ភ្នំពេញ៖ កាកបាទក្រហមកម្ពុជារាជធានីភ្នំពេញ និង អង្គការបម្រើសេវាសង្គមដើមឈើ (HAPPY TREE
  SOCIAL SERVICES) បានចុះហត្ថលេខា លើកិច្ចសហប្រតិបត្តការជាដៃគូនិងបង្កើនការយកចិត្តទុកដាក់លើ
វិស័យមនុស្សធម៌ ក្នុងការជួយដល់ជនរងគ្រោះ និងងាយរងគ្រោះដូចជា កុមារកំព្រាផ្ទុកមេរោគអេដស៍/ជម្ងឺអេ
ដស៍​និងកុមារកំព្រាគ្មានទីពឹង ក្នុងភូមិសាស្រ្តរាជធានីភ្នំពេញ។

ពិធីនេះធ្វើឡើងនារសៀលថ្ងៃទី២៨ខែឧសភាឆ្នាំ២០១៣នៅសណ្ឋាគារឡឺរ៉ូយ៉ាល់ ក្រោម​​​​វត្ត​មាន​ លោក ប៉ា
សុជាតិវង្ស អភិបាលនៃគណៈអភិបាលរាជធានីភ្នំពេញ និងមានការចូលរួមធ្វើបឋកថាពីលោក Nick Vujicic
ដែលជាវាគ្មិនដ៏ល្បីល្បាញមួយរូបនៅលើពិភពលោក​និងជាភ្ញៀវពិសេស នៅក្នុងពិធីចុះកិច្ចព្រមព្រៀងគ្នានេះ
ដែរ ។

ថ្លែងនៅក្នុងពិធីនោះ លោក ប៉ា សុជាតិវង្ស បានលើកឡើងថា វត្តមានរបស់អង្គការ HAPPY TREEពិតជាកិត្តិ
យសមួយរបស់កាកបាទក្រហមកម្ពុជាថែមទៀត ដែលបានបង្ហាញពីកិច្ចសហប្រតិ​បត្តិការនិងពង្រឹងភាពជា
ដៃគូជាមួយបណ្តាញអង្គការសង្គមស៊ីវិល ដើម្បីបង្កើនការយកចិត្តទុក​ដាក់​លើវិស័យមនុស្សធម៌នៅកម្ពុជាឲ្យ
កាន់តែប្រសើឡើងថែមទៀត។ មួយវិញទៀត វត្តមានរបស់ Nick Vujicic ដែលជាវាគ្មិនដ៏ល្បីល្បាញនៅលើ
ពិភពលោកនៅកម្ពុជាលើកនេះ បានបង្ហាញនូវសកម្មភាពដ៏អស្ចារ្យមួយក្នុងរយៈពេលកន្លងមក និងជាសារ
ដ៏សំខាន់ដើម្បីជម្រាបដល់ជនពិការទាំងឡាយឲ្យមានស្មារតីខិតខំតស៊ូដើម្បីជីវិត ។

លោកអភិបាលបន្តថា មិនថាតែជនពិការ ឬក៏មិនពិការនោះទេ អ្នកណាៗសុទ្ធតែមានតម្លៃ នៅក្នុងសង្គមនិង
ការរស់នៅប្រកបកិច្ចការចិញ្ចឹមជីវិត   និងការតាក់តែងឲ្យពិភពលោកយើងនេះកាន់​តែ​​​​ស្រស់បំព្រងឡើងឥត
ឈប់ឈរពីមួយថ្ងៃទៅមួយថ្ងៃ។ ទន្ទឹមនឹងនេះអ្វីដែលយើងគួរតែទទួលបាន ផ្តល់នូវតម្លៃមួយថ្មីថែមទៀតនោះ អ្នកដែលពិការខាងផ្លូវកាយតែមានឆន្ទៈមោះមុត មិនត្រឹមតែរស់នៅដោយមានតម្លៃថ្លៃថ្នូប៉ុណ្ណោះទេតែបានបំ
បែកឯកទកម្មដ៏អស្ចារ្យមួយនៅក្នុងជីវិត ជាមួយនឹងការ លែងកំសាន្ត ការប្រព្រឹត្តជីវិត និងការដាស់តឿនឲ្យ
ជនទាំងឡាយដែលពិការខាងផ្លូវចិត្តមានស្មារតីរឹងមាំឡើងវិញផងដែរ ។

លោក ប៉ា សុជាតិវង្ស   បានបង្ហាញទៀតថា ដោយមានការឯកភាពពី  សម្តេចកិត្តិព្រឹទ្ធបណ្ឌិត ប៊ុនរ៉ានី  ហ៊ុន
សែន ប្រធានកាកបាទក្រហមកម្ពុជា មានឪកាសចាប់ដៃគូរជាមួយនឹងអង្កការ HAPPY TREEចាប់ពីពេលនេះ
តទៅ ដើម្បីផ្លាស់ប្តូរព័ត៌មានអំពីសកម្មភាពរបស់ខ្លួនលើផ្នែកមនុស្សធម៌ ការយកចិត្តទុកដាក់ថែទាំកុមារ អំពី
ចំណីអាហារ អនាម័យទូទៅ និងបណ្តុះបណ្តាលឲ្យមានមុខរបរ អាកប្បកិរិយាល្អ និងទំនាក់ទំនងក្នុងសង្គម
ដើម្បីលើកទឹកចិត្តកុមារ និងជនពិការឲ្យមានក្តីសង្ឃឹមក្នុងជីវិត។

លោកវាគ្មិន NickVujicicបានថ្លែងថា នេះពិតជាកិត្តិយសណាស់ដែលលោកបានមកប្រទេស​កម្ពុជាជាលើក
ទី២និងមានបំណងស្រាវជ្រាវនៅក្នុងប្រទេសនេះ ថាតើខ្ញុំអាចជួយអ្វីខ្លះខណៈ​​ដែលខ្ញុំមានបំណងជួយដល់
ប្រទេសផ្សេងៗនៅលើពិភពលោក ។ ខ្ញុំមកលើកនេះ មិនមែនមក លើកទឹកចិត្តដល់មនុស្សទេឬក៏លើកទឹក
ចិត្តដល់ជនពិការ កុមារកំព្រានោះទេ គឺ សម្រាប់មនុស្សគ្រប់ៗគ្នានៅក្នុងប្រទេសកម្ពុជា ។

លោក Nick Vujicicបន្តថា ថ្ងៃនេះលោកបានឃើញកិច្ចសហការណ៍យ៉ាងល្អរវាងកាកបាទក្រហមកម្ពុជាសា
ខារាជធានីភ្នំពេញ ជាមួយនឹងអង្គការ HAPPY TREE (ដើមឈើសប្បាយ) ។ លោកមានសេចក្តីរំភើបមែនទែនដែលខ្ញុំត្រូវបានគេចាត់ទុកជាមិត្តរបស់កម្ពុជា ឲ្យខ្ញុំបានលើកទឹកចិត្ត ដល់
ប្រជាជាតិមួយនេះជាមួយនឹងសេចក្តីស្រលាញ់ ជាមួយនឹងការគោរព ជាមួយចិត្តសប្បុរសដោយ ឲ្យប្រជា
ជនកម្ពុជាជួយប្រជាជនកម្ពុជាដូចគ្នា ។ ហើយអ្វីដែលលោកចង់ធ្វើគឺរកមនុស្ស១លាននាក់ ឲ្យពួកគេបាន
បរិច្ចាក១ដុល្លាម្នាក់ក្នុង១ខែ បាន១លានដុល្លារសម្រាប់ជួយដល់អ្នកដទៃ។

លោកបញ្ជាក់ថា មានជាតិសាសន៍ជាច្រើននៅលើពិភពលោកដែលគ្មានការគោរពទាល់តែសោះសម្រាប់
ជនពិការ ហើយនៅក្នុងជំនឿរបស់ពួកកុលសម្ព័ន្ធមួយចំនួនគេបានសម្លាប់ក្មេងណាដែល​​ពិការ ។
ប៉ុន្តែសម្រាប់ប្រជាជាតិមួយនេះ(កម្ពុជា)មើលទៅហាក់ដូចជាមានសន្ទុះខ្លាំងណាស់ក្នុងការជួយដល់ជន
ពិការ ហើយយើងមានកិច្ចការច្រើនណាស់ត្រូវធ្វើជាមួយគ្នាក្នុងរយៈពេលវែងនៅកម្ពុជា ។

គួរបញ្ជាក់ផងដែរថា  កិច្ចព្រមព្រៀងដែលបានចុះហត្ថលេខាខាងលើនេះ   នៅពេលអនុវត្តជាក់ស្តែង ភាគី
ទាំងពីរនឹងពិភាក្សាលើគម្រោងផែនការលំអិតបន្ថែមទៀត ដើម្បីសហការជួយគ្នាទៅវិញទៅមក​​​ដោយមាន
ការចុះហត្ថលេខាលើកិច្ចព្រមព្រៀងបន្ថែមជារៀងរាល់ឆ្នាំ ៕ ដោយ៖ សំអាត