ភ្នំពេញៈ មេដឹកនាំគណបក្សប្រឆាំងធំជាងគេនៅកម្ពុជា កំពុងរៀបចំឯកសារសំណើរផ្ញើទៅ លោក ប៉ាន គីមូន អគ្គលេខាធិការអង្គការសហប្រជាជាតិ ព្យួរជាបណ្ដោះអាសន្ននូវអាសនៈរបស់កម្ពុជានៅអង្កការសហប្រជាជាតិ។ នេះបើតាមការឲ្យដឹងពីលោក យ៉ែម បុញ្ញារិទ្ធ មន្រ្តីជាន់ខ្ពស់គណបក្សសង្គ្រោះជាតិនៅថ្ងៃទី២៦ខែកញ្ញាឆ្នាំ២០១៣។ បើតាមការឲ្យដឹងពីមន្រ្តីគណបក្សប្រឆាំងរួបនេះ មេដឹកនាំគណបក្សសង្រ្គោះជាតិទាំងពីររូប កំពុងរៀបចំគម្រោងជាច្រើន ដើម្បីទាមទារឲ្យមានការបង្កើតគណៈកម្មការពិសេសស៊ើបអង្កេតភាពមិនប្រក្រតីនៃការបោះឆ្នោត គម្រោងធ្វើមហាបាតុកម្មអហិង្សាម្តងទៀតស្នើរបណ្ដាអ្នកវិនិយោគទុនបរទេសកុំឲ្យសហការជាមួយរដ្ឋាភិបាលកម្ពុជា និងគម្រោងដាក់ញ្ញត្តិទៅអង្គទូតនៃប្រទេសមួយចំនួនទៀតជាដើម ។
លោកបញាក់ថា៖« ក្នុងចំណោមគម្រោងទាំងនោះលោកប្រធាន សម រង្ស៊ី និង លោកប្រធាន កឹម សុខា ក៏បានត្រៀមស្នើរទៅអង្គការសហប្រជាជាតិព្យួរអាសនៈរបស់កម្ពុជាផងដែរ។ យើង នឹងអំពាវនាវដើម្បីស្វែងរកការពិត និងភាពស្របច្បាប់ជុំវិញការបោះឆ្នោតនៅកម្ពុជា។ ក្រុមអ្នកវិនិយោគទុនក៏ត្រូវតែគិតរឿងនេះដែរ។ បើអ្នកសហការជាមួយរដ្ឋាភិបាលខុសច្បាប់ ពេលដែលគណបក្សសង្គ្រោះជាតិឡើងគ្រប់គ្រងប្រទេសយើងមិនទទួលខុសត្រូវនោះទេ» ។ ឆ្លើយតបនឹងការលើកឡើងរបស់មន្ត្រីបក្សប្រឆំាង លោក ជាម យៀប មន្រ្តីជាន់ខ្ពស់គណបក្សប្រជាជនកម្ពុជា បានអះអាងថា សកម្មភាពរបស់មេដឹកនាំគណបក្សសង្គ្រោះជាតិខាងលើនេះ គឺជាសិទ្ធិរបស់គណបក្សប្រឆាំង ប៉ុន្តែលោកបានសម្ដែងការសោកស្ដាយ ដោយថាការសម្ដែងសិទ្ធិនោះ មិនមែនជាការស្វែងរកប្រយោជន៍ជូនជាតិ និងប្រជាជានកម្ពុជា។លោកជាមយៀបបានហៅគម្រោងរបស់គណបក្សសង្គ្រោះជាតិខាងលើនេះថា ទង្វើក្បត់ជាតិ និងក្បត់ប្រជាជនកម្ពុជាផងដែរ ។ សមាជិកសភាមកពីគណបក្សប្រជាជនកម្ពុជា រូបនេះបានបញ្ជាក់ថា៖« គាត់ធ្វើយ៉ាងដូច្នេះ មិនខុសពីការយកជើងរាទឹកនោះទេ ។ ប្រទេសត្រូវការអភិវឌ្ឍន៍តែអ្នកបែរជាមានគំនិតបំផ្លាញទៅវិញ ។ លោក ប៉ាន គីមូន គាត់បានសរសើរកម្ពុជា ថាបានរៀបចំការបោះឆ្នោតដោយសន្តិភាព គ្មានអំពើហិង្សា ។ គេដើរដល់ណាដល់ណីអស់ហើយ គាត់នៅតែស្រែក និងធ្វើសកម្មភាពខុសពីច្បាប់ ។ អង្គការសហប្រជាជាតិ គឹចេះពិនិត្យហើយ » ៕ ដោយៈ រតនា