ភ្នំពេញ៖ ក្រសួងព័ត៌មានកាលពីថ្ងៃទី១៤ ខែមករា ឆ្នាំ២០១៤ ម្សិលមិញនេះ បដិសេធមិនអាចផ្តល់ហ្វ្រេកង់ឲ្យប្រធានវិទ្យុសំបុកឃ្មុំ FM ១០៥ MHz លោក ម៉ម សូណង់ដូ ជាការឆ្លើយតបនឹងការសុំតម្លើងកម្លាំងផ្សាយវិទ្យុបន្តទៅតាមបណ្តាខេត្តនានា និងសុំហ្វ្រេកង់សម្រាប់បង្កើតទូរទស្សន៍ ដោយបានបញ្ជាក់ថា ក្រសួងព័ត៌មានមានការសោកស្តាយដោយពុំមានសល់ហ្វ្រេកង់វិទ្យុ និងហ្វ្រេកង់ទូរទស្សន៍សម្រាប់ផ្តល់ជូនតាមការស្នើសុំនោះបានទេ។នេះបើយោងតាមលិខិតជូនដំណឹងរបស់ក្រសួងព័ត៌មាន ផ្ញើជូនប្រធានស្តីទីវិទ្យុសំបុកឃ្មុំ លោកស្រី ឌិន ផាណារ៉ា ចុះហត្ថលេខាដោយរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ នៅថ្ងៃទី១៤ខែមករា។
គួររម្លឹកថា លោក ម៉ម សូណង់ដូ បានលើកឡើងក្នុងលិខិតថា ចាប់ពីថ្ងៃចន្ទ ទី២៧ ខែមករា ឆ្នាំ២០១៤ តទៅ លោកនឹងដឹកនាំបាតុករ ចំនួនតិចជាង ២០០ នាក់ ធ្វើបាតុកម្មរៀងរាល់សប្តាហ៍ ចាប់ពីថ្ងៃចន្ទ ដល់ថ្ងៃសុក្រ ដោយជួបជុំគ្នា នៅទីលានប្រជាធិបតេយ្យ វេលាម៉ោង ៧ ព្រឹក ហើយដង្ហែក្បួនបាតុកម្ម ឆ្ពោះទៅកាន់ក្រសួងព័ត៌មាន នៅវេលាម៉ោង ៨ ព្រឹក ដល់ម៉ោង ១២ ថ្ងៃត្រង់ ដើម្បីទាមទារឲ្យក្រសួងព័ត៌មាន អនុញ្ញាតឲ្យវិទ្យុសំបុកឃ្មុំ តំឡើងកម្លាំងផ្សាយបន្តទៅតាមខេត្ត ( Relay ) និងសុំហ្វ្រេកង់ សម្រាប់បង្កើតទូរទស្សន៍ ទៅតាមសំណូមពររបស់ប្រជាពលរដ្ឋរាប់លាននាក់ នៅក្នុងព្រះរាជាណាចក្រកម្ពុជា។
ប៉ុន្តែរហូតដល់រសៀលថ្ងៃទី១៤ ខែមករា ឆ្នាំ២០១៤ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ថា ផ្នែករដ្ឋបាលសាលារាជធានីភ្នំពេញ ទើបតែបានទទួលលិខិតរបស់លោកម៉មសូណង់ដូ ហើយរៀបចំដាក់ជូនលោកអភិបាលរាជធានី ដើម្បីពិនិត្យ និងសម្រេច។
គួរបញ្ជាក់ផងដែរថា ការសម្រេចបដិសេធរបស់ក្រសួងព័ត៌មានក្នុងការស្នើសុំប្រេកង់វិទ្យុ និងទូរទស្សន៍នេះបានកើតឡើងបន្ទាប់ពីការស្នើសុំរបស់នាយកវិទ្យុសំបុកឃ្មុំ ហើយការស្នើសុំហ្វ្រេកង់វិទ្យុ និងទូរទស្សន៍នេះលោក ម៉ម សូណង់ដូ បានប្រមានពីការធ្វើបាតុកម្មទាមទារទៀតផង៕ ដោយ៖ ភីនរ៉ា