ភ្នំពេញ៖ នៅវេលាម៉ោង៨និង៣០នាទីព្រឹកនេះបណ្តាញសារព័ត៌មានអាស៊ី ចំនួន៣បានជួបពិភាក្សា​គ្នាក្នុង​សន្និសីទ​​​សារព័ត៌មានមួយស្តីអំពី សារព័ត៌មានសង្គម ទូរស័ព្ទចល័ត និងអន្តរសកម្ម ថាតើធ្វើដូចម្តេច​ដើម្បី​​​
ទាក់​ទាញមនុស្សជំនាន់ថ្មីនៅក្នុងការចូលរួមនយោបាយនិង ការអភិវឌ្ឈន៍នៅអាស៊ី ។

កម្មវិធីនេះមានការអញ្ជើញចូលរួមពីលោក ឱម យិនទៀង ទេសរដ្ឋមន្រ្តីនៃរាជរដ្ឋាភិបាលកម្ពុជា និងជាប្រធាន​គណៈកម្មការ​សិទ្ធិមនុស្សកម្ពុជា នឹងថ្លែងសុន្ទរកថា ពីអនាគតរបស់កម្ពុជាដែលជាសមាជិក​សំខាន់មួយ​របស់​អាស៊ាន ។

ជាមួយគ្នានេះក៏នឹងមានការថ្លែងសុន្ទរកថាពីលោក ប៉ែន សមិទ្ធិ ប្រធានក្លឹបអ្នកាសែតកម្ពុជា (CCj)​និងជានិពន្ធនាយក​​ កាសែតរស្មីកម្ពុជា លោក Paul Linnarz នាយកគម្រោងសារព័ត៌មានអាស៊ី នៃមូលនិធិខុនរ៉ាត់អាដិនណៅអ៊ែរ និងប្រចាំប្រទេសសឹង្ហបូរី លោក Pana Janviroj នាយកប្រតិបត្តិ​បណ្តាញសារព័ត៌មានអាស៊ី(ANN)និងជាប្រធានកាសែត The Nation នៅប្រទេសថៃ ។

ពិធីនេះនឹងប្រព្រឹត្តិទៅរយៈពេលពេញមួយថ្ងៃនៅសណ្ឋាគារ ឡឺរ៉ូយ៉ាល់ ដោយមានការចូលរួម ពីមន្រ្តីរដ្ឋា​ភិបាល ជាតិ អន្តរជាតិ បណ្តាញសារព័ត៌មានជាតិ​អន្តរជាតិ និងអង្គទូតប្រចាំប្រទេសកម្ពុជាជាច្រើនរូប៕

ដោយ ស.ស្អាត