ភ្នំពេញ៖ ប្រធានគណបក្សសង្រ្គោះជាតិលោក សម រង្ស៊ី ដែលកំពុងស្នាក់នៅទីក្រុងម៉ានីល ប្រទេសហ្វីលីពីន បានសម្ដែងការអបអរសាទរ ចំពោះជ័យជំនៈរបស់ប្រទេសកម្ពុជា ដែលតុលាយុត្ដិធម៌អន្ដរជាតិទីក្រុងឡាអេសម្រេចថា ទឹកដីជុំវិញប្រាសាទព្រះវិហារ ជារបស់ខ្មែរ។ជាមួយ នឹងការអបអរសាទរនេះ មេបក្សប្រឆាំង ដែលតែងតែរិះគន់រដ្ឋាភិបាល អំពីបញ្ហាព្រំដែនកម្ពុជា-វៀតណាម ក៏បានស្នើរឲ្យរាជរដ្ឋាភិបាល គិតគូរការពារបូរណភាពទឹកដីទាំងមូល កុំឲ្យបរទេសឈ្លានពាន យកទឹកដីខ្មែរឲ្យសោះ។
នៅក្នុងឃ្លីបជាវីដេអូ រយះពេលជាង២នាទី ដែលត្រូវបានបង្ហោះនៅក្នុង បណ្តាញសង្គម Facebook មេបក្សប្រឆាំងរូបនេះ បានថ្លែងថា”គណបក្សសង្រ្គោះជាតិ ក៏សុំអំពាវនាវ ឲ្យប្រជារាស្រ្ដខ្មែរ ឲ្យរដ្ឋាភិបាលកម្ពុជាបែរទៅមើលព្រំដែនខាងកើត ពីព្រោះបើយើស្រលាញ់ជាតិ មិនត្រូវស្រលាញ់តែមួយចំហៀងនោះទេ មិនត្រូវស្រលាញ់តែពាក់កណ្ដាលប្រទេសទេ ត្រូវតែស្រលាញ់ប្រទេសយើងទាំងមូល”។លោក សម រង្ស៊ី បានថ្លែងបន្ដ ថា រាជរដ្ឋាភិបាលត្រូវប្រកាន់គោលជំហរ ដូចគ្នា គឺត្រូវការពារព្រំដែនខាងលិចផង និងខាងកើតផង ដើម្បីកុំឲ្យបរទេសណាមកឈ្លានពានលេបត្របាក់ទឹកដីកម្ពុជាឡើយ៕
ដោយ៖ រតនា