ភ្នំពេញ៖ពួកគេបានហៅដីកាកោះហៅរបស់តុលាការថា ពុំបានឈរលើការស៊ើបអង្កេត ប៉ុន្តែបានស្ថិតក្រោម
ឥទ្ធិពលទឹកប្រាក់ ។ ស្របគ្នានោះ ពួកគេបានទាមទារអោយតុលាការត្រូវឈរលើគោលការណ៍ឯករាជ្យ ។
ក្រុមអ្នកតវ៉ាបានស្រែកប្រកាសបូជាសពតុលាការខ្មែរ និងបានបន់ស្រន់អោយតុលាការនេះកើតសារជាថ្មីប្រែ
ក្លាយជាតុលាការ ដែលឯករាជ្យមានយុត្តិធម៌ត្រឹមត្រូវ។
ក្នុងពេលតវ៉ានោះ គេឃើញស្ត្រីអ្នកបឹងកក់បានទូលក្អម និងល្អី មានដាក់លាជ អង្ករ ម្ទេស អំបិល ទៀន ធូបនិង
ប្រាក់ដុល្លារថតចម្លង ដើរចេញតាមផ្លូវខាងមុខតុលាការសាលាដំបូងរាជធានីភ្នំពេញ ស្រែករំពងថា តុលាការ
ខ្មែរស្លាប់ហើយ និងត្រូវដល់ពេលបូជា។ បន្ទាប់មកពួកគេបានលុតជង្គង់នៅខាងមុខអគារតុលាការ អុជធូប
បាចក្រដាសដុល្លារថតចម្លង បោកបំបែកក្អម និងសុំអោយតុលាការកើតសារជាថ្មីអោយខុសពីការអនុវត្តក្នុង
ពេល បច្ចុប្បន្ន។
ការតវ៉ារបស់អ្នកភូមិ បានកើតឡើងនៅពេលដែលអ្នកបឹងកក់ ២នាក់ និងអ្នកបុរីកីឡា ម្នាក់ ត្រូវកោះហៅអោយ
ចូលទៅបំភ្លឺនៅតុលាការ ។ ក្នុងនោះ គឺអ្នកស្រី គង់ ចន្ថា និងលោក ស៊ូ សុផល ត្រូវបំភ្លឺពីបណ្ដឹងអំពើហិង្សា
ចេតនាទៅវិញទៅមក ដែលបានកើតឡើងកាលពីថ្ងៃទី២៤ មករា ឆ្នាំ២០១២។ អ្នកស្រី ស ស៊ន អ្នកបុរីកីឡា ត្រូវ
បំភ្លឺពីបទប្រើហិង្សាដោយចេតនាលើអ្នកកាន់កាប់អចលនទ្រព្យ ដោយសុចរិត ប្ដឹងដោយអ្នកស្រី ស៊ុយ សុផាន
ប្រធានក្រុមហ៊ុនផានអ៊ីម៉ិច។ យ៉ាងណា ការតវ៉ានោះបានរំសាយបន្ទាប់ពីពួកគេបានទទួលព័ត៌មានពីមេធាវីថា
ការសាកសួរត្រូវលើកពេល។
សកម្មជនទាមទារសិទ្ធិដីធ្លី អ្នកស្រី គង់ ចន្ថា បានថ្លែងនៅខាងមុខតុលាការថា អ្នកស្រីអស់ជំនឿលើតុលាការ
បច្ចុប្បន្ន និងចង់បានតុលាការថ្មីដែលផ្ដល់យុត្តិធម៌ដល់ពលរដ្ឋស្លូតត្រង់ ពុំមែនធ្វើតាមខ្សែញាក់របស់អ្នកមាន
ប្រាក់មានអំណាច។
ចំណែកអ្នកស្រី ស ស៊ន បានលើកឡើងដែរថា បើតុលាការយុត្តិធម៌ គួរតែចាត់ការរឿងក្តីរបស់អ្នកស្រីដែលប្ដឹង
អ្នកស្រី ស៊ុយ សុផាន ថាបានរំលោភកិច្ចសន្យាសាងសង់អគារមិនបានគ្រប់ចំនួន។
វិទ្យុអាស៊ីសេរី នៅមិនទាន់អាចសុំការអធិប្បាយពីមន្ត្រីនៅតុលាការបានទេ នៅរសៀលថ្ងៃទី២៤ ខែមេសា។
អ្នកស៊ើបអង្កេតជាន់ខ្ពស់នៃអង្គការការពារសិទ្ធិមនុស្សលីកាដូ (Licadho) លោក អំ សំអាត មាន ប្រសាសន៍
ថា នៅពេលដែលពលរដ្ឋកាន់តែអស់ជំនឿលើតុលាការ ស្ថាប័ននេះគួរតែពិចារណារកវិធី កែទម្រង់ដើម្បីផ្ដល់
ជំនឿដល់ប្រជាពលរដ្ឋឡើងវិញ។ ក្នុងពេលទាមទារនៅល្ងាចនេះ អ្នកតវ៉ាមិនភ្លេចដង្ហោយហៅតុលាការអោយ
ពិចារណាដោះលែងអ្នកស្រី យ៉ោម បុប្ផា ដែលកំពុងជាប់ពន្ធនាគារព្រៃស បន្ទាប់ពីត្រូវចោទប្រកាន់ពីបទប្រើ
អំពើហិង្សាដោយចេតនាលើក្រុម អ្នករត់ម៉ូតូឌុបក្នុងតំបន់បឹងកក់ នាពេលកន្លងមក៕