ភ្នំពេញ៖គណៈប្រតិភូសមាគមធុរកិច្ចវិនិយោគចិនមានបំណងវិនិយោគលើវិស័យជាច្រើននៅកម្ពុជាដូចជាវិស័យថាមពលរ៉ែកសិកម្មទេសចរណ៍វប្បធម៌និងសំណង់។
អ្នកនាំពាក្យព្រឹទ្ធសភា លោកម៉មប៊ុននាងបានឲ្យដឹងនៅក្រោយជំនួបទ្វេភាគីរវាងគណៈប្រតិភូសមាគមធុរកិច្ចចិនដឹកនាំដោយលោកXia Lingshin ប្រធានសមាគមធុរកិច្ចចិន-កម្ពុជាជាមួយលោកបណ្ឌិតទេពងនអនុប្រធានទី២ព្រឹទ្ធសភានាព្រឹកថ្ងៃទី១ខែកក្កដាឆ្នាំ២០១៣នេះនៅអគ្គលេខាធិការដ្ឋានព្រឹទ្ធសភា។
អ្នកនាំពាក្យរូបនេះបានប្រាប់ថាក្នុងជំនួបនេះលោកXia Lingshin ប្រធានគណៈប្រតិភូបានជំរាបជូនពីបំណងរបស់ក្រុមវិនិយោគនៃសមាគមធុរកិច្ចចិនមកកម្ពុជានាពេលនេះក្នុងបំណងចូលរួមខួបលើកទី៥៥ឆ្នាំនៃទំនាក់ទំនងការទូតចិន-កម្ពុជាដើម្បីពង្រឹងពង្រីកទំនាក់ទំនងមិត្តភាពសាមគ្គីភាពនិងកិច្ចសហប្រតិបត្តិការរវាងប្រទេសទាំងពីរកម្ពុជា-ចិនឲ្យកាន់តែល្អប្រសើរជាងមុនថែមទៀត។ក្នុងដំណើរនេះគណៈប្រតិភូសមាគមធុរកិច្ចចិន-កម្ពុជាក៏មានគោលដៅសំខាន់លើការវិនិយោគលើវិស័យជាច្រើននៅកម្ពុជាដូចជាវិស័យថាមពលរ៉ែកសិកម្មទេសចរណ៍វប្បធម៌និងសំណង់។
ជាការឆ្លើយតបលោកបណ្ឌិតទេពងនអនុប្រធានទី២ព្រឹទ្ធសភាក្នុងនាមស្ថាប័នព្រឹទ្ធសភាបានស្វាគមន៍និងបានសន្យាថានឹងជួយបង្កលក្ខណៈគ្រប់បែបយ៉ាងលើការងារវិនិយោគលើគ្រប់វិស័យទាំងអស់ដែលគណៈប្រតិភូសមាគមធុរកិច្ចវិនិយោគចិនចង់បាន។
អ្នកនាំពាក្យព្រឹទ្ធសភាបានបញ្ជាក់ទៀតថាគណៈប្រតិភូសមាគមធរកិច្ចចិនដែលអញ្ជើញមកកម្ពុជានាពេលនេះគឺមានតំណាងទាំងអស់ជាង៥០ខេត្តរហូតដល់ទីបេនៃប្រទេសចិន៕
ដោយ៖ ស្រីផល