ភ្នំពេញ៖ ប្រធានសហជីពសេរីកម្មករ នៃព្រះរាជាណាចក្រកម្ពុជា បានឲ្យដឹង នៅថ្ងៃសៅរ៍ ទី២៦ ខែតុលានេះ បុគ្គ លិក និងកម្មកររោងចក្រសាប្រ៊ីណាចំនួន៨នាក់ ត្រូវបានតុលាការខេត្តកំពង់ស្ពឺ ដោះលែងឲ្យនៅក្រៅឃុំជាបណ្ដោះអាសន្នហើយ។ បុគ្គលិកសហជីព និងកម្មកររោងចក្រសាប្រ៊ីណាទាំង៨ ដែលតុលាការខេត្តកំពង់ស្ពឺ ឃុំខ្លួននោះ គឺបន្ទាប់ពីពួកគេ បានធ្វើបាតុកម្មទាមទារតម្លើងប្រាក់ខែកាលថ្ងៃទី៣មិថុនា ឆ្នាំ២០១៣ កន្លងទៅនេះ។
មេដឹកនាំសហជីពកម្មរ លោក ជា មុន្នី បានឲ្យដឹងបន្ដ ថា”មកដល់ថ្ងៃនេះ គឺមានន័យ ថា ជាថ្ងៃសៅរ៍ ហើយកម្មករទាំង៨នាក់ ត្រូវបានដោះលែង ជាបឋម ហើយការដោះលែងនេះ គឺដោះលែងឲ្យនៅក្រៅឃុំ បណ្ដោះអាសន្នទេ
អត់ទាន់ជាស្ថាពរនៅឡើយទេ”។
គួរបញ្ជាក់ ថា កាលពីថ្ងៃទី១៩ ខែតុលា លោក ជា មុន្នី ប្រធានសហជីពសេរីកម្មករ នៃព្រះរាជាណាចក្រកម្ពុជា បានអំពាវនាវឲ្យកម្មករនៅទូទាំងប្រទេស ធ្វើកូដកម្ម មិនធ្វើការងារ នៅថ្ងៃទី២២ ដល់ថ្ងៃទី២៣ ខែតុលា ដើម្បីទាមទារតុលាការ ដោះលែងសមាជិកសហជីពសេរីកម្មករនិងកម្មករសាប្រ៊ីណាចំនួន៨នាក់។
ប៉ុន្ដែគម្រោង នៃការធ្វើកូដកម្មនោះ ត្រូវបានផ្អែកទៅវិញ ដោយលោក ជា មុន្នី បញ្ជាក់ ថា ដោយសារ មានការទំនាក់ទំនងពីមន្រ្ដីរដ្ឋាភិបាល មកសហជីពសេរីកម្មករ ហើយមន្រ្ដីរដ្ឋាភិបាលរូបនោះ បានអះអាង ថា នឹងធ្វើការសម្របសម្រួលជាមួយស្ថាប័នតុលាការខេត្តកំពង់ស្ពឺ ដើម្បីឲ្យមានការដោះលែងបុគ្គលិកសហជីព មេដឹកនាំសហជីព និងកម្មកររោងចក្រសាប្រ៊ីណាទាំង៨នាក់ នៅពេលឆាប់ៗ៕ ដោយ៖ រតនា