អង់គ្លេស: រហូតមកទល់ពេលនេះ យន្តហោះអាកាសចរណ៍ម៉ាឡេស៊ី ដែលបានបាត់ខ្លួន តាំងពីថ្ងៃទី ៨ មីនា នោះ នៅមិនទាន់រកឃើញនៅឡើយទេ បើទោះជាមានប្រភពពីប្រព័ន្ធផ្កាយរណប និងរ៉ាដា អះអាងថា មានចំណុចសង្ស័យនៅតំបន់មហាសមុទ្រឥណ្ឌាក៏ដោយ ខណៈដែលប្រទេសអង់គ្លេស បានបញ្ជូននាវាមុជទឹកធុន HMS Tireless ទៅចូលរួមប្រតិបត្តិការនេះដែរ ។ ក្រសួងការពារប្រទេសអង់គ្លេស បាននិយាយថា នាវាមុជទឹករបស់ខ្លួន បានមកដល់ភាគខាងត្បូងមហាសមុទ្រឥណ្ឌាហើយ ដើម្បីស្វែងរកប្រអប់ខ្មៅកំណត់ហេតុរបស់យន្តហោះ ។ យន្តហោះអាកាសចរណ៍ម៉ាឡេស៊ី ជើងហោះហើរ MH370 បានបាត់ខ្លួន ជាមួយអ្នកដំណើរ ២៣៩នាក់ កាលពីថ្ងៃទី៨ មីនា ខណៈដែលកំពុងហោះហើរពីទីក្រុងកូឡាឡាំពួរ ទៅក្រុងប៉េកាំង ប្រទេសចិន ។
មុននេះបន្តិច កាលពីថ្ងៃអង្គារ លោកអែនហ្គាស ហោស្តុន (Angus Houston) មេបញ្ជាការកងទ័ពអាកាសអូស្ត្រាលី ដែលជាអ្នកសម្របសម្រួលការស្រាវជ្រាវពីអូស្ត្រាលី បាននិយាយថា ការតាមរុករក ជារឿងពិបាកណាស់ និងអាចចំណាយពេលច្រើនសប្តាហ៍ទៀត ។ បើទោះជាគេបានរកឃើញវត្ថុសង្ស័យអណ្តែតនៅលើទឹក ក៏ដោយ ប៉ុន្តែគ្មានតម្រុយណាមួយពាក់ព័ន្ធនឹងយន្តហោះដែលបាត់ខ្លូនទេ ។ កាលពីថ្ងៃចន្ទ អនុរដ្ឋមន្ត្រីក្រសួងដឹកជញ្ជូនម៉ាឡេស៊ី លោកហ៊ីសាមមុដឌីន ហ៊ូសសេន(Hishammuddin Hussein) បាននិយាយថា បើតាមអាជ្ញាធរអូស្ត្រាលី ការស្រាវជ្រាវបានពង្រីកប្រតិបត្តិការរហូតដល់ទៅ ២៥៤.០០០គ.ម២ ហើយ ប៉ុន្តែនៅតែ មិនទាន់រកឃើញតម្រុយអ្វីនៅឡើយ ។ ក្រុមមន្ត្រីម៉ាឡេស៊ី ក៏បានបង្ហាញទិន្នន័យពេញលេញនៃការទំនាក់ទំនងរវាងយន្តហោះជើងហោះហើរ MH370 និងផ្នែកត្រួតពិនិត្យអាកាសចរណ៍របស់ក្រុងកូឡាឡាំពួរផងដែរ ។ ប៉ុន្តែគ្មានសញ្ញា ដែលបង្ហាញពីភាពមិនប្រក្រតីនៅក្នុងទិន្នន័យនោះទេ បើទោះជាមានការអះអាងមុននេះថា គេបានទទួលសារចុងក្រោយក៏ដោយ ។ មកទល់ពេលនេះ គេនៅមិនទាន់បានដឹងច្បាស់ពីមូលហេតុដែលគណនីប្រែប្រួលនោះទេ ។
ក្រុមមន្ត្រីម៉ាឡេស៊ីខ្លះ និយាយថា ផ្អែកតាមទិន្នន័យផ្កាយរណប យន្តហោះនេះ អាចផ្ទុះ នៅភាគខាងត្បូងមហាសមុទ្រឥណ្ឌា ប៉ុន្តែ ព័ត៌មានជាច្រើនទាក់ទិននឹងយន្តហោះនេះ តម្រូវឱ្យមានតឹកតាងបញ្ជាក់ ដែលករណីនេះ បានធ្វើឱ្យសារធារណជនមានការខឹងសម្បារជាខ្លាំង ដោយសារតែការខ្វះទិន្នន័យព័ត៌មាន ។ ប៉ុន្តែ បើតាមការវិភាគទ្រឹស្តីផ្សេងទៀត គេយល់ថា យន្តហោះ អាចត្រូវបានចាប់ជំរិត ដោយកាពីតែនយន្តហោះផ្ទាល់តែម្តង ហើយទិន្នន័យទាំងអស់ ត្រូវបានលុបចោល ដើម្បីបំភ័ន្តការតាមដាន ។ ទោះជាយ៉ាងណា ករណីនេះ ត្រូវបានលោកហ៊ូសសេន ច្រានចោល ក្រោយពីក្រុមស៊ើបអង្កេតពិសេស រកមិនឃើញកត្តាសង្ស័យទាំងនេះ ៕
ដោយៈ ភីនរ៉ា