ភ្នំពេញៈ អភិបាលរាជធានីភ្នំពេញ បានព្រមានដកតំណែងអ្នកគ្រប់គ្រងផ្សាររដ្ឋទាំង២៦នៅរាជ ធានីភ្នំពេញ និងព្រមានលុបចោលភាស៊ីផ្ញើកង់-ម៉ូតូនៅតាមផ្សារទាំងឡាយណា បើសិននៅតែបន្ដយកថ្លៃលើសពីសៀវភៅបន្ទុកដែលបានកំណត់។
ថ្លែងក្នុងកិច្ចប្រជុំការអនុវត្តសណ្តាប់ធ្នាប់ និងភាស៊ីតាមផ្សារក្នុងរាជធានីភ្នំពេញនៅព្រឹកថ្ងៃទី៥ ខែមីនា លោក.ប៉ា សុជាតិ វង្ស អភិបាលរាជធានីភ្នំពេញបានមានប្រសាសន៍ថា បើសិនកន្លែងផ្ញើកង់-ម៉ូតូតាមផ្សារនីមួយៗយកលើសពីសៀវភៅបន្ទុក គឺត្រូវលុបចោលកិច្ចសន្យាតែម្ដង ហើយដាក់ពាក្យបណ្ដឹងទៅកាន់តុលាការទៀតផង ។
លោកបានបញ្ជាក់ថា ការមិនអនុវត្តតាមសៀវភៅបន្ទុកកន្លងមកនេះ បានធ្វើឱ្យមានការរិះគន់ និងថ្នាំងថ្នាក់អារម្មណ៍ ពីសំណាក់ប្រជាពលរដ្ឋ និងអាជីវករមិនតិចឡើយហើយពួកគាត់បានស្ដីបន្ទោសចំពោះរាជរដ្ឋាភិបាល និងអាជ្ញាធររាជធានីភ្នំពេញ។ លោកអភិបាលបន្តថា ចាប់ពីពេលនេះទៅសណ្តាប់ធ្នាប់នៅតាមទីផ្សារពិសេសនៅក្រៅផ្សារត្រូវតែរៀបចំអោយប្រសើរឡើងដោយមិនអោយមានភាពរញ៉េរញ៉ៃទៀតទេ។ សកម្មភាពនេះ រាជធានីភ្នំពេញមិនបណ្តែតបណ្តោយតទៅទៀតឡើយ បើប្រធានផ្សារ អភិបាលរងក្រុង អភិបាលខណ្ឌ អភិបាលរងខណ្ឌ និងមន្ត្រីចំណុះអោយសាលារាជធានីទាំងអស់ចាប់ពីពេលនេះតទៅបើធ្វើការងារមិនកើតទេត្រូវតែ ដកចេញព្រោះដល់ពេលដែលត្រូវកែទម្រង់ឱ្យបានស៊ីជម្រៅហើយ។
ទន្ទឹមនឹងនោះដែរ អភិបាលរាជធានីភ្នំពេញបានស្នើឲ្យមានការដាក់ប្រអប់សំបុត្រ នៅតាមផ្សារ នីមួយៗ ដើម្បីទទួលលិខិតស្ដីពីមតិយោបល់ និងការរិះគន់នានារបស់ប្រជាពលរដ្ឋ និងក្រុម អាជីវករ ហើយអភិបាលខណ្ឌត្រូវតែកាន់ប្រអប់សំបុត្រនោះ ដើម្បីធ្វើការពិនិត្យមើលនិងកែលំអឡើងវិញ ដែលនេះជាយន្តការដ៏ល្អក្នុងការកាត់បន្ថយភាពថ្នាំងថ្នាក់រវាងប្រជាពលរដ្ឋ និងអាជ្ញាធរ។
ដោយឡែកជុំវិញបញ្ហាសណ្ដាប់ធ្នាប់ និងសន្ដិសុខ នៅតាមបណ្តាផ្សារនានា លោកអភិបាលរាជធានីបានស្នើឱ្យមានការរៀបចំជាបណ្ដើរៗ ដោយចាប់ផ្ដើមពីផ្សារដែលប្រជាពលរដ្ឋរិះគន់ច្រើនជាងគេ។ ក្នុងនោះ សម្រាប់ខណ្ឌទួលគោក ត្រូវចាប់ផ្ដើមរៀបចំសណ្ដាប់ធ្នាប់នៅផ្សារដើមគ, ខណ្ឌ៧មករា រៀប ចំសណ្ដាប់ធ្នាប់ នៅផ្សារអូឫស្សី, ខណ្ឌចំការមន រៀបចំសណ្ដាប់ធ្នាប់នៅផ្សារអូឡាំពិក ,ខណ្ឌដូនពេញរៀបចំសណ្ដាប់នៅផ្សារធុះថ្មី ,ខណ្ឌមានជ័យ រៀបចំសណ្ដាប់ ធ្នាប់នៅផ្សារច្បារអំពៅ, ខណ្ឌដង្កោរៀប ចំសណ្ដាប់ធ្នាប់នៅផ្សារថ្នល់បត់ ,ខណ្ឌពោធិ៍សែន ជ័យ រៀបចំសណ្ដាប់ធ្នាប់នៅផ្សារជេនជូរីផ្លាហ្សា ,ខណ្ឌសែនសុខរៀបចំសណ្ដាប់ធ្នាប់ នៅផ្សារទឹកថ្លា, និងខណ្ឌឫស្សីកែវរៀបចំសណ្ដាប់ធ្នាប់ នៅផ្សារទួលសង្កែ ដើម្បីឱ្យផ្សារទាំង នេះ ក្លាយជាផ្សារគំរូមុនគេ រួចហើយបន្ដទៅរៀបចំតាមផ្សារនានា ក្នុងខណ្ឌ នីមួយៗ។
សូមជម្រាបជូនដែរថា នៅទូទាំងរាជធានីមានផ្សាររដ្ឋទាំងអស់ចំនួន ២៦ផ្សារ ឯកជន១៦ផ្សារ ផ្សារទំនើបចំនួន៣៦ ផ្សារមិនរៀបរយចំនួន១៤ និងផ្សារមីនីម៉ាតចំនួន៩៦ដែលមានច្បាប់ ត្រឹមត្រូវពីអាជ្ញាធររាជធានីភ្នំពេញ៕ ដោយ៖ ភិនរ៉ា