ខេត្តបន្ទាយមានជ័យ៖ ក្រោយពីជំនន់ទឹកភ្លៀង និងជំនន់ហូរធ្លាក់ពីប្រទេសថៃយ៉ាងគំហុក បានធ្វើឲ្យស្រុកក្រុងទាំង៩ ក្នុងខេត្តបន្ទាយមានជ័យ ទទួលរងការលិចលង់ ស្ទើរគ្រប់ទីកន្លែង រួមទាំងពលរដ្ឋរស់នៅតាមមាត់អូរព្រំដែនកម្ពុជា-ថៃ និងលំនៅដ្ឋានពលរដ្ឋគ្រប់ស្រុករាប់ពាន់គ្រួសារត្រូវបានជន់លិចដោយគ្រោះទឹកជំនន់។រឺឯសិស្សានុសិស្សជាច្រើននាក់ ត្រូវបានផ្អាកការសិក្សារបស់ខ្លួន ដោយសារសាលាជាច្រើនកន្លែង ត្រូវបិទទ្វារបណ្តោះអាសន្ន ខណៈពេលដែលពន្ធធនាគារខេត្តក៏ត្រូវចាប់ផ្តើមជន់លិចដែរនោះ ។
ប្រធានពន្ធធនាគារខេត្តបន្ទាយមានជ័យលោក ហ៊ិន សុផល បានឲ្យដឹងថា នៅថ្ងៃទី៧ ខែតុលា ឆ្នាំ២០១៣នេះ ពន្ធនាគារខេត្ត ត្រូវបានទឹកជន់លិចកាន់តែខ្លាំងហើយ ដែលការជន់លិចនេះ ត្រូវបានកើតឡើងតាំងពីថ្ងៃទី២៧ ខែកញ្ញា ឆ្នាំ២០១៣ កន្លងទៅ រហូតដល់ថ្ងៃទី៧ ខែតុលានេះ ទឹកមានកម្ពស់ខ្ពស់ជាងមុនពីរដង ។ លោកបានបន្តថា ពន្ធធនាគារខេត្តបន្ទាយមានជ័យ បច្ចុប្បន្នមានអ្នកទោសកំពុងជាប់ឃុំឃាំងចំនួន៨៤២នាក់ ក្នុងនោះមានអ្នកទោសស្រី ១២៤នាក់ និងកុមារ ៦នាក់ផងដែរ ។
លោក ហ៊ិន សុផល បានបញ្ជាក់ថា មកដល់ពេលនេះ កម្លាំងសមត្ថកិច្ច និងអ្នកទោសជាច្រើន កំពុងច្រកដីដាក់ការ៉ុង រៀបឥដ្ឋបិទទំនប់ទឹកជុំវិញពន្ធធនាគារ និងដាក់ម៉ាស៊ីនបូមទឹកចំនួន៤គ្រឿងហើយ ព្រោះទឹកនៅតែជ្រាបចូល ។ បើភ្លៀងនៅតែបន្តធ្លាក់ ទឹកជំនន់នឹងហូរចូលខ្លាំង អ្នកទោសអាចប្រឈមនឹងការលំបាកពេលស្នាក់នៅ ៕ ដោយ៖ អភិរក្ស