើអោយ អ្នកជំនាញការជប៉ុន​មាន​វត្តមាន នៅពេលនោះផងដែរ។គិតមកដល់ពេលនេះ ប្រទេសកម្ពុជាបាន រៀបចំការបោះឆ្នោតជាតិ បានជាង៥ខែ​ហើយ ប៉ុន្តែគណបក្សនយោ​បាយ ធំៗពីរ គឺគណបក្សប្រជាជនកម្ពុជា និងគណបក្សសង្រ្គោះជាតិ មិនទាន់ស្រុះស្រួ​ល​គ្នានៅឡើយ។

គណបក្សប្រជាជនកម្ពុជា បានដឹកនាំកិច្ចប្រជុំសភា និងដឹកនាំរដ្ឋាភិបាលជា ជាឯកបក្ស ចំណែកគណបក្សសង្រ្គោះ​ជាតិ នៅតែដឹកនាំបាតុកម្មទាមទារ អោយរៀបចំបោះឆ្នោតឡើងវិញ។ក្នុងកិច្ចពិភាក្សាព្រឹកមិញនេះ ក្រៅពីកិច្ចការ​បោះឆ្នោត ជប៉ុនក៏បានសន្យាថានឹងជួយពង្រឹង ដល់នគរបាលកម្ពុជា លើជំនាញឧក្រិដ្ឋកម្ម ការលាងលុយកក្វក់និង បទល្មើសព្រហ្មទណ្ឌតាមកុំព្យូទ័រជាដើម៕ ដោយ៖ រតនា