រាជធានីភ្នំពេញ៖ អាជ្ញាធររាជធានី បានដាក់កម្លាំងនគរបាលចម្រុះជាច្រើនរយនាក់ នៅតាមបណ្តាផ្លូវសំខាន់ៗ នៅទីក្រុងភ្នំពេញ កាលពីព្រឹកថ្ងៃទី២៣ ខែកញ្ញា ឆ្នាំ២០១៣នេះ ដើម្បីធ្វើការរឹតបណ្តឹងសន្តិសុខសារជាថ្មីម្តងទៀត ខណៈពេលគណបក្សសង្រ្គោះជាតិ បានប្រកាសថាគ្រោងធ្វើមហាបាតុកម្មអហឹង្សាម្តងទៀត នៅម្តុំបរិវេណទីលានប្រជាធិបតេយ្យ ប្រសិនបើការប្រជុំរដ្ឋសភាមិនមានដំណោះ ស្រាយ។
កាលពីព្រឹកថ្ងៃចន្ទ័នេះ គេសង្កេតឃើញ ប្រជាពលរដ្ឋជាច្រើននាក់ ដែលជាស្រ្តីមេផ្ទះ អ្នកបំរើការងារផ្នែកឯកជន និងអ្នកធ្វើដំណើរមួយចំនួនបានរអ៊ូរទាំចំពោះបញ្ហាកកស្ទះ និងការដាក់ប៉ាសរាស់រាំងផ្លូវជាច្រើនកន្លែង ដែលជាផលលំបាកធ្វើឲ្យពួកគេមិនអាចចូល ទៅកាន់កន្លែងការងាររបស់ខ្លួនឲ្យបានទាន់ពេលវេលា រឺអ្នកខ្លះទៀត ត្រូវបានអាជ្ញាធររារាំងមិនឲ្យបន្តដំណើរចូលទៅកាន់ផ្ទះសំបែង រឺកន្លែងលក់ដូរជាច្រើនទៀតផងដែរ។
អ្នកស្រីណា ផា អាយុ៤០ឆ្នាំ បានឲ្យដឹងថា ព្រឹកមិញខ្ញុំមិនបានទិញម្ហូបទេ ដោយសារតែ ប៉ូលីសដាក់បារ៉ាស់រាំងផ្លូវមិនឲ្យចូលផ្សារ។ អ្នកស្រីបន្តថា មិនត្រឹមតែផ្សារកាប់គោដែលត្រូវ ដាក់បារ៉ាស់ រារាំងផ្លូវនោះទេ សូម្បីតែផ្លូវសំខាន់ៗមួយចំនួនទៀត ក៏ត្រូវបិទផងដែរ ដែលនេះនាំឲ្យមានការ គកស្ទះផ្លូវផងដែរ។
កាលពីថ្ងៃទី១៥-១៧ ខែកញ្ញា ឆ្នាំ២០១៣ គណបក្សសង្គ្រោះជាតិ(CNRP) បានរៀបចំ វេទិការ មហាបាតុកម្មអហឹង្សាមួយនៅម្តុំបរិវេណទីលានប្រជាធិបតេយ្យ ដោយមហាបាតុកម្មអហឹង្សានេះ ត្រូវ បានគេរំពឹងថា អាចនិងមានលទ្ធផលឈានទៅរកការបង្កើតឲ្យមានគណកម្មាធិការចំរុះមួយ សម្រាប់ស៊ើបអង្កេតអំពីលទ្ធផលបោះឆ្នោតឡើងវិញ។
ដោយ៖ អភិរក្ស