ភ្នំពេញ៖ ក្រុមកម្មករ-កម្មការិនី ដែលបម្រើការងារនៅរោងចក្រជីងខូ ដែលមានទីតាំង នៅភូមិព្រៃផ្តៅ សង្កាត់ ព្រៃអង្គុន ក្រុងបាវិត ខេត្តស្វាយរៀង បានធ្វើកូដកម្ម ដើម្បីទាមទារ លក្ខខណ្ឌការងារ ពីថៅកែចំនួន៣ចំណុច ប៉ុន្តែថៅកែមិនឈឺក្បាលវិលមុខដោះស្រាយដល់ពួកគេទេ។
លោក យ៉ាំ ថៃសាន មន្រ្តីសម្ព័ន្ធ សហជីពចលនា កម្មករបានមានប្រសាសន៍ថា ក្រុមកម្មករ-កម្មការិនី បានធ្វើកូដកម្មតាំងពីថ្ងៃទី១២ ខែវិច្ឆិកា ហើយនៅព្រឹកថ្ងៃទី២ ខែធ្នូ ពួកគេនៅតែបន្តធ្វើ កូដកម្មដដែល។មន្រ្តីសម្ព័ន្ធសហជីពចលនារូបនេះបន្តទៀតថា ឆ្លងតាមការដោះស្រាយនាពេលកន្លងមកភាគីទាំងពីរបានដោះស្រាយចំនួន២ចំណុចទី១និងទី២ ចំណែកទី៣វិញ ក្រុមហ៊ុនមានជំហរ រឹងទទឹងមិនធ្វើការសម្របសម្រួលជាមួយ ក្រុមកម្មករឡើយ បើទោះបីជាមានការអន្តរាគមន៍ពីសំណាក់អាជ្ញាធរ ពាក់ព័ន្ធយ៉ាងណាក៏ដោយ។
ប្រភពព័ត៌មានបានឱ្យដឹងថា កាលពីថ្ងៃទី២៧ ខែវិច្ឆិកា ដោយសារតែ ការចរចាមិនត្រូវរ៉ូវគ្នាកម្មករ-កម្មការិនីបានបិទផ្លូវជាតិលេខ១ អស់រយៈពេល២ម៉ោង ទើបបើកផ្លូវឲ្យអ្នកធ្វើដំណើរធ្វើចរាចរណ៍ទៅវិញទៅមក បានធម្មតាក្រោយពីវត្តមានរបស់លោក រស់ ឆាយអភិបាលរងខេត្តស្វាយរៀង ចេញមុខធ្វើការសម្របម្រួល។ ទោះបីជាមានការសម្របសម្រួលយ៉ាងណាក៏ដោយ នៅតែមិនមានលទ្ធផល ដែលអាចទទួលយកបានដដែល។
ប្រភពព័ត៌មានបានបន្តថាលក្ខខណ្ឌទាំងបីចំណុចដែលកម្មករ និងកម្មការិនីទាមទារនោះរួមមាន៖ ចំណុចទី១-សុំឲ្យនាយករោងចក្រ គោរពតាមការសន្យា របស់ខ្លួន គឺធ្វើការនៅថ្ងៃបុណ្យ ត្រូវទូទាត់ប្រាក់ឈ្នួល គុណនឹង ២បូក១។ ចំណុចទី២-ទាមទារឲ្យក្រុមហ៊ុនទូទាត់ សងប្រាក់ថ្ងៃបុណ្យ ដែលក្រុមហ៊ុនមិនបានឲ្យកម្មករវិញ។
និងចំណុចទី៣-សុំឲ្យក្រុមហ៊ុនរក្សាប្រាក់ឈ្នួល និងប្រាក់រង្វាន់ផ្សេងៗ ក្នុងអំឡុងពេលធ្វើកូដកម្ម។កន្លងមកក្រុម កម្មករ កម្មការិនី ទាំងនោះបានប្តេជ្ញាចិត្តថា បើមិនបានដូចបំណងក្នុងការទាមទារទេ ពួកគេមិនឈប់ធ្វើកូដកម្ម ឡើយ។ ដូច្នេះអាជ្ញាធរពាក់ព័ន្ធ ព្រមទាំងម្ចាស់រោងចក្រត្រូវនាំគ្នារកគន្លឹះដោះស្រាយ កុំឱ្យរងើកភ្លើងដ៏តូច១ដុំ នេះក្លាយជាអគ្គិភ័យធំដុំអោយសោះ៕ ដោយ ៖ ភីនរ៉ា