ភ្នំពេញ: នៅពេលថ្មីៗនេះ មានកុមារកម្ពុជាចំនួន ២នាក់ទៀតហើយ ដែលបានឆ្លងជំងឺផ្តាសាយបក្សីH5N1 ​
។ នេះការរកឃើញករណីថ្មីទី១៩ និងទី២០ ដែលជំងឺផ្ដាសាយបក្សី​​កើតលើកុមារ​យោងតាមសេចក្ដី​ប្រកាស​​ព័ត៌​មានរួម រវាងក្រសួងសុខាភិបាលកម្ពុជា និងអង្គការសុខភាពពិភពលោក ចេញផ្សាយនៅថ្ងៃទី២០ ខែកញ្ញា​ ​ឆ្នាំ២០១៣ បានអោយដឹងថា ករណីទី១៩ កើតលើកុមារីម្នាក់ អាយុ ៥ឆ្នាំ ដែលមានទីលំនៅក្នុងភូមិព្រៃស្លឹក ឃុំ​​ព្រៃ​ស្លឹក ស្រុកទ្រាំង ខេត្តតាកែវ ត្រូវបានបញ្ជាក់ ដោយ វិទ្យាស្ថានប៉ាស្ទ័រកម្ពុជា នៅថ្ងៃទី ១៤ ខែ កញ្ញាថា មាន​​ជំងឺផ្ដាសាយបក្សី H5N1។ កុមារីនេះចាប់ផ្ដើមឈឺ នៅថ្ងៃទី០៧ ខែកញ្ញា ដោយមានគ្រុនក្ដៅហើយ ឪពុកម្តាយ ​ស្វែង​រកការព្យាបាល នៅគ្លីនិកឯកជនមួយ ប៉ុន្តែដោយសារស្ថានភាព របស់នាងកាន់តែធ្ងន់ធ្ងរ កុមារីនេះត្រូវ​​បានបញ្ជូន ទៅមន្ទីរពេទ្យគន្ធបុបា្ផ រាជធានីភ្នំពេញ និងបានដាក់ឲ្យសម្រាកពេទ្យ នៅថ្ងៃទី១២ ខែកញ្ញា ដោយ​​មានគ្រុនក្តៅ ហត់ ស្លេកស្លាំង សន្លឹម ក្អក និងឈឺទ្រូង។ នៅថ្ងៃទី១៣ ខែកញ្ញា កុមារបានទទួលការព្យាបាល ​ដោយ​​ឱសថ Tamiflu ហើយអ្នកជំងឺបានជាសះស្បើយ ចេញពីមន្ទីរពេទ្យ នៅថ្ងៃទី២០ ខែកញ្ញានេះ ។​

ការអង្កេត​ស្រាវជ្រាវ ដោយក្រុមឆ្លើយតបបន្ទាន់ របស់ក្រសួងសុខាភិបាល នៅឯភូមិព្រៃស្លឹក ឃុំ ព្រៃស្លឹក ស្រុក​​​​​ទ្រាំង ខេត្ត​​​ តាកែវ បង្ហាញថា កុមារី បានប៉ះពាល់ ជាមួយមាន់ឈឺ ឬងាប់នៅក្នុងភូមិ ។ចំណែកករណី​ទី២០កើត​​​​​​លើ កុមារី ម្នាក់ អាយុ ២ឆ្នាំ ដែលមានទីលំនៅ ក្នុងភូមិត្រពាំងច្រាប ឃុំថ្មី ស្រុក ទឹកឈូ ខេត្ដកំពត ត្រូវបាន​បញ្ជាក់ ​ដោយ​វិទ្យាស្ថានប៉ាស្ទ័រកម្ពុជា នៅថ្ងៃទី ១៦ ខែ កញ្ញា ឆ្នាំ ២០១៣ ថាមានជំងឺផ្ដាសាយបក្សី H5N1 ។ ​កុមារីនេះចាប់​ផ្ដើម​​​ឈឺ នៅថ្ងៃទី ១១ ខែ កញ្ញា ឆ្នាំ២០១៣ ដោយ មានគ្រុនក្ដៅ ហើយនៅថ្ងៃទី១២ខែ​កញ្ញា ឪពុក​តាយស្វែង​រក​​ការព្យាបាល នៅគ្លីនិកមួយក្នុងភូមិ។ នៅថ្ងៃទី ១៤ ខែ កញ្ញា ដោយស្ថានភាព​របស់​​​​កុមារី កាន់តែ​ធ្ងន់ធ្ងរ ឪ​ពុក​​​​​​ម្តាយ ស្វែងរកការព្យាបាល បន្តនៅគ្លីនិក មួយក្នុងក្រុងកំពត។ នៅថ្ងៃទី ១៥ ខែកញ្ញា ត្រូវបាន​​បញ្ជូន​ទៅ​មន្ទីរពេទ្យគន្ធបុបា្ផ រាជធានីភ្នំពេញ ដោយ មានគ្រុនក្តៅ ហត់ សន្លឹម រាក ក្អក និងធំពោះ ។​

តាមសេចក្ដីប្រកាស​ព័ត៌មានដដែល ឯកឧត្តម ម៉ម ប៊ុនហេង រដ្ឋមន្ដ្រី ក្រសួងសុខាភិបាល មានប្រសាសន៍ថា​ ជំងឺផ្ដាសាយបក្សី H5N1 នៅ តែបន្ដគំរាមកំហែង ដល់សុខភាពប្រជាពលរដ្ឋកម្ពុជា និងកើតមានច្រើនលើកុមារ​ ដែលជាអ្នកមាន ភាពងាយរងគ្រោះច្រើន និងមានហានិភ័យខ្ពស់។ខ្ញុំសូមអំពាវនាវដល់ ឪពុកម្ដាយ និងអ្នក​ថែ​​ទាំ​ កុមារទាំងអស់ ត្រូវថែទាំ កុមារជាពិសេស ដើម្បីធានាថាកុមារ មិនលេងជាមួយ បសុបក្សី ឬកន្លែង មានប្រ​​លាក់​​ដោយលាមក រោម ឬ កាកសំណល់ បសុបក្សី ។ ឪពុកម្ដាយ និងអ្នកថែទាំកុមារទាំង អស់ ត្រូវប្រាកដថា​ កុមារលាងដៃ​ជាមួយ​សាប៊ូ មុនពេលបរិភោគ និង បន្ទាប់ពីប៉ះជាមួយបសុបក្សី។ ដៃអាចប្រលាក់ដោយវីរុស​ ដែល​​​​​វីរុសនេះ មិនអាច​មើលឃើញ ដោយភ្នែកទទេដឹងទេ។ សាប៊ូសម្លាប់ វីរុសដែលជាប់នៅដៃ ។ ប្រសិន​បើ​​ពួកគេ មានដង្ហើមញាប់ឬ​បាកដកដង្ហើម ត្រូវនាំកុមារ​ទៅរកការ ព្យាបាលជាបន្ទាន់ នៅគ្រឹះស្ថានសុខាភិបាល​ ​ដែលនៅជិតផ្ទះ​របស់​លោកអ្នកបំផុត ហើយត្រូវប្រាប់ មន្ដ្រីសុខាភិបាល អំពីប្រវត្ដិប៉ះពាល់ ជាមួយ សត្វបក្សី​​​ឈឺ ​ឬងាប់ ៕ ដោយៈ រតនា​