ប្រទេសចិន៖ អ្នកព្យាករណ៍អាកាសធាតុប្រចាំប្រទេសចិនបានអោយដឹងថាមនុស្សរាប់ពាន់អ្នកត្រូវបាន
ជម្លៀសចេញពីទីលំនៅរបស់ពួកគេបន្ទាប់ពីតំបន់នេះត្រូវបានទទួលរងឥទ្ធិពលពីខ្យល់ព្យុះទីហ្វុង Fitow។ កាលពីព្រឹកថ្ងៃច័ន្ទនេះខ្យល់ព្យុះទីហ្វុង Fitow បានបោកបក់មកលើខេត្ត Fujian ជាមួយនឹងល្បឿនខ្យល់ ១៥១ គីឡូម៉ែតក្នុងមួយម៉ោងហើយបណ្តាលអោយមានភ្លៀងធ្លាក់យ៉ាងខ្លាំងក្នុងតំបន់នេះចំនែកផ្លូវមួយចំនួនត្រូវ
បានកាត់ផ្តាច់ពីគ្នា។ សារព័ត៌មានស៊ិនហួបានអោយដឹងថា មនុស្សយ៉ាងហោចណាស់ ២នាក់បានស្លាប់ ដោយសារព្យុះទីហ្វុង Fitow នេះចំនែកផ្ទះរបស់អ្នកស្រុកមួយចំនួននៅក្នុងខេត្ត Zhejiang ត្រូវបានដួលរលំហើយ កម្មករយាមកំពង់ផែ ២នាក់ក៏បានបាត់ខ្លួនក្នុងព្យុះទីហ្វុង Fitow នេះដែរ។ អាជ្ញាធរប្រទេសចិនបានប្រកាស សញ្ញាអាសន្នទៅដល់ប្រជាជនដែលរស់នៅទីនោះអោយមានការប្រុងប្រយ័ត្នខ្ពស់។

អ្នកព្យាករណ៍ឧតុនិយមប្រចាំប្រទេសចិនបានបន្តទៀតថា កាលពីព្រឹកថ្ងៃច័ន្ទនេះខ្យល់ព្យុះទីហ្វុង Fitow បានបណ្តាលអោយមានការបាក់ដីមួយកន្លែងនៅក្នុងទីក្រុង Fuding ប្រហែលជាម៉ោង ១នឹង១៥នាទី
( ម៉ោងនៅក្នុងស្រុក) ។ អ្នកស្រុកនៅតំបន់នោះបានប្រាប់អោយដឹងថា តំបន់មួយចំនួននៅក្នុងខេត្ត Fujian
និង ខេត្ត Zhejiang គឺមានកំពស់ទឹកភ្លៀងរហូតដល់ ២០០មីលីម៉ែត។​ លោក John Sudworth អ្នកសារព័ត៌មាន
របស់ BBC ប្រចាំទីក្រុងសៀងហៃបានអោយដឹងថា អាជ្ញាធរចិនគឺកំពុងតែដាក់ពង្រាយកងកំលាំងសង្រ្គោះ បន្ទាន់បន្ថែមទៀតដើម្បីកាពារសុវត្ថិភាពប្រជាជននៅក្នុងតំបន់នោះពីឥទ្ធិពលនៃខ្យល់ព្យុះទីហ្វុង Fitow នេះ។

សារព័ត៌មានស៊ិនហួបានបន្តទៀតថា នៅក្នុងខេត្ត  Fujian ប្រជាជនចំនួន ១៧៧០០០នាក់បានចាកចេញ ពីទីលំនៅរបស់ពួកគេមុនពេលខ្យល់ព្យុះនេះមកដល់ ចំនែកនៅក្នុងខេត្ត Zhejiang​ វិញប្រជាជនប្រហែលជា ៥៧៤០០០នាក់ក៏បានចាកចេញពីទីលំនៅរបស់ពួកគេដែរ។ នៅក្នុងខេត្ត Zhejiang ទូកប្រហែល ៣៥០០០គ្រឿង និងនៅក្នុងខេត្ត Fujian វិញទូក ៣០០០០គ្រឿងត្រូវបានបញ្ជាអោយត្រលប់ទៅកាន់កំពង់ផែវិញ។ ដោយ៖ តុលា