ភ្នំពេញ៖ ស្ថាប័ន្ត អេ ស៊ី ស៊ី អេ បានចុះហត្ថលេខាលើកិច្ចព្រមព្រៀង និងអនុស្សរណៈ យោគយល់​នៃការ​ប្រឡង​រួមគ្នា រវាងក្រុមប្រឹក្សាជាតិគណនេយ្យ និងវិទ្យាស្ថាន​គណនេយ្យ​ករជំនាញសវនករ​ក្នុង​គោល​បំណងដើម្បីគាំ​​ទ្រ​ពង្រឹងសមត្ថភាពវិជ្ជាជីវៈ និងការកសាងហេដ្ឋារចនាសម្ព័ន្ធគណនេយ្យដល់​ការ​អភិ​វឌ្ឍន៍​ដល់សេដ្ឋកិច្ចនៅប្រទេស​កម្ពុជា។

      ថ្លែងក្នុងពិធីនោះដោយមានថ្នាក់ដឹកនាំអាជីវកម្មប្រមាណ៥០នាក់ផ្សេងទៀត លោក ងី តាយី រដ្ឋ​លេ​ខាធិការ​នៃក្រសួងសេដ្ឋកិច្ចនិងហិរញ្ញវត្ថុ និងជាស្នងការ​រាជ​រដ្ឋាភិបាលផ្នែកគណនេយ្យសវនកម្មនៅ​កម្ពុជា​ បាន​លើកឡើង​ថា តាមរយៈកិច្ចព្រមព្រៀង និង​អនុស្សរណៈយោគយល់គ្នានេះ ស្ថាប័នទាំងបី និង​ធ្វើការរួមគ្នា ដើម្បីជំរុញ និង​សម្រេច​​បានស្ដង់ដារ វិជ្ជា​ជីវៈ ក្រមសីលធម៌  និងអភិបាលកិច្ចខ្ពស់​បំផុត និងដើម្បីគាំទ្រដល់វិជ្ជាជីវៈ​​គណនេយ្យ​​​សវន​កម្ម និងហិរញ្ញវត្ថុនៅប្រទេសកម្ពុជា។

      លោកបញ្ជាក់ថា​ “ក្នុងនាមជាបញ្ញត្ដិករ វិជ្ជាជីវៈគណនេយ្យនៅកម្ពុជា ក្រុមប្រឹក្សជាតិគណ​នេយ្យ​មាន​​​​សេចក្ដី​រីករាយក្នុងការធ្វើជាដៃគូជាមួយស្ថាប័ន អេ ស៊ី ស៊ី អេ ។ វាគឺជាការកត់សម្គាល់នៃកិច្ចសហ​ប្រតិបត្ដិការកាន់​តែជិតស្និទ្ធ ដើម្បីធ្វើឱ្យកាន់តែរីកចំរើននូវវិជ្ជាជីវៈគណនេយ្យសវនកម្ម និងហិរញ្ញវត្ថុ ក្នុង​ការលើកស្ទួយ និងអភិវឌ្ឍន៍​សេដ្ឋកិច្ចកម្ពុជា។ ស្ថាប័នបញ្ញត្ដិករវិជ្ជាជីវៈ និងអ្នកជំនាញវិជ្ជាជីវៈ មាន​តួនាទីស្នូល ក្នុងការការពារផលប្រយោជន៍​សាធារណៈ និងប្រសូត្រកម្មតម្លៃរបស់មហាជន ហើយកិច្ច​សហប្រតិបត្ដិការនេះអាចលើកស្ទួយវិជ្ជាជីវៈនិយម និងស្ដង់ដារក្រមសីលធម៌ឱ្យដល់កម្រិតខ្ពស់មួយ” ។

      នាយកវិទ្យាស្ថានគណនេយ្យករជំនាញ និងសវនករកម្ពុជា លោកខូយ គឹមឡេង បានសម្តែង​នូវ​ភាព​រីករាយ ដោយបានកិច្ចសហប្រតិបត្ដិការល្អជាមួយនិង ស្ថាប័ន អេ ស៊ី ស៊ី អេ ដែលបានចូល​រួម​ចំណែកបម្រើផល​ប្រយោជន៍​រួម ដើម្បីកសាងសមត្ថភាព និងលទ្ធភាពកាន់តែខ្លាំងឡើងនៅក្នុងវិជ្ជាជីវៈ គណនេយ្យនិងហិរញ្ញវត្ថុនៅកម្ពុជា។ លោក​ក៏បានបន្ថែមទៀតថា ស្ថាប័នទាំងពីរនឹងធ្វើការជាមួយគ្នា ដោយឈរលើផល​ប្រយោជន៍​ទៅ​វិញ​ទៅមកលើ​គំនិត​​ផ្ដួចផ្ដើមនានា ដែលពាក់ព័ន្ធជាមួយនិង​ការអប់រំ​ការ​​បណ្ដុះបណ្ដាលវិជ្ជាជីវៈ, ការ​ប្រឡង និងការសិក្សាស្រាវ​ជ្រាវ។

      ទន្ទឹមនឹងនោះដែរ លោកស្រី ហេឡែន ប្រ៊ែន នាយកប្រតិបត្តិនៃស្ថាប័ន ACCA បានបញ្ជក់ថា កិច្ច​សហប្រតិ​​បត្ដិ​ការនេះ គឺជាភាពជាដៃគូដ៏មានសារសំខាន់ ដោយហេតុថា វាជាកិច្ចសហប្រតិបត្ដិការបន្ដ​ទៅមុខជាច្រើនឆ្នាំទៀត ហើយការធ្វើការជាមួយស្ថាប័នពាក់ព័ន្ធ គឺជាផ្នែកដ៏សំខាន់មួយនៃយុទ្ធសាស្ដ្រ​របស់ស្ថាប័ន អេ ស៊ី ស៊ី អេ និងតម្លៃ​ឈ្នួលរបស់យើង។

      គួររម្លឹកថា ស្ថាប័ន ACCA មួយនេះ បានចូលរួមចំណែកជួយគាំទ្រទាំងបច្ចេកទេស និងហិវញ្ញវត្ថុ លើសកម្ម​​ភាព​របស់ក្រុមប្រឹក្សាជាតិគណនេយ្យ និងវិទ្យាស្ថានគណនេយ្យករជំនាញ និងសវនករកម្ពុជា រយៈពេលជាង១០ឆ្នាំមក​ហើយ ស្របពេលជាមួយគ្នា ស្ថាប័ននេះនឹងបន្តការគាំទ្ររបស់ខ្លួនឱ្យកាន់តែ​ខ្លាំងក្កាបន្ថែមទៀតដល់​ស្ថាប័នទាំងពីរ​ខាងលើ៕ ដោយៈ ភីនរ៉ា