ភ្នំពេញ៖ ក្រោយពីថ្ងៃបោះឆ្នោតជ្រើសរើសតំណាងរាស្រ្តអាណត្តិទី៥ ថ្ងៃទី២៨កក្កដា២០១៣រួច​មក គេឮតែ​​ពាក្សថាមហាបាតុកកម្មឡើងសាំត្រចៀកទៅហើយ បើគិតជារូបរៀងនៃមហាបាតុ កម្មដែលមាន​ទ្រង់ទ្រាយ​ធំៗ​​មកដល់ពេលនេះគឺមាន២លើកស្មើនិង៤ថ្ងៃពេញតែម្តង គឺថ្ងៃទី៧-១៥-១៦-និងថ្ងៃទី១៧កញ្ញា នេះ​មិន​គិតពី​បាតុ​​កម្មតវ៉ាឬទាម​ទារបស់បងប្អូនកម្មករ កម្មការនីរោងចក្រសហគ្រាសនោះទេ។ពាក្សមហាបាតុកម្ម​បានក្លាយទៅ​​ជា​​ចំណីដ៏ឆ្ងាញ់មាត់របស់អ្នកនយោបាយមួយផ្នែកនៅកម្ពុជា ក្នុង​អាណត្តិ​ទី៥ ​ក្រោយការបោះឆ្នោតឆ្នាំ​​២០១៣។​ ​ហើយក៏ជាមេសូត្ររត់មាត់​របស់គណបក្ស​សង្រ្គោះជាតិ ក្នុងការតវាទាមទារតុល្យភាពអំណាចនៅ​​ក្នុង​​​​​​​ស្ថាប័នជាតិ។​ ជាថ្មីម្តងទៀតគណបក្សសង្គ្រោះជាតិបានប្រ​កាស​ធ្វើមហាបាតុកម្មនៅទូទាំងប្រទេសនៅថ្ងៃ​ទី​​៦​ខែ​តុលាឆ្នាំ២០១៣ក្រោយពេលពិធីបុណ្យភ្ជុំបិណ្ឌ​បាន​បញ្ចប់ដោយមិនខ្វល់ពីសេចក្តីសុខក្នុងការរស់នៅរបស់​​ប្រជាពលរដ្ឋ ឬ ផលប៉ះពាល់ដល់ការ​វិនិយោគ និងភ្ញៀវទេសចរណ៍អ្វីនោះឡើយ។​

នៅថ្ងៃម្សិលមិញនេះអ្នកនាំពាក្យរបស់គណបក្សសង្គ្រោះជាតិលោកយ៉ែមបុញ្ញឫទ្ធិបានប្រាប់បណ្តាញ​ព័ត៌មាន ​ពីការគម្រាមធ្វើមហាបាតុកម្មជាថ្មីនៅថ្ងៃទី៦ខែតុលាឆ្នាំ២០១៣ខាងមុខនេះថាគណបក្ស​សង្គ្រោះជាតិ​គ្រោងធ្វើ​​មហា​បាតុកម្មមួយ​នៅទូទាំងប្រទេសជាថ្មីដើម្បីបញ្ជាក់ពីគោលជំហររបស់​គណ​បក្សចំពោះ​ប្រជាពលរដ្ឋ​ដែល​​ជា​ម្ចាស់​ឆ្នោត។ហើយការចូលរួមធ្វើមហាបាតុកម្មរបស់ប្រជាពលរដ្ឋ​នៅ​ក្រោយ​ថ្ងៃ​បុណ្យ​ភ្ជុំ​បិណ្ឌ​នោះគេមិន​​អាច​​កំណត់​ពី​ចំនួននៃការចូលរួមនោះបានទេដោយការធ្វើមហាបាតុ​កម្មនេះប្រជាពលរដ្ឋមានសិទ្ធិចូលរួម​​ដោយ​ស្ម័គ្រចិត្ត។​

លោកយ៉ែមបុញ្ញឫទ្ធិ បញ្ជាក់ថាការគំរាមបង្ហោះខ្សែអាត់សំឡេងក្នុងកិច្ចប្រជុំដឹកនាំដោយលោក​សមរង្ស៊ីពី​​សំណាក់​សម្តេចតេជោនោះវាមិនបានប៉ះពាល់ដល់គណបក្សសង្គ្រោះជាតិទាល់តែ​សោះព្រោះ​គណបក្សធ្វើអ្វី​​មួយ​ដោយតម្លាភាពគ្មានគំនិតទុច្ចរិតនោះទេ។ប៉ុន្តែបើមានការចាក់សំឡេងគឺគណ​បក្សសង្គ្រោះជាតិ​ស្នើសុំឲ្យ​​ចាក់​សំឡេងទាំងស្រុងតែម្តងនិងនៅពេលប្រជុំលើកក្រោយសុំឲ្យមាន​ការផ្សាយផ្ទាល់តាមទូរទស្សន៍ទៀតផង។​

លោកបន្តទៀតថានៅសប្តាហ៍ក្រោយគណបក្សសង្គ្រោះជាតិនឹងធ្វើការជូនដំណឹងទៅកាន់សាលារាជ​ធានី​​ភ្នំពេញ​ព្រោះគណបក្សនឹងរៀបចំធ្វើបាតុកម្មនេះចំនួនពីរលើកដោយនៅថ្ងៃទី៦ខែតុលា​គណបក្ស​នឹងជួប​​ជាមួយ​ប្រជាពលរដ្ឋបញ្ជាក់ពីគោលជំហរនិងបន្តការទាមទាររបស់ខ្លួនជូនមហាជននិងមួយទៀត​ នឹងរៀប​ចំធ្វើ​​ញត្តិ​ប្រមូល​ស្នាមមេដៃប្រជាពលរដ្ឋហើយនៅថ្ងៃទី២៣ខែ​តុលាឆ្នាំ២០១៣នឹង​ជួប​ជុំជាមួយ​ប្រជាពលរដ្ឋ​ជាថ្មី​​ទៀត​ដើម្បីយកញត្តិទៅជូន​អង្គការសហប្រជាជាតិ។​ប៉ុន្តែរហូតមកដល់​ពេល​នេះ​គេឃើញ​តំណាងរបស់​អង្គការ​​សហ​ប្រជាជាតិប្រចាំកម្ពុជាបានថ្លែងសំណូមពរឲ្យសភាឈ្នះ​ឆ្នោត​ទាំងពីរអាច​ចូលរួម​ប្រជុំ​ហើយ​ដោះស្រាយ​​បញ្ហា​វិបត្តិន​យោបាយ​នៅកម្ពុជាឲ្យចប់រួចរាល់​ដោយ​សន្តិវិធីសិន។​

សូមរំលឹកថានៅក្នុងកិច្ចប្រជុំគណៈរដ្ឋមន្រ្តីជាលើកដំបូងថ្ងៃទី២៥ខែកញ្ញាឆ្នាំ២០១៣កន្លងទៅនេះសម្តេចតេជោ​ហ៊ុនសែននាយករដ្ឋមន្រ្តីបានគំរាមបង្ហោះខ្សែអាត់សំឡេងនៃកិច្ចចរចាដែលលោកសមរង្ស៊ីទទួលស្គាល់លទ្ធ​ផលឆ្នោតមិនទាមទារបង្កើតគណៈកម្មការឯករាជ្យព្រមទាំងគាំទ្រ​សម្តេច​ជា​នាយករដ្ឋមន្រ្តី។ចំណែក​លោក​ឧបនា​​យក​រដ្ឋ​មន្រ្តីទៀបាញ់រដ្ឋមន្រ្តីក្រសួងការពារជាតិវិញបានថ្លែងថាកងទ័ពអាចនៅគ្រប់ទី​កន្លែងក្នុង​ដែន​អធិប​​​តេយ្យ​​​ភាពកម្ពុជាដើម្បីការពារព្រះមហាក្សត្រនិងរដ្ឋធម្មនុញ្ញ។​លោកបន្តថា ការធ្វើមហាបាតុកម្មទូទាំង​ប្រទេស​​អាច​​ធ្វើទៅបានតែស្ថិតនៅក្រោមក្របខណ្ឌច្បាប់បើក្រៅ​ក្របខណ្ឌច្បាប់មិនបាននោះទេ៕​

ដោយ៖ ស.ស្អាត