ខេត្តកណ្តាល៖ សមត្ថកិច្ចនគរបាលស្រុកស្អាង បានចុះទៅត្រួតពិនិត្យសពក្មេងប្រុសស្រី២នាក់បងប្អូនជីដូនមួយ បន្ទាប់ពីប្រទះឃើញសាកសពជនរងគ្រោះទាំង២ លុងទឹកទន្លេបាសាក់ស្លាប់ យ៉ាងអណោចអធម៌ បង្ករឲ្យមានការភ្ញាក់ផ្អើល កាលពីវេលាម៉ោង ៦និង៣០នាទី ថ្ងៃទី២៤ ខែវិច្ឆិកា ឆ្នាំ២០១៣ ស្ថិតក្នុងភូមិស្វាយពុំត្រង់ ឃុំកោះអន្លង់ចិន ស្រុកស្អាង ខេត្តកណ្តាល ។
លោកវរសេនីយ៍ត្រី សេង សុជាតិ អធិការនគរបាលស្រុកស្អាង ដែលដឹកនាំកម្លាំងជំនាញ ចុះពិនិត្យសាកសពក្មេងរងគ្រោះទាំង២នាក់ នោះបានឲ្យដឹងថា ក្មេងរងគ្រោះដែលលុងទឹកស្លាប់នោះមានឈ្មោះ លុយ លីហ្សា ភេទស្រី អាយុ៩ឆ្នាំ និងម្នាក់ទៀតឈ្មោះ គីម កក្កដា ភេទប្រុស អាយុ៨ឆ្នាំ ក្មេងទាំង២នាក់ ត្រូវជាបងប្អូនជីដូនមួយនិងគ្នា បច្ចុប្បន្នស្នាក់នៅផ្ទះជាមួយឪពុកម្តាយផ្សេងគ្នា នៅក្នុង ភូមិ ឃុំ កើតហេតុខាងលើ ។
អធិការនគរបាលស្រុកស្អាង បានបន្តថា នៅមុនពេលកើតហេតុ ថ្ងៃទី២៣ ខែវិច្ឆិកា ឆ្នាំ២០១៣ ប្រជាពលរដ្ឋនៅក្នុងភូមិ បានឃើញក្មេងរងគ្រោះទាំង២នាក់ ដើរចេញពីផ្ទះបបួលគ្នាមកមាត់ទន្លេបាសាក់ ដើម្បីបង្ហោះខ្លែងលេង ខណៈពេលបង្ហោះខ្លែងនោះក្មេងទាំង២នាក់ ក៏បាននាំគ្នាចុះលេងទឹកទន្លេ តែនៅគ្រានោះពុំមានអ្នកណាចាប់អារម្មណ៍ ជាមួយក្មេងរងគ្រោះឡើង ព្រោះជារឿយៗ ក្មេងនៅក្នុងភូមិតែងតែចុះលេងទឹកយ៉ាងដូច្នេះ ។ លុះមួយសន្ទុះក្រោយមក ស្រាប់តែឃើញឪពុកម្តាយក្មេងរងគ្រោះទាំង២នាក់ ដើររកកូន (ក្មេងរងគ្រោះ) តែរកពុំឃើញនៅកន្លែងបង្ហោះខ្លែង ។ ដោយមានការសង្ស័យឪពុកម្តាយ និងប្រជាពលរដ្ឋនៅក្នុងភូមិក៏បាននាំគ្នាមុជទឹកទន្លេបាសាក់ រាវរកក្មេងទាំង២នាក់ និងខ្លះទៀតបានបង់សំណាញ់តែរកពុំឃើញនោះទេ ។
លោក សេង សុជាតិ បានបន្តទៀតថា រហូតមកដល់វេលាម៉ោង ៦និង៣០នាទី ព្រឹក ថ្ងៃទី២៤ ខែវិច្ឆិកា ឆ្នាំ២០១៣ ឪពុកម្តាយក្មេងរងគ្រោះ និងប្រជាពលរដ្ឋបានប្រទះឃើញសាកសពក្មេងរងគ្រោះ អណ្តែតក្នុងទឹកទន្លេ ក្បែរចំណុចដែលក្មេងរងគ្រោះទៅបង្ហោះខ្លែង ហើយក៏បានស្រង់មកលើគោក រួចរាយការណ៍ប្រាប់មកកម្លាំងនគរបាល ប៉ុស្តិ៍រដ្ឋបាលស្វាយប្រទាល រួចមកលោកក៏បានដឹកនាំកម្លាំងជំនាញបច្ចេកទេសស្រុក ធ្វើការពិនិត្យសាកសពក្មេងរងគ្រោះទាំង២នាក់នោះ មិនមានពាក់ព័ន្ធករណីអ្វីទេ គឺជនរងគ្រោះពិតជាបានលង់ទឹកដោយខ្លួនឯងប្រាកដមែន រួចក៏ប្រគល់សាកសពក្មេងរងគ្រោះ អោយក្រុមគ្រួសារចាត់ចែងធ្វើបុណ្យតាមប្រពៃណី ៕
ដោយ៖ អភិរក្ស