ភ្នំពេញ៖ តំណាងបុគ្គលិករបស់ក្រុមហ៊ុនអឹមហ្វូនជាច្រើនរយនាក់បានបន្តធ្វើកូដកម្មនៅមុខក្រុមហ៊ុនដែលស្ថិតនៅផ្លូវព្រះមុនីវង្សក្នុងគោលបំណងទាមទារប្រាក់ខែនិងប្រាក់អតីតភាពការងារបន្ទាប់ពីថៅកែក្រុមហ៊ុនMFONE ដែលបានប្រកាសបិទទ្វារកាលពីថ្ងៃទី១៧ខែកុម្ភៈឆ្នាំ២០១៣ហើយថៅកែក្រុមហ៊ុននេះបានគេចមុខមិនព្រមចូលខ្លួនមកដោះស្រាយជាមួយបុគ្គលិករបស់ខ្លួននោះឡើយរហូតមកដល់ពេលនេះ។
វិស្វករបច្ចេកទេសនៃក្រុមហ៊ុនMFONE លោកនីមសូលីដាបានថ្លែងប្រាប់អ្នកសារព័ត៌មានកាលពីថ្ងៃអាទិត្យនេះថាពួកគាត់បានបំរើការងារនៅក្រុមហ៊ុនMFONEនេះជាង១០ឆ្នាំមកហើយគឺប្រាក់ទាំងឡាយដែលថៅកែពុំទាន់ដោះស្រាយឲ្យបុគ្គលិកម្នាក់ៗជាងមួយម៉ឺនដុល្លារ។
វិស្វករបច្ចេកទេសរូបនេះបន្តថាការទាមរបស់បុគ្គលិកនៅពេលនេះគឺដើម្បីឲ្យថៅកែនិងស្ថាប័នពាក់ព័ន្ធផ្សេងៗចូលមកដោះស្រាយដល់ពួកគេបើពុំដូច្នោះទេពួកយើងនឹងជួបការលំបាកខ្លាំងខាងជីវភាពដោយសារតែពួកយើងជាច្រើននាក់នៅផ្ទះជួលហើយគ្មានប្រាក់បង់ថ្លៃផ្ទះ។
លោកសូលីដាបានបន្តទៀតថាបុគ្គលិកខ្មែរទាំងអស់ដែលបំរើការឲ្យក្រុមហ៊ុននេះគឺមានចំនួន១.០៩២នាក់ដែលពុំទាន់ទទូលបានប្រាក់ខែនិងប្រាក់អ្វីផ្សេងៗដូចជាប្រាក់អតីតភាពការងារ(ប្រាក់អត្ថប្រយោជន៍បុគ្គលិក)ជាដើម។
បើតាមសេចក្តីជូនដំណឹងរបស់បុគ្គលិកដែលបានធ្វើការតវ៉ាទាំងនោះបានឲ្យដឹងថាប្រាក់ទាំងឡាយដែលថៅកែខាងលើនេះមិនទាន់ដោះស្រាយឲ្យគឺមានចំនួនជាងបួនលានបួនសែនដុល្លារអាមេរិកឯណ្ណោះ។
ក្រុមអ្នកទាមទារទាំងនោះបានព្យាយាមឲ្យថៅកែក្រុមហ៊ុនMFONEសងនូវអត្ថប្រយោជន៍បុគ្គលិកជាច្រើនដូចជាប្រាក់បំណាច់ឆ្នាំប្រាក់បណ្តេញចេញប្រាក់ជូនដំណឹងប្រាក់ជំងឺចិត្តនិងប្រាក់ផ្សេងៗជាច្រើនទៀតទៅតាមច្បាប់ការងារនៅកម្ពុជា។
ក្នុងការតវ៉ានោះបុគ្គលិកបានស្រែកទាមទាររួមទាំងលើកបដានិងរូបថតសម្តេចតេជោហ៊ុនសែននិងលោកជំទាវកិត្តិព្រឹទ្ធបណ្ឌិតផងនោះពួកគេក៏បានអំពាវនាវដល់អ្នកទាំងពីរជួយអន្តរាគមន៍ដល់ពួកគេផងដើម្បីធ្វើយ៉ាងណាឲ្យថៅកែខាងលើនេះចូលមកដោះស្រាយជូនពួកគេឲ្យបានឆាប់រហ័ស ដើម្បីពួកគេបានដោះស្រាយជីវភាពប្រចាំថ្ងៃ សងថ្លៃស្នាក់នៅ និងចំណាយផ្សេងៗ ពិសេសនឹងរកការងារធ្វើបន្តទៀត។
គួរបញ្ជាក់ផងដែរថា ក្រុមហ៊ុនMFONE មានថៅកែចំនួនពីរមួយមកពីប្រទេសថៃនិងមួយទៀតមកពីប្រទេសសិង្ហបូរីហើយពួកគេបាននឹងកំពុងលាក់មុខពីបុគ្គលិករបស់ខ្លួនដោយមិនព្រមចូលមកដោះស្រាយ ហើយបុគ្គលិកទាំងនោះបានព្រមាននឹងធ្វើការតវ៉ានេះរហូតដល់មានដំណោះស្រាយចំពោះពួកគេទើបបញ្ឈប់៕
ស.ស្អាត