សួស្ដីយុវវ័យ ប្រិយមិត្តអ្នកអានជាទីស្រលាញ់រាប់អាន។ រយៈពេលជាងពីរឆ្នាំរបស់ខ្ញុំនៅក្នុងអាជីពសារព័ត៌មានផ្ដោតលើ វិស័យសិល្បៈខ្មែរជាមួយយុវវ័យមួយក្រុមមកពីមហាវិទ្យាល័យផ្សេងៗ គ្នាគឺជារយៈពេលដ៏រីករាយ និងសស្រាក់សស្រាំបំផុត។
គេហទំព័រ sabay វ័យមិនដល់បីឆ្នាំក្រោមការគាំពារផ្ទាល់ពីយុវវ័យដែលស្រលាញ់ សេរីភាពនៃការផ្សព្វផ្សាយឯករាជ និងលើកកម្ពស់វិស័យសិល្បៈខ្មែរ ជាងពីរឆ្នាំកន្លងមកនេះយើងបានធ្វើការយ៉ាងស្និទ្ធជាមួយយុវវ័យ ដើម្បីកែលម្អក្នុងការផ្សាយចេញនូវព័ត៌មានជាទីទុកចិត្តក្នុង ឧស្សាហកម្មកម្សាន្ត។ ផ្អែកលើការប្រឹងប្រែង និងការផ្ដល់មតិកែលម្អតាមរយៈប្រអប់ផ្ដល់មតិនៅលើគេហទំព័រ sabay ក្រុមការងារយើងបានភ្ជាប់ទំនាក់ទំនង និងទទួលបានទំនុកចិត្តពីមិត្តអ្នកអានរាប់ម៉ឺននាក់។
ការ រុករក និងតាមដានព័ត៌មានលើគេហទំព័រ sabay ជាង១០ម៉ឺនទំព័រជារៀងរាល់ថ្ងៃរបស់មិត្តយុវវ័យ និងប្រិយមិត្តអ្នកអាន បាននាំគេហទំព័រវ័យក្មេងមួយនេះអោយឈរលំដាប់ទីពីរនៅកម្ពុជា ក្នុងចំណោមគេហទំព័រក្នុងស្រុកសរុប និងទី ១៩ ៩១០របស់ពិភពលោក។
យុវវ័យ ប្រិយមិត្តអ្នកអានជាទីស្រលាញ់ ក្រៅពីការផ្សាយជូនរាល់ព្រឹត្តិការណ៍ និងព័ត៌មានក្នុងឧស្សាហកម្មកម្សាន្តទាំងក្នុងស្រុក និងក្រៅស្រុក ខ្ញុំនៅតែរំភើបនិងដក់ជាប់ក្នុងចិត្តមិនភ្លេចពីព្រឹត្តិការណ៍ ប្រវត្តិសាស្ត្រក្នុងវិស័យសិល្បៈខ្មែរ “អាណាចក្រតារា២០១១” ដែលយើងបានផ្សាយជូន និងផ្ដិតយករូបភាពតាំងពីដើមរហូតដល់ចប់កម្មវិធី។ ស្នាមញញឹម សំឡេងហ៊ោ ទះដៃយ៉ាងកងរំពង របស់ភ្ញៀវកិត្តិយស សិល្បករមកពីផលិតកម្មនិងស្ថាប័នផ្សេងៗគ្នា យុវវ័យអ្នកគាំទ្ររាប់ពាន់នាក់ក្នុងសាលតែមួយ នៅតែភ្ញោចបេះដូងខ្ញុំអោយនឹកដល់ព្រឹត្តិការណ៍សិល្បៈខ្មែរមួយនេះ ដោយភ្លេចមិនបាន។
បើទោះជាមានចំណោទបញ្ហាជាច្រើននៅក្នុង កម្មវិធីទាំងមូល ក៏ខ្ញុំក្នុងនាមជាកូនខ្មែរ និងជាអ្នកធ្វើការយ៉ាងស្និទ្ធជាមួយប្រព័ន្ធផ្សព្វផ្សាយលើវិស័យ សិល្បៈនៅតែសម្លឹងឃើញអត្ថន័យដ៏ជ្រាលជ្រៅរបស់ “អាណាចក្រតារា” នៅក្នុងឧស្សាហកម្មនេះ។ តើយុវវ័យនឹងស្រមៃដល់រូបភាពបែបណានៃសិល្បៈខ្មែរយើងនៅពេលដែល តំណាងក្រសួងស្ថាប័នពាក់ព័ន្ធ សិល្បករជំនាន់មុនជំនាន់ក្រោយ ប្រិយមិត្ត មិត្តយុវវ័យ មានទឹកចិត្តរួមគ្នាស្រលាញ់សិល្បៈខ្មែរ ស្ដែងចេញនូវទឹកចិត្តគាំទ្រ និងផ្ដល់តម្លៃអោយអាជីព និងអ្នកជោគជ័យក្នុងអាជីពដែលរកបុគ្គលប៉ិនប្រសប់បានដោយកម្រមួយ នេះ?
“អាណាចក្រតារា” ស្ពានសម្រាប់អ្នកគាំទ្រដែលមានសិល្បៈក្នុងបេះដូងបានជួប និងសម្ដែងការគាំទ្រ ក្ដីស្រលាញ់ចំពោះសិល្បករ សិល្បការិនីខ្មែរដែលបានខិតខំសាងស្នាដៃ និងបម្រើការងារក្នុងវិស័យសិល្បៈខ្មែរតាមគ្រប់ទម្រង់។
“អាណាចក្រតារា” ព្រឹត្តិការណ៍ជួបជុំសំណេះសំណាលរវាង ផលិតករ សិល្បករ ពាណិជ្ជករ ជាតិដើម្បីលើកស្ទួយ ជ្រោមជ្រែងសិល្បៈខ្មែរតាមគ្រប់រូបភាពដើម្បីឆ្ពោះទៅកាន់មាគ៌ាដ៏ ត្រចះត្រចង់មួយដែលខ្មែរគ្រប់រូបប្រាថ្នាចង់ឃើញ។
“អាណាចក្រតារា” ព្រឹត្តិការណ៍ចែករំលែកបទពិសោធន៍ ចូលរួមអបអរសម្រាប់លទ្ធផលការងារដែលសិល្បករ ផលិតករ និងស្ថាប័នសិល្បៈសម្រេចបានក្នុងរយៈពេលមួយឆ្នាំ។
“អាណាចក្រតារា” ព្រឹត្តិការណ៍សម្រាប់អ្នកស្រលាញ់សិល្បៈខ្មែរគ្រប់រូបចូលរួមអបអរ និងគាំទ្រសិល្បៈខ្មែរ មិនមែនការប្រកួតប្រជែងនោះទេ។
មុននឹង បើកទំព័រជម្រាបជូនពីព្រឹត្តិការណ៍ “អាណាចក្រតារា២០១២” ខ្ញុំសូមរំលឹកដល់អនុស្សាវរីយ៍កាលពីឆ្នាំ២០១១តាមរយៈស្នាមញញឹម របស់តារាខ្មែរលើឆាកកិត្តិយសប្រវត្តិសាស្ត្រក្នុងឧស្សាហកម្ម កម្សាន្តរបស់ខ្មែរយើង។ ប្រិយមិត្ត មិត្តយុវវ័យដែលបានចូលរួមធ្វើជាសាក្សីក្នុងព្រឹត្តិការណ៍លើកទី មួយនេះប្រាកដជានៅចាំបានពីអនុស្សាវរីយ៍ និងសំឡេងហ៊ោគាំទ្រសិល្បៈខ្មែរយើងយ៉ាងកងរំពងក្នុងសាលដែលផ្ទុក អ្នកទស្សនារាប់ពាន់នាក់។
“អាណាចក្រតារា២០១២” នឹងប្រព្រឹត្តទៅក្នុងពេលឆាប់ៗខាងមុខនេះ ដែលនឹងបង្ហាញជូនវត្តមានតារាចាស់ថ្មីលើវិថីសិល្បៈរាប់រយដូង ដើម្បីប្រិយមិត្ត មិត្តយុវវ័យបានសម្ដែងការគាំទ្រ និងស្រលាញ់ពេញចិត្ត។ ដើម្បីរក្សាអោយមានតម្លាភាពនៅក្នុងកម្មវិធីធំតែមួយគត់នៅ កម្ពុជានេះ ក្រុមការងារ អាណាចក្រតារា នឹងរៀបចំអោយមានការបោះឆ្នោតអនឡាញ និងការបោះឆ្នោតគាំទ្រតាមបណ្ដាខេត្តក្រុងនានា។
លើសពីនេះទៅទៀត “អាណាចក្រតារា២០១២” បានរៀបចំអោយមានគណៈកម្មការចំនួន១២រូប និងក្រុមប្រឹក្សាយោបល់ចំនួន៨រូប ក្នុងនោះក៏មានតំណាងមកពីក្រសួងព័ត៌មាន និង ក្រសួងវប្បធម៌និងវិចិត្រសិល្បផងដែរ។
សូមរង់ចាំតាមដានទស្សនាទាំងអស់គ្នាថាតើ តារារូបណាខ្លះនឹងបង្ហាញខ្លួនក្នុងកម្មវិធី “អាណាចក្រតារា២០១២”?