ភ្នំពេញ៖ ប្រធានតុលាការព្រហ្មទណ្ឌបារាំង និងមេធាវីដើមបណ្តឹងរដ្ឋប្បវេណីជនរងគ្រោះដោយខ្មែរក្រហម បានប្រតិកម្មចំពោះការបិទសិទិ្ធក្នុងតុលាការខ្មែរក្រហម ដោយចោទថា មិនអោយពួកគេលើកយកបញ្ហាឧក្រិដ្ឋកម្មប្រល័យពូជសាសន៍ មកនិយាយក្នុងសាលាក្តីខ្មែរក្រហមកាលពីថ្ងៃទី១៦ខែតុលាកន្លងទៅនេះ។
ថ្លែងក្នុងសន្និសីទសារព័ត៌មានស្តីពី សម្ពាធច្បាប់លើដើមបណ្តឹងរដ្ឋប្បវេណីនៅថ្ងៃទី០១ ខែវិច្ឆិកានេះ លោក ឆាយ ហុកផេង ប្រធានតុលាការព្រហ្មទណ្ឌបារាំង បានលើកឡើងថា កាលពីថ្ងៃទី២៦ខែកញ្ញា ឆ្នាំ២០១៣ មេធាវីនាំមុខបរទេសបានប្រើវិធីវាស់ដីអោយដើរ គឺបានហាមឃាត់មេធាវីរបស់លោកលើកយកបញ្ហាឧក្រិដ្ឋកម្មប្រល័យពូជសាសន៍មកនិយាយក្នុងសាសាលាក្តីខ្មែរក្រហមទេ។ទង្វើបែបនេះត្រូវបានលោកចៅក្រមរូបនេះចោទថា ជាអំពើផ្តាច់ការបិទសិទ្ធិមេធាវីរបស់លោក ប៉ុន្តែមិនប៉ះពាល់ដល់ក្រុមមេធាវី នៃជនជាប់ចោទ នួន ជា និងខៀវ សំផនទេ ព្រោះពួកគេអាចនិយាយអ្វីបានទាំងអស់បានដោយសេរី គ្មានការឃ្លាំមើលឬហាមឃាត់ឡើយ។តាមសេចក្តីថ្លែងការណ៍របស់ លោក ឆាយ ហុកផេង បានបញ្ជាក់ថា ក្នុងឱកាសសន្និដ្ឋានបញ្ចប់នៅថ្ងៃទី២២និង២៤ខែតុលា មេធាវី ការពារក្តីជនជាប់ចោទ នួន ជា បាននិយាយចាកប្រធានយ៉ាងសេរីបំផុត។
មេធាវីនាំមុខ បរទេសម្នាក់នោះបានយក សេចក្តីណែនាំ របស់ចៅក្រមជាត្រីមុខ។ចៅក្រមបានអះអាងក្នុងសេចក្តីណែនាំនោះថា នៅពេលខាងមុខបញ្ហាឧក្រិដ្ឋកម្មប្រល័យពូជសាសន៍ លើជនជាតិចាម និងជនជាតិវៀតណាម និងខ្មែរកម្ពុជាក្រោម នឹងត្រូវយកមកថ្លែងសន្និដ្ឋានបញ្ចប់។ប៉ុន្តែគ្មានទេ ការគ្រោងទុកថានឹងយកឧក្រិដ្ឋកម្មប្រល័យពូជសាសន៍ លើប្រជាជនថ្មី ឬប្រជាជន១៧មេសា មកដាក់ក្នុងថ្ងៃសវនាការណាមួយនោះ។សេចក្តីថ្លែងការណ៍ លោក ឆាយ ហុកផេង បានលើកឡើងចំៗទៀតថា ល្គឹកណា មេធាវីនាំមុខ បរទេសមិនអនុញ្ញាតិអោយមេធាវីរបស់ខ្ញុំធ្វើសេចក្តីសន្និដ្ឋានអំពីឧក្រិដ្ឋកម្មប្រល័យពូជសាសន៍ មកលើប្រជាជនថ្មី ល្គឹកនោះមេធាវីនោះឯងអង្គុយលើច្បាប់ ពោលគឺមេធាវីនោះឯងជាមេធាវីមិនពិត ប៉ុន្តែបានប្រព្រឹត្តិអ្វីៗក្នុងតួនាទីជាឈ្លប បំបិទសិទ្ធិមេធាវី ដើមបណ្តឹងរដ្ឋប្បវេណី។អំពើបែបនេះ ផ្ទុយស្រឡះអំពីក្រមសីលធម៌ នៃអាជីពជាមេធាវី នឹងអាចបញ្ជូនមេធាវីធុននេះ ទៅអោយក្រុមប្រឹក្សាមេធាវី កាត់ទោសព្យូរជើង ថ្ងៃណាមួយពុំខាន។គួរបញ្ជាក់ថា ប្រធានតុលាការព្រហ្មទណ្ឌបារាំង និងក្រុមសមាគមជនរងគ្រោះដោយខ្មែរក្រហមនៅប្រទេសបារាំងបានដំកល់ពាក្យបណ្តឹងនៅតុលាការខ្មែរក្រហម កាលពីថ្ងៃទី០៧ខែមករាឆ្នាំ២០១០៕
ដោយ៖ រតនា