ភ្នំពេញ៖ បើយោងទៅតាមព្រមានរបស់លោករដ្ឋមន្ត្រីក្រសួងព័ត៌មាន ខៀវ កាញារីទ្ធ នៅក្នុងពិធីបើកវគ្គបណ្តុះ បណ្តាលស្តីពី «កត្តាហានិភ័យលើការមិនពាក់មួកសុវត្ថិភាព និងការបើកបរក្រោមឥទ្ធិពលគ្រឿងស្រវឹង» កាលពី
ព្រឹកថ្ងៃទី២១ ខែវិច្ឆិកា ឆ្នាំ២០១៣នេះ នៅទីស្តីការក្រសួងព័ត៌មាន។
លោករដ្ឋមន្ត្រី បានព្រមានថា ប្រសិនបើប្រព័ន្ធផ្សព្វផ្សាយដូចជា៖ វិទ្យុ កាសែត និងស្ថានីយទូរទស្សន៍ណាមួយនៅតែបន្តផ្សាយស្ពត់ពាណិជ្ជកម្មទាក់ទងនឹងទៅស្រាបៀរថា ពិសារទៅមានរសជាតិផ្អែមជាប់មាត់ ពិសារទៅមានសុខភាពល្អនោះ ក្រសួងព័ត៌មានយើងនឹងដកអាជ្ញាប័ណ្ណបិទមិនឲ្យដំណើរការអាជីវកម្មជាបន្តទៅទៀតឡើយ។
លោករដ្ឋមន្រ្ដីក្រសួងព័ត៌មានបន្ថែមដោយបានលើកឡើងទៀតថា ក្រសួងកំពុងតែពិចារណាកាត់បន្ថយអំពីការផ្សព្វផ្សាយពាណិជ្ជកម្មទាក់ទងនឹងគ្រឿងស្រវឹង ដោយហាមមិនឲ្យមានការប្រលងប្រជែងប្រកាសផ្ដល់រង្វាន់ និងលើកអំពីគុណភាពស្រានៅតាមកញ្ចក់ទូរទស្សន៍ និងវិទ្យុ ហើយបើសិនជាស្ថានីយ៍ វិទ្យុ និងទូរទស្សន៍ណាមួយ ដែលនៅតែបន្ដការផ្សព្វផ្សាយទៀត ក្រសួងនឹងដកហូតអាជ្ញាប័ណ្ណ និងបិទស្ថានីយ៍តែម្ដង។
លោក រដ្ឋមន្ត្រី បានសង្កត់ដែរថា ការផ្សាយពាណិជ្ជកម្ម គឺវាពិតជាផ្នែកមួយនៃសេរីភាពនៃការទទួលបានព័ត៌មានដែរ។ ប៉ុន្តែកន្លងមក ការផ្សាយពាណិជ្ជកម្មទាល់តែមានច្បាប់ ហើយច្បាប់កន្លងមកក្រសួងបាននិយាយហើយថា អត់មានច្បាប់គឺមិនអនុញ្ញាតឲ្យមានការផ្សាយពាណិជ្ជកម្មស្រាបៀរថា ស្រាពិសារទៅមានអារម្មណ៍ភ្លឺថ្លា ក្លិនផ្អែមជាប់មាត់អីគេនោះទេ។
ទាក់ទិននឹងបញ្ហាផ្សព្វផ្សាយពាណិជ្ជកម្មស្របៀរនេះ ក្រសួងបានឲ្យលុបចោលមិនឲ្យផ្សាយទៀតទេ។លើកលែងពីរអាទិត្យមុនក្នុងពិធីបុណ្យធំៗដូចជាបុណ្យអុំទូកជាដើមក្រសួងអនុញ្ញាតឲ្យចាក់ផ្សាយពាណិជ្ជកម្មស្រាដោយសារថា បញ្ហាគ្រឿងស្រវឹងនេះមានក៏មានមនុស្សជិតកន្លះលាននាក់ដែរ ដែលធ្វើការក្នុងផ្នែកនេះ តែការផ្សាយត្រូវភ្ជាប់សំឡេងមួយទៀតថា បើពិសារស្រាកុំបើកបរ។
លោករដ្ឋមន្ត្រីបញ្ជាក់ថា កន្លងមកក្រសួងបានអនុវត្តច្រើនមកហើយ ដូចជារាល់ការផ្សាយស្រាបៀរ តែងតែដាក់ពាក្យពីក្រោយបើពិសារស្រាសូមកុំបើកបរ ជាពិសេសការផ្សាយអួតគុណភាពខ្ពស់ពេកក្រសួងមិនអនុញ្ញាតទេ ក្រសួងបានឲ្យកាត់ចោលភ្លាម។ ខាងមុខនេះក្រសួងនឹងពិចារណាតទៅទៀតថា ក្រសួងធ្វើអីបានតទៅទៀត បើ នៅតែបន្តមានការផ្សាយរបៀបនេះទៀត ក្រសួងនឹងបិទស្ថានីយទូរទស្សន៍ ឬវិទ្យុណាដែលផ្សាយនោះ៕
ដោយ៖ មករា