កណ្តាល៖ យោងតាមគេហទំព័ររបស់អគ្គស្នងការនគរបាលជាតិ បានឱ្យដឹងថា កាលពីវេលាយប់ថ្ងៃទី២០ ខែមីនា ឆ្នាំ២០១៤ សមត្ថកិច្ចនគរបាលស្រុកលើកដែកបានធ្វើការឃាត់ខ្លួនជនសង្ស័យ៥នាក់ជាបន្តបន្ទាប់ និងដកហូតបានថ្នាំញៀនប្រភេទម៉ាទឹកកកចំនួន៤កញ្ចប់ នៅចំណុចភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាល បញ្ជូនទៅកាន់អធិការដ្ឋាននគរបាលស្រុកដើម្បីធ្វើការសាកសួរ និងកសាងសំណុំរឿងចាត់ការតាមច្បាប់ ។ បើតាមមន្ត្រីនគរបាលស្រុកលើកដែកបានឲ្យដឹងថា ជនសង្ស័យដែលត្រូវបានចាប់ខ្លួនជាបន្តបន្ទាប់នោះមានគ្នា៥នាក់ ទី១-ឈ្មោះ ហាប ប្រុស ភេទប្រុស អាយុ២២ឆ្នាំ មានទីលំនៅក្នុងភូមិបឹងក្រម ឃុំខ្ពបអាទាវ ស្រុកលើកដែក ទី២-ឈ្មោះ សុង វិច្ឆ័យ ហៅកុសល់ ភេទប្រុស អាយុ២២ឆ្នាំ មានទីលំនៅក្នុងភូមិចុងកោះ ឃុំសណ្តា ស្រុកលើកដែក ទី៣-ឈ្មោះ ជាន តារ៉ា ហៅធាន ភេទប្រុស អាយុ២០ឆ្នាំ មានទីលំនៅក្នុងភូមិចុងកោះ ឃុំសណ្តា ស្រុកលើកដែក ទី៤-ឈ្មោះ រុន សំណាង ភេទប្រុស អាយុ២០ឆ្នាំ មានទីលំនៅភូមិថ្មី ឃុំពាមរាំង ស្រុកលើកដែក និងទី៥-ឈ្មោះ ជឿន តុលា ភេទប្រុស អាយុ២៣ឆ្នាំ មានទីលំនៅភូមិថ្មី ឃុំពាមរាំង ស្រុកលើកដែក ។
ប្រភពពីមន្រ្តីនគរបាលដដែលបានបន្តទៀតថា នៅមនុពេលកើតហេតុសមត្ថកិច្ចនគរបាលស្រុកលើកដែកបានចុះដើរល្បាតនៅក្នុងភូមិសាស្ត្រឃុំព្រែកដាច់ ខណៈពេលកំពុងល្បាតក៍បានប្រទះឃើញយុវជនមួយក្រុម បានជិះម៉ូតូ២គ្រឿងប្រដេញគ្នានៅតាមផ្លូវដោយមានការសង្ស័យសមត្ថកិច្ចនគរបាលស្រុក ក៍បានតាមស្ទាក់រហូតឈានដល់ធ្វើការឃាត់ខ្លួនបានជនសង្ស័យជាបន្តបន្ទាប់ និងវត្ថុតាងបញ្ជូនទៅកាន់អធិការដ្ឋាននគរបាលស្រុកដើម្បីធ្វើការសាកសួរ និងកសាងសំណុំរឿងចាត់ការតាមច្បាប់ ៕
ដោយ៖ ភីនរ៉ា