ភ្នំពេញ៖ សម្រាប់ការចុះឈ្មោះប្រកួតប្រជែងបោះឆ្នោតជ្រើសតាំងតំណាងរាស្រ្ត នីតិកាលទី៥ ដែលនឹងចូលមកដល់នាពេលប៉ុន្មានខែខាងមុខនេះគណបក្សប្រជាជនកម្ពុជា(CPP) ជាបក្សកាន់អំណាចដ៏យូរមួយ ប្រកាសពីការរៀបចំខ្លួនរួចរាល់ហើយរង់ចាំថ្ងៃចុះឈ្មោះមកដល់តែប៉ុណ្ណោះ។
ប្រធាននាយកដ្ឋានបូកសរុបគណបក្សប្រជាជនកម្ពុជា និងជាជំនួយការផ្ទាល់លោក សាយ ឈុំអនុប្រធានទី១ ព្រឹទ្ធសភា លោក អ៊ក គីមហាន បានឲ្យដឹងថា គណបក្សប្រជាជនកម្ពុជាបានត្រៀមខ្លួនរួចជាស្រេចហើយសម្រាប់ការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតតំណាងរាស្រ្ត នីតិកាលទី៥ ។ ហើយនឹងយកសំណុំឯកសារទាំងនោះទៅចុះឈ្មោះនៅគ.ជ.បនៅថ្ងៃទី២៩ ខែមេសាដែលជាថ្ងៃ ទទួលចុះឈ្មោះគណបក្សនយោបាយ។
ចំពោះការចុះបញ្ជីបេក្ខជនគណបក្សនយោបាយគឺគណបក្ស បានត្រៀមលក្ខណៈនិងបំពេញឯកសាររួចរាល់អស់ហើយ។ លោកបង្ហាញថា បេក្ខជនសរុបទូទាំង២៤រាជធានីខេត្ត មាន២៦៨ នាក់ពេញសិទ្ធិ ១២៣ នាក់ បម្រុង ១៤៥នាក់។ ក្នុងនោះស្ត្រី ៤៨ នាក់ស្មើនឹង១៨%ក្នុងនោះមានស្ត្រីដែលឈរលេខរៀងសង្ឃឹមថានឹងជាប់មានប្រហែលជា ៨ ទៅ៩%។បញ្ជីបេក្ខជននេះមានតំណាងរាស្ត្រចាស់ៗមួយចំនួនធំហើយក៏មានអ្នកថ្មីៗខ្លះដែរជាយុវជន ។យុវជនជាបេក្ខជនថ្មីឈរឈ្មោះបោះឆ្នោតនេះក៏មានខ្លះនៅលេខរៀង ដែលត្រូវជាប់ហើយអ្នកខ្លះក៏នៅលេខរៀងដែលមិនត្រូវជាប់ដើម្បីទទួលយកបទពិសោធន៍។
សូមរំលឹកថា លោក ទេព នីថា ធ្លាប់បានឲ្យដឹងនាពេលកន្លងមកថា មានគណបក្សមិនលើសពី១០ទេ ដែលរំពឹងថាមកចុះឈ្មោះនៅគ.ជ.ប ដើម្បីធ្វើការប្រកួតប្រជែងការបោះឆ្នោតនីតិកាលទី៥ ក្នុងចំណោមគណបក្សនយោបាយចំនួន៤៣ដែលបានចុះបញ្ជីជាផ្លូវការនៅក្រសួងមហាផ្ទៃ។
ជាមួយគ្នានេះគ.ជ.ប.បានប្រកាសឲ្យគណបក្សនយោបាយត្រៀមលក្ខណៈដើម្បីចុះបញ្ជីគណបក្សនយោបាយឈរឈ្មោះបោះឆ្នោតនិងបញ្ជីបេក្ខជនឈរឈ្មោះបោះឆ្នោតតំណាងរាស្ត្រ ចាប់ពីថ្ងៃទី២៩មេសាដល់ថ្ងៃទី១៣ខែឧសភាឆ្នាំ២០១៣៕
ដោយ ៖ សុវណ្ណរ័ត្ន