ភ្នំពេញ៖ គណបក្សខ្មែរអភិវឌ្ឍសេដ្ឋកិច្ច បានចាត់ទុកទង្វើរបស់គណបក្សសង្រ្គោះជាតិ ដែលគ្រោងប្ដឹងទៅអង្គការសហប្រជាជាតិ មិនឲ្យទទួលស្គាល់កម្ពុជា ជាប្រទេសសមាជិកនោះថា ជាទង្វើចង់បំផ្លាញប្រទេសជាតិ។
ក្នុងសន្និសីទកាសែត ធ្វើនៅភោជនីយដ្ឋាន Seven Bright នៅថ្ងៃទី២១ ខែតុលានេះ លោក ហួន រាជចំរើន ប្រធានគណបក្សខ្មែរអភិវឌ្ឍសេដ្ឋកិច្ច បានមានប្រសាសន៍ ដោយបង្ហាញការមិនពេញចិត្តចំពោះសកម្មភាព របស់គណបក្សសង្គ្រោះជាតិ ដែលកំពុងទាមទាររកយុត្តិធម៌ ជូនប្រជាពលរដ្ឋ តាមរយៈការធ្វើមហាបាតុកម្ម និងគម្រោងប្តឹងទៅ សហគមន៍អន្តរជាតិ មិនឲ្យទទួលស្គាល់កម្ពុជាជាប្រទេសសមាជិករបស់អង្គការសហប្រជាជាតិ ព្រមទាំងអំពាវនាវមិនឲ្យ វិនិយោគិនបរទេស មកបណ្តាក់ទុករកស៊ី ជាមួយកម្ពុជាជាដើម។ លោក ហួន ហួតចំរើន ចាត់ទុកទង្វើរបស់បក្សប្រឆាំង ថា ជាការបំផ្លាញផលប្រយោជន៍ជាតិ ដើម្បីតែបំពេញសេចក្តីត្រូវការដែលជាផលប្រយោជន៍របស់ខ្លួន។
លោក ហួន រាជចំរើន បានបន្ដ ថា”ដឹងថា គណបក្សទាំងពីរឈ្នះឆ្នោត ខ្ញុំជាគណបក្សចាញ់ឆ្នោត ខ្ញុំទទួលយក អញ្ចឹងលោកជាគណបក្សឈ្នះឆ្នោតទាំងពីរ លោកគួរអនុវត្ដរដ្ឋធម្មនុញ្ញ និងសន្ធិសញ្ញាអន្តរជាតិ ប្រសិនបើលោកចង់តវ៉ាភាពមិនប្រក្រតី តើលោកទាមទារដើម្បីប្រយោជន៍ប្រជារាស្រ្ដ ឬទាមទារដើម្បីប្រយោជន៍បក្ស”។
ជាមួយគ្នានេះ ប្រធានគណបក្សខ្មែរអភិវឌ្ឍន៍សេដ្ឋកិច្ច ក៏បានទាមទារឲ្យគណបក្សសង្គ្រោះជាតិ ចូលរួមកិច្ចប្រជុំរដ្ឋសភា ដើម្បីបញ្ចប់បញ្ហាជាប់គាំងនយោបាយ និងដើម្បីបង្កើតរដ្ឋាភិបាលមួយ ស្របតាមឆន្ទៈប្រជាពលរដ្ឋ ដែលបានបោះឆ្នោតឲ្យ ហើយបើពុំដូច្នេះទេ គណបក្សដែលមិនទទួលបានសំឡេងឆ្នោតក្នុងសភាមួយនេះ នឹងដឹកនាំធ្វើមហាបាតុកម្ម ដើម្បីជំរុញឲ្យបក្សប្រឆាំង ចូលរួមប្រជុំសភា។
យ៉ាងណាក៏ដោយ នៅថ្ងៃនេះ មិនទាន់មានប្រតិកម្មយ៉ាងណានៅឡើយទេ ពីគណបក្សសង្រ្គោះជាតិ។
គួរបញ្ជាក់ ថា គណបក្សសង្រ្គោះជាតិកំពុងប្រមូលស្នាមមេដៃ ប្រជាពលរដ្ឋនៅទូទាំងប្រទេស ដើម្បីចងក្រងជាញត្ដិ ដាក់ទៅអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីសជួយដោះស្រាយវិបត្តិនយោបាយនៅកម្ពុជាដោយឲ្យអ្នកដឹកនាំប្រទេសកម្ពុជាបច្ចុប្បន្នគោរពនិងប្រតិបត្តិឲ្យបានពេញលេញនូវកិច្ចព្រមព្រៀងទីក្រុងប៉ារីសថ្ងៃទី២៣ខែតុលាឆ្នាំ១៩៩១ និងព្យួរអាសនៈរបស់កម្ពុជា នៅអង្គការសហប្រជាជាតិផងដែរ ហើយខណៈនេះ លោក សម រង្ស៊ី កំពុងនៅបរទេសដើម្បីស្វែងរកការគំាទ្រ ពីប្រទេសមហាអំណាចចំពោះការងារ របស់គណបក្សសង្រ្គោះជាតិ៕
អត្ថបទៈគង់ រតនា ២១ ១០ ២០១៣