ភ្នំពេញ ៖ លោកឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទបានជម្រុញឲ្យបង្កើតគណៈកម្មការសម្រាប់ការដាំកូនឈើឡើងវិញនៅខេត្តព្រះសីហនុ ឲ្យបានក្នុងពេលឆាប់ៗនេះ ដើម្បីទប់ស្កាត់កុំឲ្យទឹកសមុទ្រជ្រាបចូលមក ដែលប៉ះពាល់ដល់ការប្រើប្រាស់ទឹកសាបក្នុងខេត្តនេះ។ លោកអះអាងដូច្នេះក្នុងជំនួបជាមួយប្រធានអង្គការ FAO ប្រចាំកម្ពុជាកាលពីព្រឹកថ្ងៃម្សិលមិញនេះ។លោកឧបនាយករដ្ឋមន្រ្តី យឹម ឆៃលី មានប្រសាសន៍ថា បច្ចុប្បន្ននេះ នៅខេត្តព្រះសីហនុ ទឹកប្រៃកំពុងតែលុកលុយចូលកាន់ខេត្តនេះ ដែលនាំឲ្យមានកង្វះខាតទឹកសាបសម្រាប់ប្រើប្រាស់។ នោះក៏ព្រោះតែព្រៃឈើក្នុងខេត្តដែលជាប់នឹងឆ្នេរសមុទ្រមួយនេះ ត្រូវបានកាប់បំផ្លាញដោយក្រុមឈ្មួញទុច្ចរិត ក៏ដូចជាក្រុមហ៊ុនសម្បទាន ដែលទទួលបានការអនុញ្ញាតិនាពេលកន្លងមក។
លោកឧបនាយករដ្ឋមន្រ្តីបញ្ជាក់ថា បច្ចុប្បន្នដីសម្បទានដែលផ្តល់ឲ្យក្រុមហ៊ុនសម្បទានទាំងនោះត្រូវបានរាជរដ្ឋាភិបាលលុបចោលអស់ហើយ ដូច្នេះយុទ្ធនាការដាំកូនឈើឡើងវិញ នឹងត្រូវចាប់ផ្តើមធ្វើដោយមិនអាចបង្អង់ឡើយ។លោកបានបន្តថា ប្រសិនបើខេត្តនៅជាប់មាត់សមុទ្រខ្វះខាតនូវទឹកសាបប្រើប្រាស់នោះក៏វាប៉ះពាល់ដល់ការអភិវឌ្ឍន៍នៅតំបន់ឆ្នេរ ដែលជាសក្តានុពលសម្រាប់វិស័យទេសចរណ៍យ៉ាងសំខាន់របស់ព្រះរាជាណាចក្រកម្ពុជាផងដែរ៕ដោយ ៖ ស.ស្អាត