ភ្នំពេញ៖ស្របពេលដែលប្រទេសកម្ពុជាត្រៀមខ្លួនធ្វើសមាហរណកម្មទៅក្នុងសហគមអាស៊ាននៅឆ្នាំ២០១៥ខាង មុខនេះទាំងស្ថាប័នរដ្ឋនិងឯកជនបានខិតខំពង្រឹងសមត្ថភាពរបស់ដើម្បីត្រៀមធ្វើការប្រកួតប្រជែង និងដណ្តើមទី ផ្សារការងារ ជាមួយបណ្តាប្រទេសជាសមាជិកក្នុងតំបន់។ យ៉ាងណាមិញក្រសួងអប់រំយុវជននិងកីឡាបានប្រកាស ចាប់ផ្តើមអនុវត្តការពង្រឹងគុណភាពនិងសមត្ថភាពអប់រំរបស់ខ្លួនពីពេលឥឡូវនេះតទៅ។រដ្ឋលេខាធិការក្រសួងអប់រំ យុវជន និងកីឡាលោក អ៊ឹម កុច បានថ្លែងឲ្យដឹងយ៉ាងដូចនេះនៅក្នុងឱកាសបើកសិក្ខាសាលាបូកសរុបលទ្ធផលនៃ ការនចុះស្រាវជ្រាវវាយតម្លៃផលប៉ះពាល់ សាលារៀនដែលខូចខាតដោយសារទឹកជំនន់ក្នុងវិស័យអប់រំឆ្នាំ២០១៣ ក្រោមការរៀបចំរបស់នាយកដ្ឋានអភិវឌ្ឍន៍កម្មវិធីសិក្សានៃក្រសួងអប់រំយុវជន និងកីឡាព្រឹកថ្ងៃទី២៧ ខែធ្នូ ឆ្នាំ២០១៣ នៅសណ្ឋាគារអ៊ីមភើរៀលរាជធានីភ្នំពេញ។
លោក អ៊ឹម កុច មានប្រសាសន៍ថាក្រសួងអប់រំយុវជន និងកីឡាកំពុងធ្វើកំណែទម្រង់នៃការប្រឡងធ្វើយ៉ាងណាដើម្បីឲ្យមានការទទួលខុសត្រូវច្បាស់លាស់ នូវកម្មវិធីសិក្សាធ្វើឲ្យបានតាមលំនាំប្រទេសសង្ហបុរី។លោកបន្តថាការពង្រឹងគុណភាពនេះត្រូវចាប់ផ្តើមអនុវត្តន៍ពីការប្រឡងឆមាសលើកទី១តទៅ ហើយចំណុចចាប់ផ្តើមគ្រូដែលជាអ្នកតាក់តែងត្រូវរក្សាការសម្ងាត់របស់ខ្លួន។បានន័យថា គ្រូរក្សាការសម្ងាត់នូវរាល់វិញ្ញាណសាររហូតដល់ពេលប្រឡងទើបបញ្ចេញវិញ្ញាណសារឡើងទៅកត់លើក្តាខៀន។ ការងារនេះក្រសួងបានបញ្ជូនដល់សាលារួចហើយគ្រូតាមសាលានីមួយៗត្រូវទទួលខុសត្រូវខ្លួនឯង។ជាមួយគ្នានេះលោកមានសង្ឃឹមថា គ្រូនឹងសប្បាយចិត្តហើយចូលរួមយ៉ាងស
កម្មក្នុងការទទួលខុសត្រូវរក្សាការសម្ងាត់បានល្អនិងឲ្យក្លាយជាទម្លាប់ល្អមួយចាប់ពីប្រឡងឆមាសទី១នេះទៅមុន
នឹងបោះមួយជំហានទៅមុខទៀត ដើម្បីរិះរកវិធីដែលល្អជាងនេះ។
លោករំពឹងថា លទ្ធផលការសិក្សារបស់សិក្ខាសាលាថ្ងៃនេះ គឺទាំងអស់គ្នាបានធ្វើដោយយកចិត្តទុកដាក់ហើយបានរកឃើញនូវផលប៉ះពាល់នៃការខូចខាតសាលារៀនទាំង១២៨សាលា ដោយវាយតម្លៃផលប៉ះពាល់ខូចខាតទំហំធំធេងគឺទាមទារឲ្យមានការឆ្លើយតប និងសង្គ្រោះបន្ទាន់ ទាំងការជួសជុលនិងការស្តារហេដ្ឋារចនាសម្ព័ន្ធឡើងវិញ។ជាមួយគ្នានេះដែរលោកបានផ្តោតការយកចិត្តទុកដាក់មួយទៀត លើការការពារនិងត្រូវរកវិធីសាស្រ្តដើម្បីឲ្យសាលាទាំងនោះបញ្ជៀសបានពីគ្រោះទឹកជំនន់ ការខូចខាតអគារការបាត់បង់សៀវនិងសម្ភារៈសិក្សា។ដូចនេះក្រុមការងារនិងអង្គការពាក់ព័ន្ធទាំងអស់នឹងបន្តកិច្ចសហប្រតិបត្តិការល្អជាមួយគ្នាក្នុងគោលដៅរួមតែមួយគឺជួយដល់សាលារៀនជាច្រើនដែលកំពុងត្រូវការស្តារនិងជួសជុលឡើងវិញក្រោយពីលិចលង់ដោយគ្រោះទឹកជំនន់។ម៉្យាងទៀតជួយដល់ការអភិវឌ្ឍកម្មវិធីការលើកកម្ពស់គុណភាពអប់រំឲ្យកាន់តែប្រសើរឡើង ក្នុងការត្រៀមខ្លួនធ្វើសមាហរណកម្មទៅក្នុងតំបន់អាស៊ានតាមពាក្យស្លោក សហគមន៍តែមួយ វាសនាតែមួយ ដែលត្រូវគិតគូរពីគុណភាពអប់រំចាប់ពីពេលនេះតទៅ៕ ដោយ ៖ សស្អាត