ភ្នំពេញ៖ នៅថ្ងៃទី១៤ ខែវិច្ឆិកា ឆ្នាំ២០១៣ស្អែកនេះ ថ្នាក់ដឹកនាំគណបក្សសង្រ្គោះជាតិ នឹងជួបពិភាក្សាគ្នា នៅទីស្នាក់ការកណ្ដាលគណបក្ស ដើម្បីរៀបចំផែនការសកម្មភាពរបស់គណបក្សបន្ដទៅមុខទៀត។មន្រ្ដីជាន់ខ្ពស់គណបក្សសង្រ្គោះជាតិ បានឲ្យដឹង ថា គណបក្សសង្រ្គោះជាតិ នៅតែបើកចំហបេះដូងចរចាជាមួយគណបក្សប្រជាជនកម្ពុជា តែរហូតមកទល់ នឹងពេលនេះ នៅមិនទាន់កំណត់ថ្ងៃនោះទេ។ យ៉ាងណាក៏ដោយ នៅថ្ងៃទី១៤ ខែវិច្ឆិកា ឆ្នាំ២០១៣ ថ្នាក់ដឹកនាំគណបក្សសង្រ្គោះជាតិ នឹងជួបប្រជុំពិភាក្សា នៅស្នាក់ការគណបក្ស ដើម្បីរៀបចំផែនការសកម្មភាព គណបក្សបន្ដទៀត។កាលពីពេលកន្លងទៅ លោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្រ្គោះជាតិ បានប្រកាសទុកពេលវេលាចរចាត្រឹមចុងឆ្នាំ២០១៣នេះជាមួយគណបក្សប្រជាជនកម្ពុជាដើម្បីស្វែងរកយុត្តធម៌ឆាប់ៗជូនប្រជាពលរដ្ឋជាម្ចាស់ឆ្នោត ហើយប្រសិនបើដំណោះស្រាយនៅតែមិនមាននៅចុងឆ្នាំ២០១៣នេះទេមហាបាតុអហិង្សានិងកើតមានជាទ្រង់ទ្រាយធំជាថ្មីម្ដងទៀត។សូមជម្រាបដែរថា លោកសមរង្ស៊ីប្រធានគណបក្សសង្គ្រោះជាតិបានវិលត្រឡប់ពីប្រទេសភីលីពីន មកដល់ប្រទេសកម្ពុជាវិញហើយ កាលពីយប់ថ្ងៃទី១២ ខែវិច្ឆិកាខណៈដែលលោកកឹមសុខាដែលជាអនុប្រធានក៏បានវិលពីប្រទេសអូស្ត្រាលីមកដល់កម្ពុជានៅល្ងាចថ្ងៃទី១២ខែវិច្ឆិកានោះដែរ ហើយនៅថ្ងៃទី១៣ ខែវិច្ឆិកានេះលោក សម រង្ស៊ីប្រធានគណបក្សសង្រ្គោះជាតិបានទៅជួបអ្នកគាំទ្រនៅខេត្តព្រះវិហារ៕
ដោយ៖ គង់ រតនា