ភ្នំពេញ៖ គណបក្សសង្រ្គោះជាតិនាល្ងាចថ្ងៃទី៦ សីហា ម្សិលមិញនេះបានប្រមូលផ្តុំអ្នកគាំទ្រជាច្រើនរយនាក់
នៅទីលានប្រជាធិបតេយ្យដែលភាគច្រើនគេសង្កេតឃើញសុទ្ធតែក្រុមយុវជន ដឹកនាំដោយលោក សម រង្ស៊ី
ប្រធានគណបក្សសង្រ្គោះជាតិ និងលោក កឹម សុខា រួមនឹងថ្នាក់ដឹកនាំបក្សជាច្រើនរូបទៀត។ 
បាតុកម្មនាល្ងាចម្សិលមិញនេះ បានធ្វើឲ្យប្រជាពលរដ្ឋនៅក្នុងរាជធានីភ្នំពេញមានការព្រួយបារម្ភយ៉ាងខ្លាំងពី
ភាពអសន្តិសុខ ចលាចល និងការឆក់ប្លន់ដែលអាចកើតចេញពីពួកឱកាសនិយម។ ទន្ទឹមនឹងការព្រួយបារម្ភ
របស់ប្រជាពលរដ្ឋពីបញ្ហាបាតុកម្មដែលធ្វើឡើងដោយគណបក្សសង្រ្គោះជាតិនេះ ស្ថាប័នមានសមត្ថកិច្ចក៏ដូច
ជាអាជ្ញាធររាជធានីភ្នំពេញបានដាក់កម្លាំងត្រៀមការពារសន្តិសុខយ៉ាងមាំទាំផងដែរ។
ទាក់ទិននឹងការធ្វើបាតុកម្មនេះដែរលោក សម រង្ស៊ី ប្រធានគណបក្ស សង្រ្គោះជាតិ បានទាមទារឲ្យគណៈកម្មា
ធិការជាតិរៀបចំការបោះឆ្នោត (គ.ជ.ប)បង្កើតគណៈកម្មការពិសេសមួយ ដើម្បីដោះស្រាយភាពមិនប្រក្រតីមួយ
ចំនួននៅពេលបោះឆ្នោត ដោយមានការចូលរួមពីគណបក្សប្រជាជនកម្ពុជា គណបក្សសង្រ្គោះជាតិអង្គការ
សង្គមស៊ីវិល និងមានអង្គការសហប្រជាជាតិ ធ្វើជាអាជ្ញាធរកណ្តាល។ និងទាមទារឲ្យ គ.ជ.ប កែតម្រូវលទ្ធផល
បោះឆ្នោតកាលពីថ្ងៃទី២៨ ខែកក្កដាឆ្នាំ២០១៣។
បន្ទាប់ពីសំណើលើកដំបូងត្រូវបាន គ.ជ.ប ច្រានចោលនិងទាមទារធ្វើតាមយន្តការរបស់ខ្លួនដែលមានស្រាប់
នោះ លោក សម រង្ស៊ីនៅថ្ងៃទី០៦ ខែសីហា ឆ្នាំ២០១៣ បានចេញលិខិតមួយច្បាប់ថ្មីទៀត ស្នើទៅលោក អ៊ឹម
សួស្តី ប្រធាន គ.ជ.ប ទទូចទាមទារឲ្យបង្កើតគណៈកម្មការពិសេសមួយដើម្បីស៊ើបអង្កេតអំពីភាពមិនប្រក្រតី
ដែលបានកើតមាននៅថ្ងៃបោះឆ្នោតនិងរាប់សន្លឹកឆ្នោត ព្រមទាំងវាយតម្លៃផលប៉ះពាល់លទ្ធភាព នៃការបោះ
ឆ្នោត។
លោក សម រង្ស៊ី តាមរយៈលិខិតមួយច្បាប់នេះ បានថ្លែងថា«ខ្ញុំសូមជម្រាបជូនឯកឧត្តមប្រធានថា ការបោះ
ឆ្នោតរើសតាំងតំណាងរាស្រ្តនីតិកាលទី៥ ថ្ងៃទី២៨ ខែកក្កដា ឆ្នាំ២០១៣កន្លងទៅនេះគណបក្សសង្គ្រោះជាតិ
បានរកឃើញភាពមិន ប្រក្រតីជាច្រើនករណី ដែលកើតមានឡើងនៅតាមការិយាល័យបោះឆ្នោត ទាំងនៅរាជ
ធានីភ្នំពេញ និងនៅតាមបណ្តាខេត្តនានានៅថ្ងៃបោះឆ្នោត និងរាប់សន្លឹកឆ្នោត។
លោក សម រង្ស៊ី បានជំរុញឲ្យមានការបង្កើតគណៈកម្មការពិសេសមួយដើម្បីធ្វើការស៊ើបអង្កេត និងវាយតម្លៃ
ផលប៉ះពាល់ភាពមិនប្រក្រតី នៃការបោះឆ្នោតហើយគណបក្សសង្គ្រោះជាតិ ទាមទារដោយទទូចឲ្យ គ.ជ.ប
ធ្វើការចុះឈ្មោះអ្នកបាត់ឈ្មោះ កែតម្រូវឈ្មោះខុសបោះឆ្នោតតាមការិយាល័យមួយចំនួន រាប់សន្លឹកឆ្នោត
និងធ្វើការផ្ទៀងផ្ទាត់សន្លឹកឆ្នោតមួយចំនួន ព្រមទាំងកែតម្រូវលទ្ធផលនៃការបោះឆ្នោត ថ្ងៃទី២៨ ខែកក្កដា
ឆ្នាំ២០១៣ឡើងវិញ។
លោក សម រង្ស៊ី តាមរយៈលិខិតនេះ បានរំលេចឲ្យឃើញនូវភាពមិនប្រក្រតី ដែលខ្លួនបានរកឃើញផងដែរ
រួមមានជាអាទិ៍៖ទី១- បញ្ជីឈ្មោះអ្នកបោះឆ្នោត ឆ្នាំ២០១២ សម្រាប់ការបោះឆ្នោតជ្រើសតាំងតំណាងរាស្រ្ត
ឆ្នាំ២០១៣មានប្រជាពលរដ្ឋខ្លះបាត់ឈ្មោះ មានឈ្មោះស្ទួនធ្វើឲ្យខុសឈ្មោះ (អក្ខរាវិរុទ្ធ) ឬថ្ងៃខែឆ្នាំកំណើត
ភេទ មានឈ្មោះអ្នកដែលគ្មានអាស័យដ្ឋាននៅក្នុងភូមិ ឃុំ។ ទី២-លិខិតបញ្ជាក់អត្តសញ្ញាណខ្លះគ្មានបំពេញ
អ្វីទាំងអស់ខ្លះបំពេញមិនគ្រប់ព័ត៌មាន ខ្លះគ្មានរូបថត ខ្លះគ្មានស្នាមមេដៃសាក្សីខ្លះមានស្នាមមេដៃមួយ ខ្លះមាន
ស្នាមមេដៃ ទាំងបីតែមនុស្សតែមួយខ្លះគ្មានត្រាឃុំ-សង្កាត់ ខ្លះគ្មានបំពេញអ្វីទាំងអស់ តែមានបោះត្រា និងចុះ
ហត្ថលេខា មេឃុំ-ចៅសង្កាត់ រួចជាស្រេច។ទី៣-ថ្ងៃបោះឆ្នោតទឹកថ្នាំជ្រលក់ អាចលុបលាងបាន និងអាជ្ញាធរ
ភូមិឃុំ នៅអង្គុយក្បែរនឹងមណ្ឌលបោះឆ្នោត ។ ប្រជាពលរដ្ឋមួយចំនួន ត្រូវបានគេបោះឆ្នោត ជំនួសប្រជាពល
រដ្ឋមួយចំនួនខ្លះបាត់ឈ្មោះ និងខុសអក្ខរាវិរុទ្ធ ពុំបានបោះឆ្នោតខ្លះរស់នៅក្រៅភូមិឃុំ ទៅបោះឆ្នោត មានការ
ដឹកជញ្ជូន កងទ័ពទៅបោះឆ្នោតបិទទ្វារបង្អួចការិយាល័យ រាប់សន្លឹកឆ្នោតមួយរយៈ រួចបានបើកវិញដេញភ្នាក់
ងារសង្កេតការណ៍ បក្សសង្គ្រោះជាតិ មិនឲ្យនៅក្នុងការិយាល័យពេលរាប់សន្លឹកឆ្នោតមានខុសតួលេខ ក្នុងការ
ផ្ទៀងផ្ទាត់ សន្លឹកឆ្នោតក្នុងហឹបសន្លឹកឆ្នោតខូច សន្លឹកឆ្នោតមិនបានការ និងសន្លឹកឆ្នោតតាមគណបក្សនយោ
បាយនីមួយៗទទួលបាន ទម្រង់១១០៤ ខ្លះមិនបានបំពេញ ព័ត៌មានគ្រប់គ្រាន់ ។
ចំពោះឯកសារភស្តុតាងអំពីភាពមិនប្រក្រតី នៃការបោះឆ្នោតជ្រើសតាំងតំណាងរាស្រ្ត នីតិកាលទី៥ ថ្ងៃទី២៨
ខែកក្កដា ឆ្នាំ២០១៣ គណបក្សសង្គ្រោះជាតិនឹងបង្ហាញជូនក្នុងករណី ដែលមានគណៈកម្មការពិសេសសម្រាប់
ធ្វើការស៊ើបអង្កេតភាពមិនប្រក្រតី និងវាយតម្លៃផលប៉ះពាល់លទ្ធផលនៃការបោះឆ្នោត។
យោងតាមការរៀបរាប់នូវភាពមិនប្រក្រតី ដែលខ្លួនបានអះអាងខាងលើនេះ លោក សមរង្ស៊ី បានទទូចស្នើសុំ
ឲ្យ គ.ជ.ប បង្កើតគណៈកម្មការពិសេសមួយជាបន្ទាន់ដើម្បីធ្វើការស៊ើបអង្កេតភាពមិនប្រក្រតី និងវាយតម្លៃផល
ប៉ះពាល់លទ្ធភាពនៃការបោះឆ្នោត ដោយមានសមាសភាព មកពីគណបក្សសង្គ្រោះជាតិ គណបក្សប្រជាជន
ព្រមទាំងអង្គការសង្គមស៊ីវិល អ្នកសង្កេតការណ៍ជាតិ-អន្តរជាតិ។ជាពិសេសត្រូវមានគ.ជ.ប ជាអ្នកសម្រប
សម្រួល និងអង្គការសហប្រជាជាតិធ្វើជាអាជ្ញាកណ្តាល។
សូមបញ្ជាក់ថា ដំណើរការបោះឆ្នោតនៅកម្ពុជាជ្រើសតាំងតំណាងរាស្រ្តនីតិកាលទី៥នេះ ទាំងក្នុងយុទ្ធនាការ
ឃោសនារកសំឡេងឆ្នោតនិងថ្ងៃបោះឆ្នោត រាប់សន្លឹកឆ្នោត ត្រូវបានអ្នកសង្កេតការជាតិ និងអន្តរជាតិព្រមទាំង
អង្គការសហប្រជាជាតិផងដែរ វាយតម្លៃថា មានភាពល្អប្រសើរនិងប្រព្រឹត្តទៅដោយយុត្តិធម៌ តម្លាភាព និងត្រឹម
ត្រូវតាមបែបលទ្ធិប្រជាធិបតេយ្យដែលកម្ពុជាកំពុងពង្រឹងយ៉ាងខ្ជាប់ខ្ជួននេះ។
ការទាមទាររបស់លោក សម រង្ស៊ី នៅថ្ងៃនេះទៀតសោត ក៏គ្មានអ្វីថ្មីនោះដែរ ហើយគ.ជ.ប ក៏ធ្លាប់បានប្រកាស
ផងដែរនៅតែរក្សាការដោះស្រាយបញ្ហានៅសេសសល់ក្នុងពេលបោះឆ្នោតតាមយន្តការរបស់ខ្លួនដែលមាន
ស្រាប់ពោល គឺមិនព្រមធ្វើតាមការទាមទាររបស់គណបក្សប្រឆាំងនោះឡើយ៕
ដោយ៖ស.ស្អាត