ភ្នំពេញៈ បវេសនកាលឆ្នាំសិក្សាថ្មី២០១៣-២០១៤ចាប់ផ្តើមបើកទំព័រសិក្សានៅថ្ងៃនេះហើយ។ប្រមុខរដ្ឋាភិ បាលសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអំពាវនាវ អោយប្រមូលកុមារចូលរៀនអោយបានគ្រប់ៗគ្នា ទោះបីជាស្ថិតនៅតំបន់ដាច់ស្រយាលណាក៏ដោយអោយ តែនៅកម្ពុជា ។ ស្របពេលដែលប្រមុខរដ្ឋាភិបាលបានចេញសារលិខិតក្នុងឱកាសបើក បវេសនកាលឆ្នាំ ២០១៣-២០១៤នេះសាលាបឋមសិក្សាវត្តកោះរាជធានីភ្នំពេញបានប្រារព្ធពិធីបើកបវេសនកាលនិងចែករង្វាន់ ដល់សិស្សពូកែចំនួន១៧៥នាក់ចាប់ពីលេខ១ដល់លេខ៥ ដើម្បីលើកទឹកចិត្តដល់សិស្សានុសិស្សដែលបាន ខិតខំប្រឹងប្រែងរៀនសូត្រដើម្បីស្វែងរកចំណេះវិជ្ជាសម្រាប់អនាគតផង ដើម្បីកិត្តិយសខ្លួនឯង គ្រួសារ និង សង្គមជាតិ ។
លោក ហូយ គឹមសែ នាយកសាលាបឋមសិក្សាវត្តកោះ បានមានប្រសាសន៍ថា នៅក្នុងសាលាបឋមសិក្សាវត្ត កោះ ក៏ដូចជាសាលានានាទូទាំងប្រទេសកម្ពុជាទាំងមូលបានប្រារព្ធពិធីនេះឡើងដើម្បីបញ្ជាក់ប្រាប់ក្មួយអោយ ដឹងថា ឆ្នាំសិក្សាថ្មីបានមកដល់ហើយ ឯការសិក្សាក៏ចាប់ផ្តើមដំណើរការពីពេលនេះតទៅផងដែរដូច្នេះក្មួយៗ ទាំងអស់ត្រូវត្រៀមខ្លួនជាស្រេចដើម្បីអោយការសិក្សារបស់ក្មួយៗក្នុងឆ្នាំថ្មីទទួលបានជោគជ័យ ។
សម្តេចអគ្គមហាសេនាបតីតេជោ ហ៊ុន សែនបានថ្លែងក្នុងសារលិខិតបើកបវេសនកាលថា យើងត្រូវបន្តផ្តោតការយកចិត្តទុកដាក់ដល់ការប្រមូលកុមារអោយបានចូលរៀនគ្រប់ៗគ្នា ទោះបីជាពួកគេស្ថិតនៅទីណា, រស់នៅក្នុងស្ថានភាពបែបណាក៏ដោយ ពោលគឺត្រូវទៅអោយដល់កន្លែងណា ដែលយើងទៅមិនទាន់ដល់ពិសេសតំបន់ជួបការលំបាក, តំបន់ដាច់ស្រយាល និងតំបន់ពំ្រដែនដោយអនុវត្តពាក្យស្លោកសាលារៀនស្វែងរកកុមារ ដោយខិតខំកសាងសាលារៀនអោយកាន់តែខិតជិតទីលំនៅ របស់សិស្សានុសិស្ស ។
បើសារលិខិតរបស់សម្តេចបានអោយដឹងថាឆ្នាំ២០១២ចំនួនសាលាបឋមសិក្សារដ្ឋមាន ៦.៩១០ មានការកើនឡើងចំនួន៣៤៥ក្នុងនីតិកាលទី៤ ទន្ទឹមនឹងអត្រាពិតនៃការសិក្សា នៅបឋមសិក្សាសម្រេចបាន ៩៧ភាគរយ នៅឆ្នាំសិក្សា២០១២-២០១៣ ជាមួយនឹងអត្រាបញ្ចប់ការសិក្សាជាង ៨៧ភាគ រយ។ ចំនួនអនុវិទ្យាល័យរដ្ឋមាន១.២១៤នៅឆ្នាំ២០១២ គឺមានការកើនឡើងចំនួន៩២ ហើយអត្រារួមនៃការសិក្សានៅមធ្យមសិក្សាបឋមភូមិសម្រេចបានជាង ៥៣ភាគរយនៅឆ្នាំសិក្សា២០១២-២០១៣ ៤០ភាគរយ ។
វិទ្យាល័យរដ្ឋនៅឆ្នាំ២០១២ មានចំនួន៤៣៣ គឺមានការកើនឡើងចំនួន៨៤ ក្នុងនីតិកាលទី៤ ហើយអត្រារួមនៃការសិក្សាមធ្យមសិក្សាទុតិយភូមិសម្រេចបានជាង ២៧ភាគរយជាមួយនឹងអត្រាបញ្ចប់ការសិក្សាប្រមាណ ២៧ភាគរយ៕ ដោយៈ រតនា