ភ្នំពេញ៖ ការចរចាត្រីភាគី ដែលមានតំណាងរដ្ឋាភិបាល តំណាងសហជីព និងតំណាងនិយោជក ដើម្បីដំឡើងប្រាក់ខែអប្បរមា អោយកម្មករ-កម្មការនី មិនទាន់សម្រេច គ្នាជាផ្លូវការទេ។បន្ទាប់ពីកិច្ចពិភាក្សា លើរូបមន្តប្រាំចំណុច និងបទបង្ហាញស្តីពី ប្រាក់ខែនៅក្នុងប្រទេសមួយចំនួន ក្នុងតំបន់អាស៊ីរួចមក។
នៅព្រឹកថ្ងៃចន្ទនេះ លោក អ៊ឹត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានដឹកនាំ ការចរចា បានប្រាប់ក្រុមអ្នកសារព័ត៌មានថា យើងបានរៀបចំរបាយការណ៍សំយោគ ស្តីពីការសិក្សា ស្រាវជ្រាវរឿង តំឡើងប្រាក់ខែ និងរូបមន្តសម្រាប់ តំឡើងប្រាក់ឈ្នួល អស់ហើយ ប៉ុន្តែ នៅសល់រូបមន្តពីរទៀត ដែលសហជីព និងនិយោជកលើកឡើង មិនទាន់បាននិយាយ គ្នាដាច់ស្រេច ចំនួនប្រាក់ខែពិតប្រាកដ ក្នុងការដំឡើង នៅឡើយទេ។លោក អាត់ ធន់ ប្រធានសម្ព័ន្ធ សហជីពប្រជាធិបតេយ្យ កម្មករកាត់ ដេរកម្ពុជា បាននិយាយ ថា កិច្ចពិភាក្សានេះ នឹងត្រូវបញ្ចប់នៅ ថ្ងៃទី២៤ធ្នូខាងមុខ ដើម្បីដាក់ រូបមន្តច្បាស់លាស់មួយ យកមកប្រើ ចាប់ពីឆ្នាំ២០១៤ទៅ។
ជំហខាងលោក អាត់ ធន់ បាន ស្នើអោយ ដំឡើងប្រាក់ខែអប្បរមាចំនួន១៥៤ដុល្លារទើបសមរម្យ ខណៈភាគី រដ្ឋាភិបាលចង់ឡើងជាជំហានៗ ដែលចាប់ពី ពេលនេះដល់ឆ្នាំ២០១៨ ទើបកម្មករទទួល បាន១៦០ដុល្លារ ក្នុងមួយខែ ដោយលើក ហេតុផលថា ដើម្បីកុំអោយ អ្នកវិនិយោគរត់ ចេញពីប្រទេស កម្ពុជា។
គួរបញ្ជាក់ថា តាមរូបមន្ត ចរចាក្នុងថ្ងៃនេះ ភាគីរោងចក្រ និងរដ្ឋាភិបាល គ្រោងនឹងតំឡើង ២០ភាគរយស្មើ១៦ដុល្លារនៃប្រាក់ ខែអប្បរមាបច្ចុប្បន្ន ចំនួន៨០ដុល្លារក្នុងមួយខែ ចាប់ពីឆ្នាំ២០១៣ រហូតដល់ឆ្នាំ២០១៨ ប្រាក់ខែកម្មករនឹងទទួលបាន១៦០ដុល្លារក្នុងមួយខែ ៕ ដោយ ៖ រតនា