ភ្នំពេញ៖ ក្រុមសង្គមស៊ីវិលមកពីវិស័យជាច្រើនបានស្នើឲ្យរាជរដ្ឋាភិបាល បង្កើនការផ្សព្វផ្សាយពី ព័ត៌មានកម្ចី ឬជំនួយអភិវឌ្ឍនានាទៅកាន់សាធារណៈជនឲ្យបានទូលំទូលាយ ដើម្បីធានាឲ្យការប្រើប្រាស់ជំនួយទាំងនេះប្រព្រឹត្តទៅប្រកបដោយតម្លាភាព និងប្រសិទ្ធិ។
បណ្តាក្រុមសង្គមស៊ីវិលជាច្រើនបានបង្ហាញការព្រួយបារម្ភចំពោះការបិទបំាង ឬការមិនបង្ហាញព័ត៌មានស្តីពីជំនួយឬកម្ចីដែលទទួលបានពីអន្តរជាតិ ទៅកាន់សាធារណៈជនឲ្យបានទូលំទូលាយ ដែលធ្វើឲ្យមានមន្ទិលសង្ស័យជាច្រើនលើបញ្ហានេះ។ ការបង្ហាញរបស់ក្រុមសង្គមស៊ីវិលនាពេលនេះ បន្ទាប់ពីក្រុមអ្នកស្រាវជ្រាវឯករាជ្យបានបង្ហាញរបាយការណ៍ដែលទើបនឹងរកឃើញថា មានជំនួយមួយចំនួនពុំបានកត់ត្រាឲ្យបានច្បាស់លាស់នៅក្នុងប្រពន្ធ័ព័ត៌មាន ក្នុងនោះដូចជាជំនួយថ្មីៗមកពី៖ ប្រទេសចិន កូរ៉េ និងប្រទេសឥណ្ឌាជាដើម។
ថ្លែងក្នុងសិក្ខាសាលានៅព្រឹកថ្ងៃទី៥ ខែវិច្ឆិកា ២០១៣នេះ លោក តឹក វណ្ណារ៉ា នាយកប្រតិបត្តិរងនៃវេទិកាអង្គការមិនមែនរដ្ឋាភិបាលស្តីពីកម្ពុជាមានប្រសាសន៍ថា សាធារណៈជនចាំបាច់ណាស់ត្រូវតែបានដឹងពីព័ត៌មាននៃកម្ចី និងជំនួយឥតសំណងទាំងនេះដើម្បីធានា ឲ្យការគ្រប់គ្រងប្រាក់កាសសាធារណៈប្រកបដោយប្រសិទ្ធិផល។
យ៉ាងនេះក្តីលោកបញ្ជាក់ថា ប្រសិនបើគ្មានយន្តការទេនោះ ស្ថាបន័ត្រួតពិនិត្យ អង្គការសង្គមស៊ីវិលប្រពន្ធ័ផ្សព្វផ្សាយនិងសាធារណជនទូទៅមិនអាចចូលរួមប្រកបដោយប្រសិទ្ធិភាពនៅក្នុងដំណើរការធ្វើសេចក្តីសម្រេចចិត្ត ហើយអ្នកពាក់ពន្ធ័ទាំងនេះក៏មិនអាចទាមទារឲ្យស្ថាបន័នីតិប្រតិបត្តិមានគណនេយ្យភាពចំពោះការប្រើប្រាស់ធនធានសាធារណៈនេះបានឡើយ។ទាក់ទិនទៅនឹងសំណើទាំងនេះដែរ នគរធំមិនអាចសុំការបំភ្លឺបានទេ ពីថ្នាក់ដឹកនាំជំនាញនៃក្រុមប្រឹក្សាអភិវឌ្ឍកម្ពុជាដោយរវល់ជាប់ប្រជុំក្នុងវេទិកាជាតិលើកទី៣ ស្ដីពីការប្រែប្រួលអាកាសធាតុ នៅវិមានសន្តិភាព។ ទោះជាយ៉ាងនេះក្តី តំណាងរាជរដ្ឋាភិបាលបានបង្ហាញពីការគាំទ្រលើរបាយការណ៍នេះរួចហើយ ក្នុងនោះមកពីក្រុមប្រឹក្សាអភិវឌ្ឍកម្ពុជា ក្រសួង ផែនការ និងក្រសួងសេដ្ឋកិច្ច និងហិរញ្ញវត្ថុ តាមរយៈផ្តល់ធាតុចូលនានាចាប់តាំងពីពេលចាប់ផ្តើមសិក្សាស្រាវជ្រាវលើប្រធានបទនេះមកម្លេះ។
បន្ទាប់ពីទទួលបានលទ្ធពីការស្រាវជ្រាវនេះ ក្រុមសង្គម ស៊ីវិលដែលមានជំនាញលើវិស័យនេះបានរួមគ្នាបានស្វែងរកដំណោះស្រាយពីភាពចន្លោះប្រហោងនានាដែលបានរកឃើញ ហើយលើកជាអនុសាសន៍ ដែលគ្រោងផ្ញើរទៅកាន់់់់់់់់់់់រាជរដ្ឋាភិបាល និង ដៃគូអភិវឌ្ឍន៍នាពេលឆាប់ៗនេះ។សូមបញ្ជាក់ថា តាមការសិក្សាបានបង្ហាញដែរថា ប្រទេសកម្ពុជាអនុវត្តបានល្អពាក់ពន្ធ័នឹងប្រសិទ្ធិភាពនៃការប្រើប្រាស់ជំនួយ។ បើគិតក្នុងឆ្នាំ២០១២កម្ពុជាទទួលបានជំនួយអភិវឌ្ឍន៍សរុបមានទឹកប្រាក់ប្រមាណ១.៥ពាន់លានដុល្លា ហើយមានចំនួនជាងពាក់កណ្តាលនៃថវិកាជាតិក្នុងឆ្នាំ២០១២ មានចំនួន ស្មើនឹង២.៧ពាន់លានដុល្លា៕ ដោយ៖ មករា