ភ្នំពេញ៖ កាលពីព្រឹកថ្ងៃទី៣០ ខែកញ្ញា ឆ្នាំ២០១៣ បុគ្គលិករបស់អង្គការ PSI ចំនួន៤៤នាក់ បាននាំគ្នាឈរកាន់បដា នៅខាងមុខទីស្នាក់ការរបស់ខ្លួន ស្ថិតនៅសង្កាត់បឹងកេងកង១ ខណ្ឌចំការមន រាជធានីភ្នំពេញ ដើម្បីស្រែកទាមទារឲ្យប្រធានអង្គការPSI ចូលខ្លួនមកដោះស្រាយក្នុងរឿង បញ្ឈប់បុគ្គលិកចេញពីការងារដោយគ្មានហេតុផលច្បាស់លាស់ និងគ្មានប្រាក់បំណាច់ឆ្នាំផងដែរ។
លោក រឹម បូរ៉ា ប្រធានសហពន្ធ័សហជីពកម្មករប្រជាធិបតេយ្យខ្មែរបានប្រាប់ឲ្យដឹងថា លោក កំពុងអន្តរាគមន៍ជួយបុគ្គលិកទាំង៤៤នាក់នេះ ដែលបានទទួលរងការរំលោភបំពាន លើលក្ខខណ្ឌការងារ លោកបន្តថា បញ្ហានេះបានកើតមានជាយូរណាស់មកហើយ រហូតត្រូវបានដោះស្រាយគ្នានៅឯក្រុមប្រឹក្សាអាជ្ញាកណ្តាល ដោយខាងក្រុមប្រឹក្សាអាជ្ញាកណ្តាល បានបង្គាប់ឲ្យអង្គការPSI ត្រូវគណនាឡើងវិញនូវប្រាក់បំណាច់ឆ្នាំជួសការឈប់សម្រកប្រចាំឆ្នំា ដោយគិតចាប់ពីថ្ងៃចូលធ្វើការដំបូងឆ្នាំ១៩៩៤ ។
អ្នកស្រីជុំ រស្មី បុគ្គលិកផ្នែកវេចខ្ទប់ស្រោមអនាម័យ ថ្នាំលេប ថ្នាំចាក់ពន្យាកំណើត...បានប្រាប់ភ្នំពេញប៉ុស្តិ៍ថាកាលពីព្រឹកថ្ងៃចន្ទ័ថា បុគ្គលិកនៅទីនេះ ខ្លះចូលធ្វើការងារចាប់តាំងពីឆ្នាំ១៩៩៤ ខណៈពេលដែលគ្មានមនុស្សណាម្នាក់ដែលចង់មកធ្វើការនៅទីនេះ។ អ្នកស្រីបញ្ជាក់ថា៖«ខ្ញុំមិនចង់និយាយ អំពីការរំលោភលើកម្លាំងការងារ ដែលកើតមានកន្លងមកនោះទេ ប៉ុន្តែយើងគ្រាន់តែចង់បានប្រាក់បំណាច់ឆ្នាំដែលពួកយើងត្រូវទទួលវិញតែប៉ុណ្ណោះ»។
លោកផា រ៉ែន អនុប្រធានការិយាល័យ នៃនាយកដ្ឋានអធិការកិច្ចក្រសួងការងារ បានឲ្យដឹងថា កន្លងមកនេះ លោកបានជម្រុញរឿងនេះឲ្យឈានដល់ការដោះស្រាយគ្នានៅក្រុមប្រឹក្សាអាជ្ញាកណ្តាល រួចហើយ ប៉ុន្តែនៅតែមិនមានលទ្ធផលល្អសម្រាប់ភាគីទាំងសងខាង ដោយសារតែខាងអង្គការPSI បានដាក់បណ្តឹងជំទាស់ក្នុងរឿងនេះ ទើបបណ្តាលឲ្យមានបញ្ហាកូដកម្មកើតឡើង។ លោកបញ្ជាក់ ថា៖«ខ្ញុំមិនមានវិធានការណ៍អ្វី ដើម្បីជម្រុញទៀតទេ ព្រោះសំនុំរឿងវាបានផុតពីដៃរបស់ខ្ញុំហើយ»។
បន្ទាប់ពីកូដកម្មអហឹង្សា ត្រូវបានធ្វើឡើងអស់រយៈពេល៣ម៉ោងកន្លងទៅ ចាប់ពីម៉ោង៧រហូត ដល់ម៉ោង៩ និង ២០នាទីព្រឹក បុគ្គលិកទំាង៤៤នាក់បាននាំគ្នាធ្វើដំណើរ ទៅកាន់ស្ថានទូតសហរដ្ឋអាមេរិកប្រចាំនៅកម្ពុជា ដើម្បីដាក់សំណើរសុំអន្តរាគមន៍ជាថ្មីក្នុងរឿងនេះ។ ដោយៈ អភិរក្ស