ភ្នំពេញ៖ ដើម្បីឆ្លើយតបនឹងការកើនឡើងនៃចំនួនប្រជាជនក្នុងរាជធានីភ្នំពេញបច្ចុប្បន្ននេះសាលារាជធានីភ្នំពេញ កំពុងសិក្សាលើគម្រោងបង្កើតខណ្ឌពី៣ទៅ៥បន្ថែមទៀតនៅក្នុងអាណត្តិទី៥។ ប្រភពព័ត៌មានផ្លូវការតែអាចយកជាការ បានត្រូវគេទម្លាយឱ្យ ដឹង ថា ក្នុងពេលឆាប់ៗខាងមុខនេះរាជរដ្ឋាភិបាលនឹងបន្ថែមខណ្ឌចំនួន៤ទៀតពីលើ៩ខណ្ឌដែលមានស្រាប់។
អភិបាលរាជធានីភ្នំពេញ លោកប៉ា សុជាតិវង្ស បានថ្លែងបញ្ជាក់ប្រាប់អ្នកសារព័ត៌មានយើងនៅថ្ងៃទី១៨ វិច្ឆិកា ថាសាលារាជធានីភ្នំពេញកំពុងសិក្សាលើគម្រោងបង្កើតខណ្ឌមួយចំនួនបន្ថែមទៀត។ ការបង្កើតខណ្ឌថ្មីនៅភ្នំពេញតម្រូវឲ្យមានការសិក្សាពីលទ្ធភាពភូមិសាស្ត្រ ប្រជាសាស្ត្រ សក្ដានុពលសេដ្ឋកិច្ច និងពាណិជ្ជកម្មជាដើម។គម្រោងស្ថិតនៅក្នុងការសិក្សាក៏ពិតមែន អ្នកនាំពាក្យសាលារាជធានីភ្នំពេញលោកឡុង ឌីម៉ង់ បានឲ្យដឹងទៀតថា វានៅមិនយូរទៀតទេ ព្រោះសាលារាជធានីប្រញាប់សុំគោលការណ៍ទៅរាជរដ្ឋាភិបាល ដើម្បីធ្វើឲ្យបានមុនការបោះឆ្នោតជ្រើសរើសក្រុមប្រឹក្សាខណ្ឌ ដែលនឹងប្រព្រឹត្តទៅនៅខែឧសភា ឆ្នាំ២០១៤ខាងមុខ។ក្នុងរាជធានីភ្នំពេញយើងសព្វថ្ងៃមាន៩ខណ្ឌគឺ៖ ខណ្ឌទួលគោក, ឫស្សីកែវ, ពោធិសែនជ័យ, សែន សុខ, ចំការមន, មានជ័យ, ដូចពេញ, ដង្កោ, និងខណ្ឌ៧មករា។
ប្រភពព័ត៌មានឱ្យដឹងថា ខណ្ឌទាំង៤ ដែលនឹងចេញជារូបរាងខាងមុខ គឺខណ្ឌមានជ័យត្រូវ បំបែកជាពីរ ខណ្ឌចំការមនបំបែកជាពីរ ខណ្ឌ សែន សុខ បំបែកជាពីរ និងខណ្ឌឫស្សីកែវក៏ត្រូវបំបែកជាពីរដែរ។ ប៉ុន្តែគេមិនទាន់ដឹងថា ខណ្ឌទាំង៤ដែលបំបែកខ្លួនចេញ នោះ មានឈ្មោះអ្វីឱ្យពិតប្រាកដនៅឡើយទេ រីឯសង្កាត់នីមួយៗតាមខណ្ឌនោះក៏មិនដឹងថា សង្កាត់ណាខ្លះត្រូវពុះទៅខណ្ឌថ្មីនោះ ដែរ។ ប្រភពបានបន្តថា បើតាមការខ្សឹបខ្សៀវគ្នានោះ អ្នកមានវាសនាបានឡើងធ្វើជាអភិបាលខណ្ឌថ្មី គឺមិនឈ្នះត្រកូលព្រុំ និង ត្រកូល ប៉ុល ឡើយ គឺត្រកូលព្រុំ ទំនងយក២ខណ្ឌ ឯត្រកូល ប៉ុល អាចយក១ខណ្ឌ ដូច្នេះនៅសល់តែ១ខណ្ឌទៀតទេ។
ប្រភពបានបន្តថា បន្ទាប់ពីឮព័ត៌មានល្ហិចល្ហៀងបំបែកខណ្ឌទាំង៤ទៅជា៤ខណ្ឌថ្មីទៀតនោះ គេឃើញអ្នកខ្លះឡើងទៅផ្ទះអ្នកធំ ស្ទើរសឹកកាំជណ្តើរអស់ទៅហើយ មេត្តាសូមជួយសារ៉េ សារ៉ង់ ទុកកៅអីអភិបាលខណ្ឌថ្មីនោះ បានមួយនឹងគេផង។ ឥឡូវនេះ មានតែអធិរាជតាមខណ្ឌតែ៩រូបទេ បន្តិចទៀតឡើងដល់ទៅ១៣ ពិតជាគ្នាច្រើនអន្សមខ្លោចទេដឹង!។ពាក់ព័ន្ធនឹងការបង្កើតខណ្ឌបន្ថែមនៅក្នុងរាជធានីភ្នំពេញនេះ ត្រូវបានស្វាគមន៍ដោយមន្ដ្រីអង្គការសង្គមស៊ីវិលមួយចំនួនដែរដោយសំអាងថា ស្ថិតិកំណើនប្រជាជននៅក្នុងក្រុងភ្នំពេញរហូតមកទល់ពេលនេះ មានជិតដល់៣លាននាក់ហើយ ហើយការបង្កើតខណ្ឌថ្មីៗបន្ថែមទៀត អាចបង្កភាពងាយស្រួលក្នុងការអភិវឌ្ឍ និងការគ្រប់គ្រងបែបបទរដ្ឋបាល។ជាមួយគ្នានោះ ដែរតំណាងសង្គមស៊ីវិលក៏បានបង្ហាញពីក្ដីព្រួយកង្វល់ខ្លះ ខណៈដែលការពង្រីកនេះត្រូវចំណាយធនធានរដ្ឋាភិបាលច្រើន និងខណៈដែលមិនទាន់មាននរណាអាចវាយតម្លៃបាន ថាតើខណ្ឌទាំង៩ដែលមានស្រាប់ក្នុងពេលនេះ បានប្រើប្រាស់ធនធានរបស់ខ្លួន អស់លទ្ធភាពហើយឬនៅ? ក្នុងការបង្កើតខណ្ឌបន្ថែមសម្រាប់រាជធានីភ្នំពេញនេះ៕ ដោយ៖ មករា