ភ្នំពេញ៖ ក្រុមការងារបច្ចេកទេសជាន់ខ្ពស់ របស់គណបក្សនយោបាយ២ គឺគណបក្សប្រជាជនកម្ពុជា ដែលដឹកនាំដោយលោក ព្រំសុខា និងគណបក្សសង្គ្រោះជាតិ ដឹកនាំដោយលោក សុន ឆ័យ ដែលមានសមាសភាព៥រូបម្ខាងៗ បានជួបប្រជុំពិភាក្សាជាថ្មីឡើងវិញ ពេញម៉ាព្រឹកតាំងពីព្រឹកថ្ងៃអង្គារ ទី៥ ខែវិច្ឆិកា ឆ្នាំ២០១៣ចាប់តាំអពីម៉ោង៩ព្រឹករហូតដល់ម៉ោង១២ថ្ងៃ នៅវិមាន រដ្ឋ សភា ។ ជំនួបពិភាក្សានេះហាក់ដូចជាមិនមានលទ្ធផលផ្លែផ្កាអ្វីជាដុំកំភួននោះឡើយ បានត្រឹមតែផ្លាស់ប្តូរយោបល់គ្នា ហើយ នាំ យកកិច្ចពិភាក្សាទាំងនោះទៅរាយការណ៍ជូនថ្នាក់ដឹកនាំរៀងៗខ្លួន ពិសេសគឺបាន ណាត់គ្នាជួប ប្រជុំជាថ្មីរ វាង ថ្នាក់ដឹកនាំនៅចុង សប្តាហ៍នេះតែប៉ុណ្ណោះ ដោយមិនទាន់កំណត់ថ្ងៃពិតប្រាកដនៅឡើយ។
ក្រោយចាកចេញពីតុប្រជុំតំណាងគណបក្សប្រជាជនកម្ពុជា លោក ព្រំសុខា និង តំណាងគណបក្សសង្គ្រោះជាតិមានលោក យឹម សុវណ្ណ បានប្រាប់ក្រុមអ្នកសារព័ត៌មានថា កិច្ចប្រជុំពេញម៉ាព្រឹករវាងក្រុមការងារជំនាញរបស់គណបក្សទាំងពីរ មិនបាននិយាយដល់ការចូលរួមប្រជុំរដ្ឋសភា របស់បេក្ខជនជាប់ឆ្នោតតំណាងរាស្ត្ររបស់គណបក្សសង្គ្រោះជាតិទេ។ រីឯការបែងចែកតួនាទីមុខតំណែងក៏មិនមានលើកឡើងដែរ។ កិច្ចប្រជុំពិភាក្សានេះបានលើកឡើងតែពីការធ្វើកែទម្រង់ការបោះឆ្នោតអាណត្តិក្រោយ ដែលថ្នាក់ដឹកនាំកំពូលនៃគណបក្សទាំងពីរបានព្រមព្រៀងគ្នា កាលពីកិច្ចប្រជុំចរចាថ្នាក់កំពូល នាថ្ងៃទី១៦កញ្ញាកន្លងទៅនោះ។
យ៉ាងណាក៏ដោយ លោក ព្រំ សុខា តំណាងក្រុមការងារបច្ចេកទេសគណបក្សប្រជាជនកម្ពុជា បានបញ្ជាក់ថា កិច្ចប្រជុំនៅព្រឹកមិញមិនបានជជែកពីការស៊ើបអង្កេតរកការពិត នៃលទ្ធផលបោះឆ្នោតនោះទេ ។ គឺបានជជែកពីចំណុចសំខាន់ តាមយន្តការដែលថ្នាក់ដឹកនាំកំពូល ទាំងពីរបានព្រមព្រៀងគ្នា លើការកែទម្រង់ការបោះឆ្នោត លើកក្រោយ។ រីឯការជជែកពីការបែងចែកអំណាចអ្វីនោះគឺមិនមានទេ ព្រោះវាមិនមែនជាការងាររបស់ក្រុមការងារបច្ចេកទេសនេះ។
សូមបញ្ជាក់ថា ចំពោះសមាសភាពក្រុមការងាររបស់គណបក្សនយោបាយទាំងពីរដែលបានជួបពិភាក្សាគ្នាពេញម៉ាព្រឹកនេះមាន៖ ក្រុមការងារជំនាញរបស់គណបក្សប្រជាជនកម្ពុជាចំនួន៥រូបរួមមាន៖ លោក ព្រុំ សុខា . លោក សក់ សេដ្ឋា ជារដ្ឋលេខាធិការក្រសួងមហាផ្ទៃ. លោក កើត រិទ្ធ រដ្ឋលេខាធិការក្រសួងយុត្តិធម៌.លោក សោម សឿន នាយករងខុទ្ទកាល័យរបស់គណបក្សប្រជាជនកម្ពុជានិងលោក ឡេង វី អនុរដ្ឋលេខាធិការក្រសួងមហាផ្ទៃ។ ចំណែកខាងគណបក្សសង្គ្រោះជាតិ មាន ៖ លោកសុន ឆ័យ សមាជិកគណៈកម្មាធិការអចិន្ត្រៃយ៍. លោក យ៉ែម បុញ្ញឫទ្ធិ អគ្គនាយករដ្ឋបាល. លោក គួយ ប៊ុនរឿន អគ្គនាយករងរដ្ឋបាល. លោក អេង ឆៃអ៊ាង អនុប្រធានគណៈកម្មាធិការនាយក និងលោកយឹម សុវណ្ណ ប្រធានគណៈកម្មាធិការប្រតិបត្តិ៕
ដោយ៖ សស្អាត